រាជធានីភ្នំពេញ ៖ ការប្រកួតលើកទី៣ រវាងកីឡាករជើងខ្លាំងពីររូប គឺកីឡាករនូវ ស៊ីថា មកពីក្លិបតាឡីដំរីមានឫទ្ធិ និងកីឡាករថៃ ប៊ុនហាន មកពីក្លិបបូរីនាគរាជ បានធ្វើឱ្យលេចឡើងនូវលទ្ធផលដូចដើមដដែល គឺ នូវ ស៊ីថា បានក្លាយជាអ្នកសន្លប់ជាថ្មីម្តងទៀត ។ លទ្ធផលនេះបង្ហាញយ៉ាងច្បាស់ថា កីឡាករដែលធ្លាប់បានឈ្នះនៅតែរក្សាក្រេឌីតដូចដើម រីឯកីឡាករដែលធ្លាប់បរាជ័យ នៅតែគ្មានឱកាសសងសឹក ។
រាជធានីភ្នំពេញ ៖ ការប្រកួតលើកទី៣ រវាងកីឡាករជើងខ្លាំងពីររូប គឺកីឡាករនូវ ស៊ីថា មកពីក្លិបតាឡីដំរីមានឫទ្ធិ និងកីឡាករថៃ ប៊ុនហាន មកពីក្លិបបូរីនាគរាជ បានធ្វើឱ្យលេចឡើងនូវលទ្ធផលដូចដើមដដែល គឺ នូវ ស៊ីថា បានក្លាយជាអ្នកសន្លប់ជាថ្មីម្តងទៀត ។ លទ្ធផលនេះបង្ហាញយ៉ាងច្បាស់ថា កីឡាករដែលធ្លាប់បានឈ្នះនៅតែរក្សាក្រេឌីតដូចដើម រីឯកីឡាករដែលធ្លាប់បរាជ័យ នៅតែគ្មានឱកាសសងសឹក ។
ការប្រកួតប្រដាល់នៅលើសង្វៀនទូរទស្សន៍បាយ័នបឹងស្នោ កាលពីថ្ងៃអាទិត្យ ទី៩ មីនា ម្សិលម៉្ងៃ បានធ្វើឱ្យមានការចាប់អារម្មណ៍ទៀតហើយ រវាងកីឡាករនូវ ស៊ីថា និងកីឡាករថៃ ប៊ុនហាន ដែលត្រូវគេឱ្យប៉ះគ្នាក្នុងជំនួបលើកទី៣ ដែលជាជំនួបសងសឹក ។ ក្នុងការប្រកួតមួយនេះ កីឡាករបង្គោលក្រហម នូវ ស៊ីថា ដែលធ្លាប់សន្លប់ក្រោមដៃបង្គោលខៀវម្តង និងធ្លាប់បានឈ្នះពិន្ទុម្តង បានប្រឹងប្រែងវាយសម្រុកតាំងពីដើមទីតែម្តង ដើម្បីសងសឹកលើកីឡាករថៃ ប៊ុនហាន ដែលធ្លាប់ធ្វើឱ្យគេបាក់មុខ ។ ជាក់ស្តែង នៅក្នុងទឹកទី២ និងទី៣ គេឃើញកីឡាករបង្គោលក្រហមរូបនេះកាន់តែស្ទុះខ្លាំងជាងមុនក្នុងការវាយកែង ម៉ាត់កណ្តាលទ្រូង និងធាក់ចេញ ដើម្បីប្រទាញយកពិន្ទុ ។ បុ៉ន្តែកម្រិតនៃការវាយចេញរបស់គេ ហាក់មិនសូវមានសំណាងដូចបំណងនោះទេ ដោយសារតែគេចាញ់ប្រៀបទាំងកម្ពស់ ទាំងប្រវែងដៃជើង បើធៀបនឹងកីឡាករថៃ ប៊ុនហាន ដែលមានកម្ពស់ល្អជាង ។ បើធៀបនឹងកម្រិតវាយលុករវាងកីឡាករទាំងពីរ គេកត់សម្គាល់ថា កីឡាករនូវ ស៊ីថា ល្អជាងទាំងដៃទាំងជើង និងម៉ាត់ ។ ក្នុងនោះសូម្បីតែភាពរហ័សរហួន ក៏កីឡាករបង្គោលក្រហមរូបនេះមានសន្ទុះល្អជាងគួរឱ្យសរសើរផងដែរ គ្រប់ពេលវាយលុក ។
បុ៉ន្តែគួរឱ្យស្តាយ កីឡាករនូវ ស៊ីថា មានមាឌល្អិត ទាប និងមានដៃជើងចាញ់ប្រៀប ទើបធ្វើការវាយចេញត្រូវគេមើលឃើញថា ផុតលើផុតក្រោម ដែលផ្ទុយពីកីឡាករថៃ ប៊ុនហាន ដែលវាយចេញមិនសូវល្អ បុ៉ន្តែបានកម្ពស់ និងប្រវែងដៃជើងវែងយោង ទើបធ្វើឱ្យលទ្ធផលនៃការប្រកួតទទួលផ្លែផ្កាល្អជាង ។ ប្រសិនបើកីឡាករទាំងពីរមានកម្ពស់ប្រហែលគ្នា និងមានដៃជើងប្រវែងគ្នា កីឡាករថៃ ប៊ុនហាន បង្គោលខៀវ ពិតជាស្ទុះមិនរួចនោះឡើយ ជាមួយនឹងការវាយចេញរបស់កីឡាករនូវ ស៊ីថា ដែលធ្វើបានល្អស្ទើរតែគ្រប់ជ្រុងជ្រោយ បើទោះជាភាគច្រើនគេវាយត្រូវតែខ្យល់ ព្រោះថៃ ប៊ុនហាន អំណោយផលល្អជាងទាំងផ្នែកកម្ពស់ និងដៃជើងនោះក៏ដោយ ។ ឈានដល់ទឹកទី៣ កីឡាករនូវ ស៊ីថា បង្គោលក្រហមនៅតែបន្តស្ទុះវាយលុកទៅលើបង្គោលខៀវដូចអំឡុងដើមទីដដែល ដោយគ្រាន់តែការហុចផលពីការប្រឹងប្រែងទាំងនេះ បែរជាទទួលលទ្ធផលអវិជ្ជមានមិនគួរឱ្យជឿទៅវិញ ។ កីឡាករថៃ ប៊ុនហាន ដែលប្រើតែស្នៀតវាយបក និងទប់ក្លេ បានប្តូរយុទ្ធសាស្ត្រធ្វើការវាយលុកទៅលើកីឡាករនូវ ស៊ីថា ទៅវិញ ។ អុីចឹងហើយទើបកីឡាករនូវ ស៊ីថា បង្គោលក្រហមបានទទួលកណ្តាប់ដៃម៉ាត់ចំពេញទំហឹង ហើយឈានដល់សភាពសន្លប់ភ្លឹងលើរេញ រហូតដល់មិនអាចងើបខ្លួនរួច ។ ការប្រកួតរវាងគូនេះបានធ្វើឱ្យអ្នកទស្សនាផ្តល់សំឡេងហ៊ោកញ្ជ្រៀវយ៉ាងកងរំពង ពិសេសនៅក្នុងទឹកទី៣ ក្នុងពេលដែលកីឡាករទាំងពីរសម្រុកដាក់គ្នាទៅវិញទៅមក រហូតលេចចេញលទ្ធផលសន្លប់ភាគីម្ខាង ដែលនាំឱ្យមានការកំណត់លទ្ធផលចុងក្រោយរវាងកីឡាករទាំងពីរ ។
លទ្ធផលសន្លប់ក្នុងទឹកទី៣ របស់ នូវ ស៊ីថា គឺជាការបរាជ័យលើកទី២ ក្នុងចំណោមការប្រកួត៣លើករបស់គូនេះ ។ តួលេខនេះបានក្លាយជារឿងច្រំដែល ដែលនាំឱ្យមានការមើលឃើញកាន់តែច្បាស់ថា កីឡាករនូវ ស៊ីថា នឹងពិបាកឈ្នះ បើទោះជាត្រូវជួបជាមួយកីឡាករថៃ ប៊ុនហាន ក្នុងជំនួបទី៤ ឬទី៥ ។ ក្រុមអ្នកវិភាគនិយាយថា នូវ ស៊ីថា ពេលជួបជាមួយដៃគូផ្សេង រមែងឈ្នះប្រៀបជាប្រចាំ លើកលែងតែប៉ះ ថៃ ប៊ុនហាន ម្នាក់ ដែលប៉ះគ្នា៣លើក គឺ២លើកចុងក្រោយត្រូវសន្លប់នៅមុនចប់ទឹកជាប្រចាំ ។ ការកត់សម្គាល់ជារួម ថៃ ប៊ុនហាន នៅពេលជួបជាមួយកីឡាករផ្សេង ក៏ពិបាកនឹងឈ្នះដែរ ដែលនេះអាចថាមកពី ថៃ ប៊ុនហាន ដឹងខ្យល់គ្រប់ស្នៀតរបស់ នូវ ស៊ីថា បើទោះជា នូវ ស៊ីថា បានប្តូរយុទ្ធសាស្ត្រវាយលុកដើម្បីបំបែកអារម្មណ៍របស់គេនោះក៏ដោយ ។
នៅលើសង្វៀនដដែល កីឡាករស៊ូ ពី មកពីក្លិបតាមាសកីឡា បានផ្តួលកីឡាករកែវ ផានិត មកពីក្លិបតាដំបងគ្រញូងខេត្តបាត់ដំបង ឱ្យសន្លប់ក្នុងទឹកទី១ ។ កីឡាករចាន់ ប៊ុនហឿន មកពីក្លិបនិរោធមានជ័យ បានផ្តួលកីឡាករម៉ោង សុខុន មកពីក្លិបរាជសីហ៍បង្ក្រាបគ្រឿងញៀនខេត្តរតនគិរី ឱ្យសន្លប់ក្នុងទឹកទី១ ។ កីឡាករវ៉ែន ឌីយ៉ាម៉ង់ មកពីក្លិបកងរាជអាវុធហត្ថរាជធានីភ្នំពេញ ឈ្នះកីឡាករហង្ស រ៉ាម៉ន មកពីក្លិបប្រដាល់សាកលកម្ពុជាដោយពិន្ទុ និងកីឡាករឡង់ ឌីម៉ង់ មកពីក្លិបរាហ៊ូកីឡាខេត្តបាត់ដំបង វាយឈ្នះកីឡាករឈាន រស្មី មកពីក្លិបរាជសីហ៍បង្ក្រាបគ្រឿងញៀនខេត្តបាត់ដំបងដោយពិន្ទុ៕
ចែករំលែកព័តមាននេះ