រាជធានីភ្នំពេញ ៖ កីឡាករផាន់ គ្រាន់ មកពីក្លិបព្រះខ័នរាជនៃកងរាជអាវុធហត្ថលើផ្ទៃប្រទេស សង្ឃឹមរកបាន៣ពិន្ទុបន្ថែមទៀតពេលជួប ខុន ស៊ីចាន់ មកពីក្លិបកងពលធំអន្តរាគមន៍លេខ៣ ព្រះវិហារ នៅលើសង្វៀនទូរទស្សន៍ CTN ថ្ងៃសៅរ៍ ទី១៥ មីនា ក្នុងការប្រកួតវគ្គជម្រុះវិលជុំឈានទៅដណ្តើមខ្សែក្រវាត់ស្រាបៀរលីអូ ។ ផាន់ គ្រាន់ និង ខុន ស៊ីចាន់ ទោះបីឆ្លងកាត់ការប្រកួតបាន២លើកម្នាក់ហើយឈ្នះម្តង ចាញ់ម្តងដូចគ្នា បុ៉ន្តែ ខុន ស៊ីចាន់ ប្រហែលជាទៅមិនរួចជាមួយ ផាន់ គ្រាន់ ទេមើលទៅ ។
កន្លងមក ផាន់ គ្រាន់ ចាញ់ តែ ឡៅ ចន្ទ្រា មកពីក្លិបកងពលតូចឆត្រយោង៩១១ ម្តងបុ៉ណ្ណោះ ក្រៅពីនោះអ្នកណាក៏មិនអាចធ្វើអ្វីគេបានឡើយ ។ ទាំងបច្ចេកទេសវាយកែង និងជង្គង់ គឺគេអាចធ្វើបានល្អខ្លាំងណាស់ ហើយរាល់ការវាយចេញរបស់គេទៀតសោតក៏រហ័សរហួន និងចំគោលដៅល្អ ឯចិត្តក៏សឿងខ្លាំងណាស់ដែរ ជាក់ស្តែងលើកមុនគេចាញ់ពិន្ទុ ឡៅ ចន្ទ្រា ក្នុងលក្ខណៈប្រផិតប្រផើយបុ៉ណ្ណោះ ។ ដល់ពេលមកប៉ះ ខុន ស៊ីចាន់ លើកនេះ សូម្បីតែពួកអ្នកលេងភ្នាល់ស៊ីលុយ ក៏ជ្រើសយកគេ ដោយហ៊ានតឱ្យ ខុន ស៊ីចាន់ ១០ស៊ីតែ៥បុ៉ណ្ណោះ ។
ចំណែក ខុន ស៊ីចាន់ ធ្លាប់ឈ្នះម្តង គឺឈ្នះពិន្ទុ នឿន សាវឌី មកពីក្លិបអេភូថងកីឡាទាំងលំបាក ទើបពេលមកប៉ះ ផាន់ គ្រាន់ លើកនេះគេសង្ឃឹមតិចបំផុត ។ ខុន ស៊ីចាន់ មានចិត្តសឿងគួរសម ហើយកន្លងមកកម្រមានអ្នកណាវាយគេឱ្យសន្លប់ណាស់ ហើយលើកនេះគេគិតថា ផាន់ គ្រាន់ បើចង់យកឈ្នះគេបែបមិនពិបាកនោះទេ តែបើសិនជាចង់វាយគេឱ្យសន្លប់បែបមិនងាយឡើយ។ ខុន ស៊ីចាន់ ល្អស្នៀតកណ្តាប់ដៃ និងស្នៀតជើង តែអន់ស្នៀតកែង និងជង្គង់ដែលប្រើទៅមិនសូវមានប្រសិទ្ធភាព ។
ចំណែកឯការប្រកួតជាលក្ខណៈមិត្តភាពដែលទទួលការឧបត្ថម្ភដោយស្រាផែនដីវិញនោះមានដូចជា ឈាន ហុង មកពីសមាគមកីឡាប្រដាល់ក្រសួងការពារជាតិ ជួបជាមួយ ធី តុងហុី មកពីក្លិបសានវ័ន្តកីឡា ។ សេង ហៀង មកពីសមាគមយុវជនកម្ពុជាខណ្ឌមានជ័យ ជួបជាមួយ វង្ស គង់រាជ មកពីក្លិបតាព្រហ្មមានជ័យបង្ក្រាបគ្រឿងញៀន ។ ផន ប៊ុនម៉ៅ មកពីក្លិបបុរីរាជសីហ៍មានឫទ្ធិ ជួបជាមួយ ឈាង វិច្ឆិកា មកពីក្លិបកុសលកីឡា ។
សូយ សែនខ្មៅ មកពីក្លិបពោធិជ័យកីឡា ជួបជាមួយ មាស ឆៃយ៉ា មកពីក្លិបរាជសីហ៍ខេត្តបន្ទាយមានជ័យ ។ ម៉ោង សុខុន មកពីក្លិងរាជសីហ៍បង្ក្រាបគ្រឿងញៀន ខេត្តរតនគិរី ជួបជាមួយ ស៊ី សាអុីត មកពីក្លិបឃ្លាំងមឿងកីឡាខេត្តពោធិ៍សាត់ និង សាស ខ្មៅ មកពីក្លិបតាព្រហ្មមានជ័យបង្ក្រាបគ្រឿងញៀន ជួបជាមួយ ខុន បូរ៉ាត មកពីក្លិបកងពលធំអន្តរាគមន៍លេខ៣ ព្រះវិហារ ៕
ចែករំលែកព័តមាននេះ