ក្នុងឱកាសចូលរួមសន្និសីទកាសែតកាលពីថ្ងៃចន្ទដើមសប្តាហ៍នេះ កីឡាករប្រដាល់អង់គ្លេសចច ហ្រ្គូវ បានបញ្ជាក់យ៉ាងមុតមាំថា ខ្លួននឹងប្រើពេលត្រឹមតែ៣ទឹកប៉ុណ្ណោះដើម្បីផ្តួលកីឡាករមិត្តរួមជាតិរបស់គេគឺ ខាល ហ្វ្រច់ ឱ្យចុះចាញ់មិនអាចតដៃបាន ។ សូមបញ្ជាក់ថា ចច ហ្រ្គូវ នឹងឡើងវាយដណ្តើមខ្សែក្រវាត់ស្ថាប័ន IBF និង WBA ក្នុងប្រភេទទម្ងន់ super middleweight ពីកីឡាករខាល ហ្វ្រច់ នៅថ្ងៃទី៣១ ខែឧសភាខាងមុខនេះ នាសង្វៀនពហុកីឡដ្ឋានជាតិ Wembly ស្ថិតក្នុងទីក្រុងឡុងដ៍ ប្រទេសអង់គ្លេស ។
នៅចំពោះមុខអ្នកចូលរួមជាច្រើននាក់ ចច ហ្រ្គូវ បានប្រដូចការជួបគ្នារវាងរូបគេនិងខាល ហ្វ្រច់ទៅនឹងការប្រកួតរវាងកីឡាករ Marvin Hagler និងកីឡាករ Thomas Hearns កាលពី២៩ឆ្នាំមុន ។ គេបានបញ្ជាក់ថា ៖ «នេះជាការប្រកួតត្រឹម៣ទឹកប៉ុណ្ណោះ ។ នេះគឺជាការជួបគ្នារវាង Hagler និង Hearns ទសវត្សថ្មី ។ ខ្ញុំដឹងថា ខ្ញុំអាចធ្វើឱ្យខាល ហ្វ្រច់ ឈឺចាប់បាន ហើយហ្វ្រច់ខ្លួនគេផ្ទាល់ក៏បានដឹងពីបញ្ហានេះដែរ ។ ល្បឿនកណ្តាប់ដៃវាយចេញរបស់ខ្ញុំរហ័សជាងគេ។ ចំណែកជំហរជើង និងការបម្លាស់ទីវិញ គឺរឹតតែល្អជាងឆ្ងាយ ។ និយាយរួមមក ខាល ហ្វ្រច់គ្មានឱកាសឈ្នះនោះទេ ។ ប្រសិនជាគេវាយដោយប្រុងប្រយ័ត្ន ខ្ញុំនឹងផ្តួលគេនិងកាប់ចិញ្ច្រាំគេ ប៉ុន្តែប្រសិនជាគេសម្រុកខ្លាំង គេនឹងប្រើកណ្តាប់ដៃច្រើនធ្វើឱ្យមានចន្លោះប្រហោង»។
ឆ្លើយតបនឹងការថ្លែងខាងលើនេះ ខាល ហ្វ្រច់ បានបញ្ជាក់ថា ៖ «ប្រសិនជាគេគិតថាអាចផ្តួលខ្ញុំតែក្នុង៣ទឹក វាជារូបគេវិញទេដែលត្រូវដួលនោះ ។ វាពិតជារឿងគួរឱ្យអស់សំណើច ខ្ញុំមានកម្លាំងខ្លាំងមហិមាក្នុងពេលនេះ។ ស្ថិតក្នុងលក្ខខណ្ឌរាងកាយបែបនេះ គ្មានផ្លូវណាដែលគេអាចចូលក្បែរខ្ញុំបាននោះទេក្នុងរយៈពេល៣ទឹកដំបូង ។ ខ្ញុំសូមប្រាប់ថា ការប្រកួតនេះមិនអាចពន្យារដល់១២ទឹកបានទេ ។ ចច ហ្គ្រូវនឹងត្រូវបានបញ្ឈប់ភ្លាមៗ»។
ចច ហ្គ្រូវ និងខាល ហ្វ្រច់ ធ្លាប់បានជួបគ្នាម្តងរួចមកហើយកាលពី៦ខែមុន ដោយជ័យជម្នះបានទៅលើខាល ហ្វ្រច់ បន្ទាប់ពីអាជ្ញាកណ្តាលបញ្ឈប់ចច ហ្គ្រូវ ក្នុងទឹកទី៩ ។ យ៉ាងណាក៏ដោយ ចច ហ្គ្រូវ បានអះអាងថា ខ្លួននៅអាចបន្តការប្រកួតបាន ហើយជំទាស់ការសម្រេចរបស់លោកអាជ្ញាកណ្តាល Howard Foster ។ មើលលើឯតទគ្គកម្មប្រកួតវិញ ចច ហ្គ្រូវធ្លាប់ប្រកួតបាន២០លើកប៉ុណ្ណោះ ក្នុងនោះឈ្នះ១៩ ចាញ់១ ខណៈខាល ហ្វ្រច់ ធ្លាប់ប្រកួតដល់ទៅ៣៥លើក ក្នុងនោះឈ្នះ ៣២លើក ប៉ុន្តែចាញ់២លើក ៕
ចែករំលែកព័តមាននេះ