រាជធានីភ្នំពេញ ៖ ការប្រកួតប្រដាល់វគ្គជម្រុះវិលជុំឈានទៅដណ្តើមខ្សែក្រវាត់ជើងឯកស្រាបៀរភ្នំពេញ ក្នុងប្រភេទទម្ងន់៥៤គីឡូក្រាមនៅលើសង្វៀនទូរទស្សន៍ CTN នាថ្ងៃព្រហស្បតិ៍ ទី១៣ មីនា ស្អែកនេះឈានចូលដល់សប្តាហ៍ទី៥ ហើយ។ កីឡាករដែលជាបេក្ខភាពឡើងប្រកួតនៅថ្ងៃនោះមាន ទឹម សុជាតិ មកពីក្លិបកងរាជអាវុធហត្ថរាជធានីភ្នំពេញ ត្រូវជួបជាមួយ កែវ សុផានិត មកពីក្លិបសំរោងកោងកីឡាខេត្តបាត់ដំបង ចំណែកឯ គឿម សុវណ្ណឌឿត មកពីក្លិបមោងឫស្សីមរតកគុនខ្មែរ ត្រូវជួបជាមួយ អាន មុន្នី មកពីក្លិបយុវជនកម្ពុជាខណ្ឌមានជ័យ ។
ក្នុងចំណោមកីឡាករទាំង៤រូបនេះមាន៣រូបកំពុងតែមានពិន្ទុប្រកៀកប្រកិតគ្នា គឺ ទឹម សុជាតិ, កែវ សុផានិត និងគឿម សុវណ្ណឌឿត ចំណែកឯ អាន មុន្នី ដែលមិនទាន់ស្គាល់ឈ្នះមួយប្រកួតសោះនោះ គឺមិនអាចប្រៀបផ្ទឹមជាមួយពួកគេបានឡើយ ។ ទឹម សុជាតិ និង កែវ សុផានិត ប្រកួតបាន២លើកម្នាក់រួចមកហើយ ក្នុងនោះឈ្នះម្តង និងចាញ់ម្តង មាន៤ពិន្ទុដូចគ្នា ។ ជួបគ្នាលើកនេះទាំងសងខាងសុទ្ធតែចង់ឈ្នះរៀងខ្លួនដើម្បីបង្កើនក្រេឌីត ពោលគឺពិន្ទុតែម្តង តែគេមិនដឹងថាជ័យជម្នះនឹងធ្លាក់ក្នុងកណ្តាប់ដៃកីឡាកររូបណាឡើយ ទាល់តែឆ្លងកាត់ការប្រកួតសិន ទើបអាចដឹងបាន ។ ម្យ៉ាងវិញទៀត ពួកគេទាំងពីរមិនធ្លាប់ប៉ះគ្នាពីមុនមកផង ទើបគេពិបាកវាយតម្លៃពីលទ្ធផលចុងក្រោយខ្លាំងណាស់ ។ គូនេះសុទ្ធតែធ្លាប់ចាញ់នៅក្រោមកណ្តាប់ដៃ គឿម សុវណ្ណឌឿត ដូចគ្នា ដូច្នេះបើសិនជាធ្វើការប្រៀបធៀបទៅលើល្បិចប្រយុទ្ធនៅលើសង្វៀន គឺមានភាពប្រហាក់ប្រហែលគ្នាអាចស៊ីសងគ្នាបាន ។ តាមការសង្កេត អ្នកទាំងពីរមិនសូវពូកែស្នៀតកែង និងជង្គង់ដូចគ្នា បុ៉ន្តែចលនានៃការវាយចេញរបស់ ទឹម សុជាតិ មានភាពរហ័សរហួនជាង គ្រាន់តែចិត្តរបស់គេរាងតូច មិនសូវសឿងដូចជា កែវ សុផានិត ។ សម្រាប់ទស្សនៈអ្នកធ្លាប់តាមដានការប្រកួតភាគច្រើនផ្តល់ការជឿជាក់លើពួកគេ៥០ភាគរយម្នាក់ ដូច្នេះមានតែរង់ចាំមើលការប្រកួតជាក់ស្តែងបុ៉ណ្ណោះ ។
គឿម សុវណ្ណឌឿត ជួប អាន មុន្នី លើកនេះ បើទោះជាគេមានពិន្ទុខ្ពស់ជាងមែន តែគេមិនហ៊ានអួតទុកមុនពីលទ្ធផលចាញ់-ឈ្នះនោះឡើយ ព្រោះចរិតរបស់គេមិនសូវចេះមើលស្រាលលើគូប្រកួតទេ ។ គឿម សុវណ្ណឌឿត ប្រកួតបាន២លើក ឈ្នះទាំង២លើក មាន៦ពិន្ទុ លើកនេះបើសិនគេឈ្នះទៀតនឹងអាចក្លាយជាអ្នកដែលមានពិន្ទុនាំមុខគេក្នុងតារាងជាបណ្តោះអាសន្ន ។ ចំណែកឯ អាន មុន្នី វិញ មើលទៅដូចជាពិបាកខ្លាំងណាស់ប្រកួតបាន២លើក ចាញ់ទាំង២លើក មានតែ២ពិន្ទុបុ៉ណ្ណោះ ហើយសម្រាប់ការមកជួប គឿម សុវណ្ណឌឿត លើកនេះទៀតនោះ ក៏គ្មានសង្ឃឹមថាអាចឈ្នះដែរ ព្រោះបើប្រៀបធៀបទៅលើល្បិចប្រយុទ្ធ និងកម្លាំង គឺចាញ់ប្រៀបគូប្រកួតដាច់តែម្តង ៕
ចែករំលែកព័តមាននេះ