ប្រទេសកូឡុំប៊ី ៖ បណ្ដាអតីតប្រមុខពួកឧទ្ទាមនៃកងកម្លាំងបដិវត្តន៍កូឡុំប៊ីFARC ដែលស្ថិតនៅក្រៅដំណើរការសន្តិភាពនៅកូឡុំប៊ី កាលពីថ្ងៃទី២៩សីហាបានលេចមុខជាថ្មី ក្នុងវីដេអូមួយដោយដៃកាន់កាំភ្លើង ហើយប្រកាស ពីការតស៊ូដោយអាវុធឡើងវិញ និងបរិហារអំពើក្បត់របស់រដ្ឋចំំពោះកិច្ចព្រមព្រៀងសន្តិភាពឆ្នាំ២០១៦។
ក្នុងវីដេអូរយៈពេល៣២នាទីមួយ ផ្សាយតាមYOUTUBE អតីតជនទី២របស់ពួកឧទ្ទាមFARC លោកIVAN MARQUEZអះអាងថា យើងសូមប្រកាសប្រាប់ពិភពលោកថា យើងចាប់ផ្ដើមការតស៊ូលើកទី២ ក្នុងនាមនៃសិទ្ធិជាសកលរបស់ប្រជាជន ហើយលើកអាវុធតតាំងជាមួយការជិះជាន់សង្កត់សង្កិន។
ប្រធានាធិបតីកូឡុំប៊ីលោកIVAN DUQUE ដែលប៉ុនប៉ងកែប្រែកិច្ចព្រមព្រៀងសន្តិភាពដែលលោកយល់ថា ទន់ភ្លន់ជ្រុលពេកចំំពោះពួកឧទ្ទាមនោះ មានប្រតិកម្មតបដោយប្រកាសពីការវាយលុកមួយ ប្រឆាំងនឹងអ្វីដែលលោកហៅថា ពួកបនជួញដូរគ្រឿងញៀននិងភេរវកម្ម ជួយទ្រទ្រង់ដោយជនផ្ដាច់ការវេណេស៊ុយអេឡាលោកនីកូឡាស់ម៉ាឌូរ៉ូ។
លោកថា លោកបានបញ្ចាឲ្យបង្កើតកងឯកភាពពិសេសមួយ ដើម្បីដេញតាមកម្ចាត់ពួកឧក្រិដ្ឋជនទាំងនោះ។ លោកសន្យាផ្ដល់រង្វាន់៨៨០.០០០ដុល្លារ សម្រាប់ការចាប់ខ្លួនមេដឹកនាំឧទ្ទាមម្នាក់ៗ ដែលបង្ហាញមុខក្នុងវីដេអូនេះ៕ (កែសម្រួលដោយ ៖ បុប្ផា)
ចែករំលែកព័តមាននេះ