កីឡាករលំដាប់កំពូលពិភពលោកសញ្ជាតិស៊ែប៊ី ណូវ៉ាក់ យ៉ូកូវិច មានឱកាសឈានចូលទៅជុំទី៤កម្មវិធី BNP Paribas Open បន្តទៀតក្រោយពីបានយកឈ្នះកីឡាករលំដាប់ទី៩១ពិភពលោកមកពីកូឡុំប៊ី Alejandro Gonzalezក្នុងជុំទី៣ កាលពីថ្ងៃអង្គារ ទី១១ ខែមីនា ។ ដូចជាឆ្នាំកន្លងទៅដែរ ការប្រកួតនៅឆ្នាំនេះត្រូវបានរៀបចំធ្វើនៅក្រុង Indian Wells រដ្ឋកាលីហ្វ៊័នីញ៉ា សហរដ្ឋអាមេរិក ។
យ៉ូកូវិចបំបាក់ Gonzalez ក្នុងលទ្ធផល ៦-១,៣-៦ និង ៦-១ ដោយប្រើពេលអស់ជិត២ម៉ោង ។ បើករដូវកាលថ្មីនេះ ការប្រកួតរបស់ យ៉ូកូវិច ហាក់មិនល្អដូចជាឆ្នាំមុនៗឡើយ ។ កាលពីខែមករា ម្ចាស់ពានក្របខ័ណ្ឌធំ៦ជំនាន់រូបនេះបានខកខានការទទួលបានពានក្របខ័ណ្ឌ Australian Open លើកទី៤ បន្ទាប់ពីបរាជ័យក្នុងវគ្គ១/៤ផ្តាច់ព្រ័ត្រក្រោមថ្វីដៃកីឡាករស្វ៊៊ីស Stanislas Wawrinka ។ បន្ទាប់មកទៀត ការប្រកួតនៅទីក្រុងឌូបៃ ប្រទេសអារ៉ាប់រួម គេបានបរាជ័យក្នុងវគ្គពាក់កណ្តាលផ្តាច់ព្រ័ត្រ បន្ទាប់ពីចាញ់កីឡាករស្វ៊ីសម្នាក់ទៀតគឺរ៉ូជើ ហ្វេដឺរ័រ ។ ដោយឡែកសម្រាប់កម្មវិធីនេះនៅជុំបន្ទាប់ គេនឹងប៉ះជាមួយកីឡាករក្រូអាស៊ី Marin Cilic ដែលបានផ្តួលកីឡាករអេស្ប៉ាញ Tommy Ro-bredo ក្នុងលទ្ធផល៦-៤និង៦-៣ ។
ចំណែកកីឡាករការពារជើងឯករ៉ាហ្វាអែល ណាដាល់ ត្រូវបង្ខំចិត្តវេចសម្ពាយទៅផ្ទះវិញក្រោយចាញ់ក្រោមថ្វីដៃកីឡាករលំដាប់ទី៣១ពិភពលោកជាតិអ៊ុយក្រែន Alexandr Dolgopolov ក្នុងលទ្ធផល ៦-៣,៣-៦និង ៧-៦ ។ នេះជាលើកទី១ហើយដែលកីឡាករលំដាប់ទី១ពិភពលោករូបនេះបរាជ័យក្រោមដៃ Dolgopolov ក្នុងការជួបគ្នាចំនួន៥លើកកន្លងមកនេះ ។
គួរកត់សម្គាល់ថា ណាដាល់ តែងតែបានឈានចូលដល់វគ្គផ្តាច់ព្រ័ត្រកម្មវិធី BNP Pari-bas Open រៀងរាល់ឆ្នាំចាប់តាំងពីការចូលរួមនាឆ្នាំ២០០៦មក ។ ក្រៅពីនេះ គេក៏ធ្លាប់បានឈ្នះពានជើងឯកចំនួន៣លើករួចមកហើយដែរក្នុងនោះគឺនៅឆ្នាំ ២០០៧ ២០០៩ និងឆ្នាំ២០១៣ ។ គេបានថ្លែងថា ៖«កីឡាករ Dolgopolov ពិតជាលេងបានល្អខ្លាំងណាស់ ។ កាលពីប្រកួតនៅទីក្រុងរីយ៉ូ គេធ្វើបានល្អខ្លាំងណាស់ ។ ដូច្នេះអ្វីដែលគេកំពុងធ្វើគឺពិតជាអស្ចារ្យ ។ ការប្រកួតនៅថ្ងៃនេះ ខ្ញុំបានធ្វើឱ្យមានកំហុសច្រើន» ។
ការប្រកួតឯកត្តជនផ្នែកនារីវិញ នាងជេលីណា ជែនកូវិច បំបាក់នាងការ៉ូលីន វ៉ូនីអាកគី ក្នុងលទ្ធផល៦-៣និង៦-១ ។ នៅជុំបន្ទាប់ កីឡាការិនីស៊ែប៊ីរូបនេះនឹងប៉ះជាមួយអ្នកឈ្នះរវាងនាង អានីយេស្កា រែដវ៉ាន់ស្កា និងនាង Alize Cornet ។ បើគិតពីឆ្នាំ ២០១០មក វាជាលើកទី១ហើយដែលជែនកូវិច ឈានចូលដល់វគ្គ១/៤ផ្តាច់ព្រ័ត្រ ។
ឯកីឡាការិនីអាមេរិក Laura Davis បានខ្លួនពីការប្រកួតជាមួយនាង Casey Dellacquaមកពីប្រទេសអូស្ត្រាលីបន្ទាប់ពីមានបញ្ហាចុករមួលក្រពះ ។ ដូច្នេះនាង Dellacqua ត្រូវឡើងទៅវគ្គ១/៤ផ្តាច់ព្រ័ត្រដោយស្វ័យប្រវត្តិ ។ នៅវគ្គនេះ នាងនឹងប៉ះជាមួយជើងខ្លាំងមកពីរូម៉ានី Simona Halep ដែលបានបំបាក់កីឡាការិនីកាណាដា Eugenie Bouchard ក្នុងលទ្ធផល ៦-២,១-៦និង៦-៤ ៕
ចែករំលែកព័តមាននេះ