រាជធានីភ្នំពេញ ៖ នៅទីបំផុត កីឡាករប្រដាល់ជើងខ្លាំងពីរនាក់បងប្អូនដែលកំពុងធ្លាក់ក្នុងស្ថានភាពកាន់តែអាក្រក់នោះ ទំនងជាធ្វើឱ្យពួកគេពិបាកងាកក្រោយចូលស៊ប់នៅក្នុងពិភពប្រដាល់ដូចអំឡុងពេលមុន ចាប់តាំងពីពេលនេះតទៅហើយ ។
រាជធានីភ្នំពេញ ៖ នៅទីបំផុត កីឡាករប្រដាល់ជើងខ្លាំងពីរនាក់បងប្អូនដែលកំពុងធ្លាក់ក្នុងស្ថានភាពកាន់តែអាក្រក់នោះ ទំនងជាធ្វើឱ្យពួកគេពិបាកងាកក្រោយចូលស៊ប់នៅក្នុងពិភពប្រដាល់ដូចអំឡុងពេលមុន ចាប់តាំងពីពេលនេះតទៅហើយ ។ កីឡាករផល សុផាត និងផល សោភ័ណ្ឌ បានប្រកាសឱ្យដឹងថា ពួកគេទាំងពីរនាក់បងប្អូននឹងមិនអាចបន្តវត្តមានក្នុងសង្វៀនប្រដាល់ក្នុងរូបភាពជាប់លាប់ទៀតទេ បន្ទាប់ពីស្ថានភាពរស់នៅដ៏លំបាកតម្រូវឱ្យពួកគេត្រូវតែងាកមកគិតពីការរកប្រាក់សម្រាប់ផ្គត់ផ្គង់ជីវភាពដោយបង្ខំវិញហើយ ។
កីឡាករផល សុផាត ដែលអ្នកណាក៏ស្គាល់ថា ជាជើងខ្លាំងប្រចាំក្លិបកងរាជអាវុធហត្ថរាជធានីភ្នំពេញ បានប្រាប់កោះសន្តិភាពកាលពីពេលថ្មីៗថា អាជីពប្រដាល់របស់លោកប្រហែលជាអស់ឱកាសចេញមុខជាប់លាប់ទៀតហើយ បន្ទាប់ពីការប្រដាល់អស់ច្រើនឆ្នាំ គ្មានសល់អ្វីក្រៅពីកេរ្តិ៍ឈ្មោះដើម្បីដោះស្រាយជីវភាពបាន។ លោកអះអាងជាថ្មីថា បើកុំតែបានការងារជាអ្នករត់រ៉ឺម៉កម៉ូតូកង់បី ប្រហែលជាលោកនិងភរិយា នឹងត្រូវអត់បាយព្រោះតែការត្រាំត្រែងនៅក្នុងពិភពប្រដាល់នោះបាត់ទៅហើយ បើសំអាងទៅលើប្រាក់ដែលទទួលបានពីការឡើងរេញយកមកមើលខ្លួនសឹងមិនគ្រប់ផងនោះ ។ ក្នុងពេលឡើងរេញម្តងៗ លោកត្រូវចំណាយពេលយ៉ាងហោច៣ថ្ងៃមុនដើម្បីហ្វឹកហាត់ និងប្រមាណជា២ថ្ងៃទៀតដើម្បីសម្រាកមើលខ្លួន បន្ទាប់ពីឡើងប្រកួតរួច ។ អុីចឹងហើយទើបការទទួលផលពីការឡើងរេញមួយលើកៗ ហាក់មិនស៊ីសងនឹងអ្វីដែលលោកត្រូវបាត់បង់ព្រោះតែការទុកចោលនូវអាជីពរត់រ៉ឺម៉កនោះទេ ខណៈដែលការដឹកម៉ូយក្នុងថ្ងៃខ្លះទទួលបានប្រាក់ចំណូលច្រើន និងជួយឱ្យលោកមិនពិបាកឈឺខ្លួនដូចការប្រដាល់ផងនោះ ។ គាប់ជួនជារយៈកាលនេះមិនអាចឱ្យលោកមានពេលសម្រាកពេញភ្នែក ហូបចុកគ្រប់គ្រាន់ និងមិនមានឱកាសហ្វឹកហាត់ពេញលេញផង ទើបរឹតតែធ្វើឱ្យលោកបរាជ័យច្រើនជាងទទួលជោគជ័យ ដែលរុញឱ្យលោកកាន់តែអស់ចិត្តក្នុងការប្រឡូកនៅក្នុងអាជីពជាអ្នកប្រដាល់ ។
នេះមិនមែនជាការត្អូញត្អែររបស់កីឡាករតែម្នាក់នៅក្នុងពិភពប្រដាល់នោះទេ បុ៉ន្តែត្រូវគេឮស្ទើរតែគ្រប់កីឡាករដែលបានផ្ញើខ្លួននៅក្នុងវិស័យមួយនេះ ។ ផល សុផាត និយាយថា ការឡើងរេញរបស់លោកនាពេលក្រោយ គឺដើម្បីតែចង់បានប្រាក់ដុំដោះទាល់ក្នុងពេលរបររត់រ៉ឺម៉កម៉ូតូរកមិនបានបុ៉ណ្ណោះ ចំណែករឿងការប្រឡូកឱ្យបានជាប់លាប់ គឺមិនមាននោះទេ ។ ការសម្រេចចិត្តបែបនេះ លោកចាត់ទុកថា មិនខុសពីការលាឈប់ជាបណ្តើរៗនោះទេ បើទោះជាក្នុងពេលនេះក្រុមអ្នកស្នេហាវិស័យកីឡានៅតែឃើញមុខលោកម្តងម្កាលនៅលើរេញនោះក៏ដោយ ។ ទោះយ៉ាងណា ផល សុផាត អះអាងថា ជំហរនេះមិនមែនជាការចង់បានរបស់លោកនោះទេ បុ៉ន្តែមកពីការប្រដាល់មិនអាចឱ្យលោករស់បាន និងកាន់តែធ្វើឱ្យលោក និងគ្រួសារពិបាកផ្ញើខ្លួន ទើបត្រូវបង្ខំចិត្តងាកមកកាន់អាជីពជាអ្នករត់រ៉ឺម៉កម៉ូតូជាជំនួសវិញដើម្បីដោះស្រាយបញ្ហាក្រពះ ។ លោកនិយាយថា គ្មានអ្វីដែលប្រសើរសម្រាប់កីឡាករប្រដាល់នោះទេ បើការប្រឹងប្រែងចំពោះការងាររកប្រាក់ដែលជាអាជីពជាប់លាប់មិនអាចធ្វើបាន ។ ទាំងនេះហើយដែលធ្វើឱ្យកីឡាករនៅក្នុងប្រទេសកម្ពុជា បូករួមទាំងរូបលោកផង ត្រូវតែដកខ្លួនពីការប្រដាល់ ហើយមិនអាចឱ្យកីឡាករដែលមានសមត្ថភាព និងទេពកោសល្យឆ្ពោះទៅមុខបានយូរ ។
ដូចគ្នាដែរ កីឡាករ ផល សោភ័ណ្ឌ ដែលជាជើងខ្លាំងប្រចាំក្លិបតាឡីដំរីមានឫទ្ធិ និងជាប្អូនបង្កើតរបស់ ផល សុផាត ក៏ប្រកាសជំហរដកខ្លួនរហូតដល់៩៩អង្សារដូចគ្នាបែបនេះផងដែរ បើទោះជាមួយរយៈចុងក្រោយ ផល សោភ័ណ្ឌ បានបង្ហាញឱ្យមហាជនឃើញថា គេខ្លាំងក្លា និងមានឈ្មោះបោះសំឡេងនៅក្នុងសង្វៀនប្រដាល់។ គេបានសម្រេចចិត្តទៅធ្វើអ្នកបើករថយន្តឱ្យក្រុមហ៊ុនមួយ ដោយស្ទើរជារៀងរាល់ថ្ងៃ គេឃើញកីឡាកររូបនេះបានបណ្តែតខ្លួនក្នុងនាមជាអ្នកបើករថយន្តស៊ីប្រាក់ខែថៅកែរបស់ខ្លួន ដោយស្ទើរតែភ្លេចងាកក្រោយមកមើលការប្រដាល់ ដែលធ្លាប់ទទួលបានការគាំទ្រខ្ពស់ ។ ផល សោភ័ណ្ឌ ប្រាប់ថា ថៅកែរបស់ខ្លួនមិនបានហាមប្រាមលោកឡើងប្រដាល់នោះទេ បុ៉ន្តែមកពីលោកមិនចង់រំខានការងារ ដែលចេះតែសុំពេលហ្វឹកហាត់ និងសុំពេលសម្រាកព្យាបាល នាំឱ្យប៉ះទង្គិចដល់អារម្មណ៍របស់ចៅហ្វាយនាយខ្លួន ទើបលោកចេះតែខ្ជិលរវីរវល់ ។ កីឡាកររូបនេះប្រាប់ថា ការប្រដាល់នៅមិនទាន់សម្រេចចិត្តថាលាឈប់នោះទេ បុ៉ន្តែដើម្បីទទួលបានឱកាសការងារមួយជាក់លាក់ លោកក៏មិនអាចបោះបង់ចោល ហើយបន្តឈោងយកតំណែងជាកីឡាករប្រដាល់ដែលត្រូវប្រឈមនឹងសភាពបែកមុខបែកមាត់ ដែលនាំឱ្យថៅកែរបស់ខ្លួនមិនសប្បាយចិត្តនោះដែរ ។ ប្រមាណជា៣ខែហើយដែលលោកសម្រេចចិត្តបោះបង់ការប្រដាល់មកចាប់ការងារជាអ្នកបើករថយន្តឱ្យក្រុមហ៊ុនដែលមានប្រាក់ខែ ដែលលោកចាត់ទុកថាជាបង្អែកជាប់លាប់ ។
បើទោះជា ផល សោភ័ណ្ឌ មិនបញ្ជាក់ឱ្យច្បាស់ថា នឹងឈប់ប្រដាល់ បុ៉ន្តែស្ថានភាពរបស់គេត្រូវគេមើលឃើញថា កំពុងដើរតាមលំនាំរៀមច្បងមួយចំនួនដែលបានបោះបង់ និងបាត់មុខអស់មួយចំនួននោះដែរ ។ អុីចឹងហើយទើបក្រុមអ្នកគាំទ្រសោកស្តាយចំពោះភាពល្បីរបស់គេក្នុងពេលកំពុងក្តាប់ខ្សែក្រវាត់ស្រាបៀរកម្ពុជា កាលពីឆ្នាំ២០១៣ មួយផង ។ ផល សោភ័ណ្ឌ និយាយថា លោកប្រហែលជាត្រូវឡើងប្រដាល់តែក្នុងលក្ខខណ្ឌការពារខ្សែក្រវាត់ ឬការប្រដាល់សំខាន់ៗបុ៉ណ្ណោះ ខណៈដែលការបង្ហាញមុខរបស់លោកនៅក្នុងវេទិកានោះ ក៏មិនប្រាកដថាខ្លាំងដូចមុនក្នុងពេលដែលការហ្វឹកហាត់មានកម្រិតបែបនេះ។ តាមរយៈការអះអាងនេះមានន័យថា អ្នកគាំទ្រកីឡាប្រដាល់ ពិតជាលែងបានឃើញសន្ទុះខ្លាំងក្លារបស់កីឡាករពីរនាក់បងប្អូន គឺផល សុផាត និងផល សោភ័ណ្ឌ ដូចមុនទៀតហើយ ដោយសារតែផល សុផាត ងាកទៅស៊ប់តែនឹងរបររត់រ៉ឺម៉កម៉ូតូ ឯផល សោភ័ណ្ឌ ងាកទៅធ្វើជាអ្នកបើករថយន្តស៊ីប្រាក់ខែ ដែលមិនអាចឱ្យគេត្រាំខ្លួនតែក្នុងការហ្វឹកហាត់ឱ្យបានជាប់លាប់ដូចមុននោះ ។ កីឡាករទាំងពីរបញ្ជាក់ថា ការប្រដាល់របស់ខ្លួនទំនងមិនអាចនៅខ្លាំង និងមានកម្រិតខ្ពស់ដូចមុននោះទេ ក្នុងពេលដែលស្ថានភាពរស់នៅកាន់តែអាក្រក់ ដែលត្រូវតែបង្ខំឱ្យពួកគេងាកទៅគិតបញ្ហាក្រពះជាជំនួសវិញនោះ ។
ទោះបីយ៉ាងណា ផល សោភ័ណ្ឌ បានបញ្ជាក់ថា បើស្ថានភាពការងារធ្វើឱ្យលោកមានសម្ពាធមិនល្អវិញនោះការប្រដាល់ ក៏នឹងក្លាយជាជម្រើសដែលត្រូវប្រឹងប្រែងឡើងវិញដែរ ៕
ចែករំលែកព័តមាននេះ