ខេត្តបាត់ដំបង ៖ គេកំពុងសង្ស័យថា រថយន្តបាកុងដឹកឈើ(អារ៉េវ)រាប់សិបគ្រឿងរបស់ក្រុមហ៊ុនមួយ ដែលតែងតែកាប់បំផ្លាញព្រៃឈើ នៅក្នុងស្រុកសំឡូតនាពេលកន្លងមក កំពុងសម្ងំលាក់ខ្លួនយ៉ាងសុខសាន្តនៅក្នុងព្រៃនៃភូមិសាស្ត្រនានាក្នុងស្រុកនេះនៅឡើយ ខណៈការចុះបង្ក្រាប ឬការចុះស្រាវជ្រាវស្វែងរកបទល្មើសព្រៃឈើ និងវត្ថុតាងប្រព្រឹត្តបទល្មើសទាំងនេះពីសំណាក់អាជ្ញាធរឬសមត្ថកិច្ចពាក់ព័ន្ធ…
ខេត្តបាត់ដំបង ៖ គេកំពុងសង្ស័យថា រថយន្តបាកុងដឹកឈើ(អារ៉េវ)រាប់សិបគ្រឿងរបស់ក្រុមហ៊ុនមួយ ដែលតែងតែកាប់បំផ្លាញព្រៃឈើ នៅក្នុងស្រុកសំឡូតនាពេលកន្លងមក កំពុងសម្ងំលាក់ខ្លួនយ៉ាងសុខសាន្តនៅក្នុងព្រៃនៃភូមិសាស្ត្រនានាក្នុងស្រុកនេះនៅឡើយ ខណៈការចុះបង្ក្រាប ឬការចុះស្រាវជ្រាវស្វែងរកបទល្មើសព្រៃឈើ និងវត្ថុតាងប្រព្រឹត្តបទល្មើសទាំងនេះពីសំណាក់អាជ្ញាធរឬសមត្ថកិច្ចពាក់ព័ន្ធ ហាក់មិនកម្រើកក្នុងស្ថានភាពស្ងាត់ឈឹងដូចចោរលួចសេះ ។
ប្រភពព័ត៌មាននានាពីអ្នកស្រុកសំឡូតបានទម្លាយប្រាប់កោះសន្តិភាព កាលពីចុងសប្ដាហ៍មុននេះថា គេបានប្រទះឃើញរថយន្តបាកុងដឹកឈើរាប់សិបគ្រឿងកំពុងសម្ងំលាក់ខ្លួនពួនអាត្មានៅក្នុងព្រៃជ្រៅនៅតំបន់«ថ្មបាំងឬតំបន់ភ្នំសំកុស ឬនៅតាមតំបន់ព្រៃដទៃទៀត» ក្នុងភូមិសាស្ត្រនានានៃទឹកដីឃុំតាតោក ស្រុកសំឡូត ។ ប្រភពនេះបានប្រាប់ថា រថយន្តទាំងនោះភាគច្រើនជារថយន្តដឹកឈើរបស់ក្រុមហ៊ុន រ័ត្ន សម្បត្តិ ដែលមានទីតាំងនៅក្នុងភូមិអូរក្រូច ឃុំតាតោក ស្រុកសំឡូត ។
គេនិយាយថា ពេលខ្លះគេក៏ធ្លាប់ប្រទះឃើញរថយន្តប្រភេទនេះរាប់សិបគ្រឿងទៀត ត្រូវបានគេបញ្ជូនពីតំបន់ដទៃទៀត ចូលមកសម្ងំលាក់ខ្លួន នៅក្នុងភូមិសាស្ត្រនានានៃស្រុកសំឡូតនេះដែរដែលភាគច្រើនធ្វើសកម្មភាពនៅពេលយប់ ។ រថយន្តបាកុងទាំងនោះ ទំនងពួកប្រព្រឹត្តបទ ល្មើសព្រៃឈើបញ្ជូនមកពីតំបន់ស្រុកវាលវែង ខេត្តពោធិ៍សាត់ ឆ្លងព្រំប្រទល់ខេត្តទាំង២ ឆ្ពោះចូលមកកាន់ស្រុកសំឡូត ដើម្បីរត់គេចពីការតាម ចាប់របស់សមត្ថកិច្ច ។
គេក៏មិនធ្លាប់ឃើញអាជ្ញាធរ ឬមន្ត្រីព្រៃឈើ ឬស្ថាប័នពាក់ព័ន្ធណាមួយនៅក្នុងស្រុកសំឡូត ឬកម្លាំងមកពីខេត្ត ចុះបង្ក្រាបឬស្រាវជ្រាវស្វែងរករថយន្តបាកុង ឬវត្ថុតាងប្រព្រឹត្តបទល្មើសព្រៃឈើទាំងនេះនៅឡើយទេ រហូតមកដល់បច្ចុប្បន្ន ដែលធ្វើឲ្យស្រុកនេះកំពុងក្លាយជាជម្រកដ៏សុខសាន្តនៃការលាក់បាំងវត្ថុតាងបទល្មើសព្រៃឈើ ។ ពោលគឺស្ងាត់ច្រៀបតែម្ដង ខណៈការបង្ក្រាបកំពុងកក្រើកខ្លាំង នៅតាមបណ្ដាខេត្តភាគឦសាននៃប្រទេស ។
អ្នកស្រុកសំឡូតបានបង្ហើបឲ្យដឹងថា បើតាមការតាមដានសកម្មភាពកាប់បំផ្លាញព្រៃឈើ និងការដឹកជញ្ជូនឈើនានារបស់ក្រុមហ៊ុននេះ ហាក់ទើបមានការស្ងប់ស្ងាត់មួយរយៈខ្លីកន្លងទៅនេះទេ ។ ប៉ុន្តែសម្ភារគ្រឿងយន្ត ឬរណារយន្ត សម្រាប់អារច្រៀក ឬកាប់បំផ្លាញព្រៃឈើ និងរថយន្តដឹកជញ្ជូនឈើរាប់សិបគ្រឿង ហាក់មិនទាន់ឃើញមានសកម្មភាពដឹកជញ្ចូនចេញពីទឹកដី ស្រុកសំឡូតនៅឡើយ តែអាចបញ្ជូនចេញពីទីតាំងក្រុមហ៊ុនយកទៅលាក់ទុកនៅក្នុងព្រៃជ្រៅ តាមតំបន់ភ្នំនានាក្នុងស្រុកនេះ ។
កោះសន្តិភាព មិនអាចស្វែងរកប្រភពណាមួយពីក្រុមហ៊ុន រ័ត្ន សម្បត្តិ ដែលទទួលបានសិទ្ធិវិនិយោគឬសិទ្ធិគ្រប់គ្រងដីព្រៃសម្បទានរាប់ពាន់ហិកតានៅតំបន់នោះ ដើម្បីបំភ្លឺបានទេនៅព្រឹកថ្ងៃទី៣០ ខែសីហា ជុំវិញព័ត៌មាននានា ដែលអ្នកស្រុកសំឡូតបានទម្លាយកាលពីសប្ដាហ៍មុន ។ប៉ុន្តែជុំវិញការលើកឡើងអំពីការពួនសម្ងំនៃរថយន្តបាកុងដឹកឈើរាប់សិបគ្រឿងនៅពាសពេញ ទឹកដីស្រុកសំឡូតនេះ ត្រូវបានមន្ត្រីព្រៃឈើប្រចាំស្រុកសំឡូតបដិសេធ និងច្រានចោលយ៉ាងដាច់អហង្កាថា «គ្មានទេ» ។
នាយសង្កាត់រដ្ឋបាលព្រៃឈើស្រុកសំឡូត លោក ឆាយ ណារ៉េត បានថ្លែងប្រាប់កោះសន្តិភាពតាមទូរស័ព្ទនាព្រឹកថ្ងៃទី៣០ ខែសីហាថា «គ្មានការលាក់បាំងរថយន្តដឹកឈើ ឬវត្ថុតាងបទល្មើសព្រៃឈើនៅក្នុងស្រុកសំឡូតទេ»។លោកបានប្រាប់ថា ក្រុមហ៊ុន រ័ត្ន សម្បត្តិ បានផ្អាកសកម្មភាពដឹកជញ្ជូនឈើនេះហើយ ។ ពេល
នេះ ក្រុមហ៊ុនក៏បានដឹកជញ្ជូនសម្ភារនានា ឬរថយន្តដឹកជញ្ជូនចេញពីក្រុមហ៊ុនអស់ហើយដែរមិនមាននៅសេសសសល់អ្វីទេ ។
ឆ្លើយនឹងសំណួរដែលអ្នកស្រុកអះអាងថា គេបានប្រទះឃើញរថយន្តបាកុង ឬសម្ភារប្រព្រឹត្តបទល្មើសព្រៃឈើរបស់ក្រុមហ៊ុននេះ ត្រូវបានគេបញ្ជូនទៅលាក់នៅតាមព្រៃ តើរឿងនេះពិតឬយ៉ាងណាដែរ ? លោកនាយសង្កាត់រដ្ឋបាលព្រៃឈើរូបនេះបានបញ្ជាក់ភ្លាមៗថា «គ្មានទេ…កុំទៅជឿនោះ…គេដឹកចេញអស់ហើយ» ។ លោក ឆាយ ណារ៉េត បាននិយាយយ៉ាងដូច្នេះថា « ខ្ញុំមិនជឿថា មានរថយន្តដឹកឈើ ឬ
វត្ថុតាងនានាត្រូវបានគេលាក់នៅក្នុងព្រៃទេ ។
ក្រុមហ៊ុនបានដឹកជញ្ជូនចេញពីទីតាំងអស់ហើយ។ប៉ុន្តែបើប្រជាពលរដ្ឋណាបានឃើញរថយន្តដឹកឈើ ឬវត្ថុតាងបទល្មើសមានលាក់នៅក្នុងព្រៃកន្លែងណា សូមឲ្យជូនខ្ញុំទៅមើល ហើយខ្ញុំចាយលុយ…ខ្ញុំមិនជឿទេ» ។ លោក ឆាយ ណារ៉េត ក៏បានបញ្ជាក់ដែរថា ពេលនេះក្រុមហ៊ុនបានបិទទ្វារហើយ មានតែកម្មករប៉ុន្មាននាក់ប៉ុណ្ណោះ ដែលនៅយាមទីតាំង ។ ដូច្នេះ គ្មានសកម្មភាពដឹកជញ្ជូនឈើទៀតទេ សម្រាកអស់ហើយ ។
បើតាមការពិនិត្យជាក់ស្ដែងនាពេលនេះ ទីតាំងក្រុមហ៊ុន រ័ត្ន សម្បត្តិ ហាក់ស្ថិតក្នុងសភាពស្ងាត់ជ្រងំ តែគ្រប់ច្រកចេញចូលត្រូវបានបិទបារ៉ាស់ជាប់ ហើយច្រកខ្លះមានកម្មករយាម រីឯ ច្រកខ្លះគ្មានទេ ។ ប៉ុន្តែអ្នកស្រុកនៅតំបន់នោះនិយាយថា ភាពស្ងាប់ស្ងាត់មិនមែនទើបកើតមាននៅពេលនេះទេ គឺកើតមានរាប់ឆ្នាំមកហើយ ។ អ្នកភូមិនិយាយទៀតថា កន្លងមកក្រុមហ៊ុននេះតែមានសកម្មភាពដឹកជញ្ជូនឈើយ៉ាងគគ្រឹក
គ្រេងនៅពេលយប់ រីឯពេលថ្ងៃស្ងាត់ដូចចោរលួចសេះ។
ដោយឡែក អ្នកយាមកុងត្រូលវិញមានតែមន្ត្រីយោធា តែមិនអនុញ្ញាតឲ្យមនុស្សដែលគ្មានប្រវត្តិច្បាស់លាស់ចេញចូលសេរីឡើយ។ ប៉ុន្តែពេលនេះបាត់មុខយោធាពីតាមកុងត្រូលចូលក្រុមហ៊ុនអស់ហើយ មានតែកម្មករម្ដងឃើញម្ដងបាត់ ។ យ៉ាងណាក៏ដោយ គេនៅតែសង្ស័យថា ក្រុមហ៊ុននេះទំនងនៅតែអាចឆ្មក់លួចដឹកឈើចេញលួចលាក់ម្ដងម្កាល នៅពេលស្ថានភាពស្ងប់ស្ងាត់ ។
ពាក់ព័ន្ធនឹងការចុះស្វែងរកវត្ថុតាងបទល្មើសព្រៃឈើរបស់ក្រុមហ៊ុនខាងលើ និងវត្ថុតាង រថយន្តបាកុងដឹកឈើនានា ដែលគេសង្ស័យថាបានបញ្ជូនពីខេត្តពោធិ៍សាត់យកមកលាក់ទុកនៅក្នុងភូមិសាស្ត្រនានា ក្នុងស្រុកសំឡូតនេះ បើតាមប្រភពព័ត៌មានឲ្យដឹងថា ពេលនេះក្រុមបង្ក្រាបបទល្មើសព្រៃឈើទូទាំងប្រទេសដែលដឹកនាំដោយកម្លាំងកងរាជអាវុធហត្ថលើផ្ទៃប្រទេស កំពុងត្រៀមចុះស្វែងរុករកវត្ថុតាងបទល្មើសព្រៃឈើ ដែលកំពុងសម្ងំលាក់ខ្លួនពួនអាត្មានៅក្នុងស្រុកសំឡូតនេះហើយ ។
ព័ត៌មានដែលគួរឲ្យទុកចិត្តនេះបានបញ្ជាក់ថា កម្លាំងបង្ក្រាបនឹងប្រើធម៌ក្ដៅតែម្ដង ដោយមិនលើកលែងចំពោះជនប្រព្រឹត្តឡើយ ប្រសិនបើរកឃើញថាមានជាប់ពាក់ព័ន្ធនឹងបទល្មើសព្រៃឈើ ឬពាក់ព័ន្ធនឹងការលាក់បំពួនជនប្រព្រឹត្ត និងវត្ថុតាងបទល្មើសព្រៃឈើ ។ ប៉ុន្តែយ៉ាងណាក៏ដោយ មហាជននៅតែជឿថា វត្ថុតាងប្រព្រឹត្តបទល្មើសព្រៃឈើគ្រប់ប្រភេទ អាចនឹងត្រូវគេលាក់បាំងនៅក្នុងភូមិសាស្ត្រនានានៃស្រុកសំឡូតនេះនៅឡើយ ពីព្រោះគេមិនដែលឃើញក្រុមហ៊ុននេះ ធ្វើសកម្មភាពដឹកជញ្ជូនសម្ភារនានា ឬរថយន្តបាកុងចេញពីស្រុកនេះម្ដងណាទេ ៕ (សម្រួលដោយ៖ ស្រីណា)
ចែករំលែកព័តមាននេះ