កីឡាករលំដាប់កំពូលពិភពលោក រ៉ូជើ ហ្វេដឺរ័រ និងអ៊ែនឌី មូរ៉េ បានឆ្លងចូលដល់ជុំទី៤ ក្នុងព្រឹត្តិការណ៍វាយកូនបាល់ BNP Paribas Open ដែលត្រូវបានរៀបចំធ្វើក្នុងទីក្រុង Indian Wells រដ្ឋកាលីហ្វ័រញ៉ា សហរដ្ឋអាមេរិក កាលពីថ្ងៃចន្ទ ទី១០ ខែមីនាម្សិលមិញ ។
ហ្វេដឺរ័រ បានយកឈ្នះកីឡាកររុស្ស៊ី Dmitry Tusurnov ក្នុងលទ្ធផល៧-៦និង៧-៦ កែលម្អបាននូវឯតទគ្គកម្មប្រកួតក្នុងឆ្នាំថ្មីរបស់ខ្លួន ដែលបានចុះស្រអាប់កាលឆ្នាំកន្លងទៅ ។ ឆ្នាំទៅមិញ កីឡាករស្វ៊ីសរូបនេះយកឈ្នះពានជើងឯកបានតែមួយលើកប៉ុណ្ណោះ ។
យ៉ាងណាក៏ដោយ ឆ្នាំថ្មីនេះ ការប្រកួតរបស់គេហាក់បានល្អជាងឆ្នាំមុន។ ជាក់ស្តែង សប្តាហ៍កន្លងទៅ គេបានយកឈ្នះពាននៅក្រុងឌូបៃ បន្ទាប់ពីបានបំបាក់កីឡាករជើងខ្លាំង ស៊ែប៊ីណូវ៉ាក់ យ៉ូកូវិច ។ នៅក្របខ័ណ្ឌធំ Australian Open វិញ អតីតកីឡាករលំដាប់ទី១ ពិភពលោករូបនេះបានផ្តួលកីឡាករបារាំង Jo-Wilfried Tsonga និងកីឡាករអង់គ្លេសអ៊ែនឌី មូរ៉េ ប៉ុន្តែចាញ់ក្រោមថ្វីដៃកីឡាករអេស្ប៉ាញរ៉ាហ្វាអែល ណាដាល់ ។ គេបានថ្លែងថា ៖ «ខ្ញុំមានអារម្មណ៍ខុសប្លែកនៅឆ្នាំនេះ ។ ខ្ញុំគិតថា ពេលនេះខ្ញុំហាក់កំពុងស្ថិតក្នុងទីតាំងមួយត្រឹមត្រូវ ។ ទោះបីជាឈ្នះ៦ប្រកួតលើ៦ប្រកួតក្តី តែខ្ញុំនៅតែរក្សាភាពស្ងប់ស្ងាត់ ។នោះជាអ្វីដែលនាំឱ្យខ្ញុំមានទំនុកចិត្ត»។
ចំណែកមូរ៉េ បានយកឈ្នះកីឡាករឆែក Jiri Vesely ក្នុងលទ្ធផល៦-៧, ៦-៤ និង៦-៤ ។ នេះជាលើកទី១ ហើយដែលមូរ៉េ ជួបប្រកួតជាមួយ Vesely ដែលមានវ័យទើប២០ឆ្នាំ ។ អំឡុងការប្រកួតដែលប្រើពេលអស់ជិត៣ម៉ោង កីឡាករទាំង២នាក់បានធ្វើឱ្យមានកំហុស unfored errors ដល់ទៅ៩៩លើក ក្នុងនោះមូរ៉េគឺមានចំនួន៤៧លើក ។ មូរ៉េ បានថ្លែងថា ៖ «វាជាការប្រកួតដែលយើងទាំង២នាក់ធ្វើមិនបានល្អដូចគ្នា។ ទោះជាយ៉ាងណា ខ្ញុំមិនគិតថា កម្រិតនៃការលេងរបស់យើងទាំង២នាក់ខ្ពស់ប្រហាក់ប្រហែលគ្នានោះទេ។
ផ្ទុយពី ហ្វេដឺរ័រ និងមូរ៉េ នាងម៉ារីយ៉ា សារ៉ាប៉ូវ៉ា ដែលជាកីឡាការិនីការពារជើងឯកបានធ្លាក់ចេញពីការប្រកួតបន្ទាប់ពីបរាជ័យក្រោមថ្វីដៃកីឡាការិនីលំដាប់ទី៧៩ ពិភពលោកសញ្ជាតិអុីតាលី Camila Giorgi ក្នុងលទ្ធផល៦-៣, ៤-៦និង៧-៥ ។ នៅក្នុងការប្រកួត សារ៉ាប៉ូវ៉ា បានធ្វើឱ្យមានកំហុស unforced errors ដល់ទៅ៥៨លើកខណៈនាង Giorgi មានតែ៤៨លើក ។ បើគិតពីការប្រកួតនៅក្របខ័ណ្ឌធំ Wimbledon ឆ្នាំទៅមិញ នេះជាលើកទី១ ហើយដែលកីឡាការិនីរុស្ស៊ីរូបនេះបរាជ័យក្រោមថ្វីដៃកីឡាការិនីនៅក្រៅចំណាត់ថ្នាក់កំពូលទាំង៣០ក្នុងលោក ។ ទោះជាយ៉ាងណា សារ៉ាប៉ូវ៉ា ហាក់ដូចជាមិនអស់ចិត្តទាល់តែសោះចំពោះការបរាជ័យលើកនេះ ។
សម្រាប់នាង Giorgi វិញ វាជាលើកទី១ហើយដែលនាងមានសំណាងយកឈ្នះកីឡាការិនីលំដាប់កំពូលដូចជា សារ៉ាប៉ូវ៉ា ។ ចំណែកឯលទ្ធផលប្រកួតឯកត្តជនផ្នែកនារីផ្សេងទៀតមានដូចជា កីឡាការិនីលំដាប់ទី២ ពិភពលោកលីណាបំបាក់កីឡាការិនីឆែក Karolina Pliskova ក្នុងលទ្ធផល៦-៣ និង៦-៤។ ប្រវត្តិប្រកួតនៅទីនេះកន្លងមកជាពិសេស គឺ៦លើកចុងក្រោយ លីណា មិនធ្លាប់បានឆ្លងផុតវគ្គពាក់កណ្តាលផ្តាច់ព្រ័ត្រនោះទេ ៕
ចែករំលែកព័តមាននេះ