រាជធានីភ្នំពេញ ៖ រថយន្តស៊េរីទំនើបមួយគ្រឿងម៉ាកតូយ៉ូតាកាមរីហាយប្រ៊ីដ ស៊េរីឆ្នាំ២០០៧ ពណ៌ទឹកមាស ពាក់ស្លាកលេខន.ប១៦៣៧ ដែលមានម្ចាស់ឈ្មោះជា ដែន ភេទប្រុស អាយុ៣១ឆ្នាំ មានទីលំនៅក្នុងសង្កាត់អូឡាំពិក បានបាត់នៅពេលដែលបើកយកមកលាងនៅកន្លែងលាងរថយន្តពេញចិត្ត ។ បន្ទាប់ពីបានប្រគល់សោឱ្យទៅខាងកន្លែងលាងបើករថយន្តយកទៅលាងរួចហើយម្ចាស់ក៏នាំគ្នាដើរទៅម៉ាស្សាបាត់ទៅ ។ ករណីបាត់រថយន្តនេះបានធ្វើឱ្យមានការភ្ញាក់ផ្អើលកាលពីវេលាម៉ោង៣និង៤០នាទីរសៀលថ្ងៃទី៩ មីនា នៅក្នុងកន្លែងលាងរថយន្តយីហោ« ពេញចិត្ត»ស្ថិតនៅតាមបណ្ដោយផ្លូវលេខ១៧៣ ក្នុងសង្កាត់ទួលស្វាយព្រៃទី១ ខណ្ឌចំការមន ។ គេមិនដឹងថា រថយន្តពាក់ស្លាកលេខន.បនោះ ជារថយន្តរបស់ក្រសួងមហាផ្ទៃឬរថយន្តផ្ទាល់ខ្លួនបែបណានោះទេ ។
តាមសម្ដីម្ចាស់រថយន្តដែលបាត់បានប្រាប់ថា ពួកគាត់មានគ្នា២នាក់បានយករថយន្តមកចូលលាងនៅកន្លែងលាងរថយន្តខាងលើកាលពីវេលាម៉ោង៣រសៀលនិងបានប្រគល់សោឱ្យកម្មករលាងរថយន្តផងដែរ រួចហើយក៏នាំគ្នាដើរទៅម៉ាស្សាបាតជើងដែលនៅក្បែរនោះ ។ លុះប្រហែលជា៤០នាទីក្រោយមកគ្នារបស់គាត់ម្នាក់បានចេញមកមុនហើយសួរពីរថយន្តដែលលាងរួចរាល់ឬនៅ ?ក៏ត្រូវបានអ្នកដែលយកសោប្រាប់ថា រថយន្តលាងរួចហើយនិងត្រូវបានគ្នារបស់លោកយកទៅបាត់ហើយ ។
នៅពេលឮថា មានអ្នកមកយករថយន្តទៅបាត់ហើយក៏កើតមានការភ្ញាក់ផ្អើលឆោឡោឡើង និងបានប្ដឹងទៅនគរបាលមូលដ្ឋានឱ្យជួយរកភ្លាមៗផងដែរ ។
បន្ទាប់ពីមានការឆោឡោបាត់រថយន្តនៅកន្លែងលាងរថយន្តនោះទាំងម្ចាស់រថយន្តនិងម្ចាស់កន្លែងលាងត្រូវបាននគរបាលហៅទៅសាកសួរនិងធ្វើកំណត់ហេតុផងដែរ និងមិនដឹងថា មានការដោះស្រាយបែបណានោះទេ ។ កន្លែងលាងរថយន្តយីហោ«ពេញចិត្ត»ត្រូវបានអ្នកមានរថយន្តយកទៅលាងនៅទីនោះសរសើរថា លាងស្អាតគួរឱ្យទុកចិត្តទាំងជើងក្រោមទាំងក្នុងរថយន្ត ទោះបីថ្លៃបន្តិចក្ដីនិងមិននឹកស្មានថាមានការឆកល្វែងបែបនោះទេ ។ ចំណែករថយន្តដែលបាត់នោះពាក់ស្លាកលេខន.ប របស់អង្គភាពក្រសួងមហាផ្ទៃ បើជាស្លាកលេខត្រឹមត្រូវរបស់ក្រសួងនឹងអាចមានសង្ឃឹមខ្លះ តែបើជាស្លាកលេខប្រើបែបសេះហោះទេនោះប្រហែលជារកមិនឃើញឡើយ ។ ចំពោះចោរដែលបន្លំយករថយន្តនេះមិនដឹងថា បានតាមដានម្ចាស់រថយន្តនេះតាំងពីពេលណាមកទេ ទើបទីបំផុតបន្លំយករថយន្តបាន ។ មិនអាចស្វែងរកការបំភ្លឺណាមួយពីម្ចាស់រថយន្តនិងម្ចាស់កន្លែងលាងរថយន្តនោះបានទេនារសៀលថ្ងៃទី៩ មីនា នោះ៕
ចែករំលែកព័តមាននេះ