រាជធានីភ្នំពេញ ៖ ស្ត្រីម្នាក់ដែលបានចាកចេញពីស្រុកកំណើត បន្ទាប់ពីមានការលែងលះជាមួយប្តីហើយចូលមករាជធានីភ្នំពេញ និងដោយសារតែគ្មានមុខរបរពិតប្រាកដនោះ ធ្វើឱ្យស្ត្រីម្នាក់នេះក្លាយជាស្ត្រីរកសីុបម្រើផ្លូវភេទនៅលើដីក្រុង ប៉ុន្តែអ្វីដែលជាអកុសល ស្ត្រីម្នាក់នេះបានជួបជាមួយបុរសម្នាក់ដែលជាអ្នកជួញដូរថ្នាំញៀន រួមទាំងប្រើប្រាស់ថ្នាំញៀនថែមទៀតផង ។
ទីបំផុតធ្វើឱ្យស្ត្រីម្នាក់នេះរងគ្រោះដោយថ្នាំញៀន ដោយសារប្រុសស្នេហ៍បង្ខំឱ្យប្រើប្រាស់ថ្នាំញៀនជាមួយគ្នា ហើយក៏ត្រូវបានប៉ូលិសចាប់ខ្លួន កាលពីរសៀលថ្ងៃទី៩ មីនា នៅក្នុងផ្ទះជួលមួយកន្លែង ស្ថិតនៅក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ។
នៅក្នុងបន្ទប់សាកសួររបស់ប៉ូលិស នាង កែវ ស្រីល័ក្ខ អាយុ២៦ឆ្នាំ មានស្រុកកំណើតនៅស្រុករមាសហែក ខេត្តស្វាយរៀង បានរៀបរាប់ទាំងមុខមាត់ស្លេកស្លាំង និងស្រក់ទឹកភ្នែកថា ក្រោយពីលែងលះជាមួយប្តីនៅឯស្រុកកំណើតគឺបានបន្សល់ទុកកូនស្រីមួយមានអាយុ៨ឆ្នាំ ហើយនិងបានផ្ញើកូនស្រីនៅជាមួយម្តាយ ។ បន្ទាប់មកនាងបានចាកចេញពីស្រុកកំណើតមករកការងារធ្វើនៅក្នុងរាជធានីភ្នំពេញ ។
ស្ត្រីរូបនេះបន្តថា មកដល់រាជធានីភ្នំពេញ ដំបូងនាងបានធ្វើជាកម្មការិនីរោងចក្រមួយនៅម្តុំផ្លូវវេងស្រេងអស់ជាច្រើនខែ ប៉ុន្តែដោយសារតែប្រាក់កម្រៃជាកម្មការិនីមិនសូវជាគ្រប់គ្រាន់ ណាមួយមិត្តភក្តិម្នាក់បានអូសទាញនាងថា ទៅរកស៊ីជាមួយគេអាចរកលុយបានដោយងាយស្រួលនោះ ទើបនាងទៅជាមួយ ។ ទីបំផុតគឺទៅរកស៊ីបោយដៃបម្រើផ្លូវភេទនៅតាមសួនច្បារម្តុំមុខរ៉ា (សួនច្បារផ្សារចាស់) តែម្តង ។
ស្ត្រីដែលខកខ្លួនបានស្រក់ទឹកភ្នែក និងនិយាយទាំងអួលដើមកថា ក្នុងរយៈពេលមួយខែមកនេះ នាងបានត្រូវបុរសម្នាក់ឈ្មោះ ល័ក្ខ យកនាងទៅដេកជាមួយដោយមួយយប់ឱ្យតម្លៃ២០ដុល្លារ ជារៀងរាល់ថ្ងៃ ។ ប៉ុន្តែពេលដេកនៅជាមួយគ្នាយូរៗទៅក៏ក្លាយជាគូសង្សារនឹងគ្នាក៏បានជួលបន្ទប់នៅជាមួយគ្នាក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ នេះតែម្តង ។
ប៉ុន្តែអ្វីដែលនាងនឹកស្មានមិនដល់ ស្រាប់តែនៅរសៀលថ្ងៃទី៩ ខែមីនា ប៉ូលិសបានចុះទៅចាប់នាងនៅក្នុងបន្ទប់ផ្ទះជួល ដោយជាប់ពាក់ព័ន្ធជាមួយនឹងថ្នាំញៀនទៅវិញ ។ ជាមួយគ្នានោះប្រុសស្នេហ៍របស់នាង បានរត់គេចខ្លួនភ្លាមៗពេលដែលប៉ូលិសចុះទៅដល់ ។
នាងបានបញ្ជាក់ទៀតថា ពេលរស់នៅជាមួយបុរសគូស្នេហ៍ឈ្មោះល័ក្ខនេះ តែងតែបង្ខំនាងឱ្យប្រើប្រាស់ថ្នាំញៀនជាមួយគេជារៀងរាល់ថ្ងៃថែមទៀត ។ ប៉ូលិសកំពុងតែសាកសួរនាង និងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការទៅតាមផ្លូវច្បាប់ ។
នេះជាជីវិតពិតរបស់ស្ត្រីម្នាក់ដែលដើរខុសផ្លូវទាំងស្រុង បន្ទាប់ពីការលែងលះប្តីនៅឯស្រុកកំណើត ។ សូមឱ្យជីវិតនារីខ្មែរឯទៀតៗកុំជួបរឿងរ៉ាវបែបនេះ ៕
ចែករំលែកព័តមាននេះ