កីឡាករ Sebastien Ogier បានក្លាយជាអ្នកគ្រប់គ្រងពានជើងឯកព្រឹត្តិការណ៍ប្រណាំងរថយន្តប្រភេទរ៉ែលលី Mexico Rally បន្ទាប់ពីបានយកឈ្នះការប្រណាំងនៅជុំផ្តាច់ព្រ័ត្រកាលថ្ងៃអាទិត្យទី៩ ខែមីនា ។ ការប្រណាំងនេះត្រូវបានបញ្ចប់នៅក្រុង Leon ប្រទេសម៉ិកស៊ិក ។
កីឡាករ Sebastien Ogier បានក្លាយជាអ្នកគ្រប់គ្រងពានជើងឯកព្រឹត្តិការណ៍ប្រណាំងរថយន្តប្រភេទរ៉ែលលី Mexico Rally បន្ទាប់ពីបានយកឈ្នះការប្រណាំងនៅជុំផ្តាច់ព្រ័ត្រកាលថ្ងៃអាទិត្យទី៩ ខែមីនា ។ ការប្រណាំងនេះត្រូវបានបញ្ចប់នៅក្រុង Leon ប្រទេសម៉ិកស៊ិក ។
Ogier បើកបរឱ្យក្រុម Volkswagen បានចូលដល់ទីព្រ័ត្រយកឈ្នះជើងឯកការប្រណាំងក្នុងថិរវេលា៤ម៉ោង២៧នាទី និង៤១.៨វិនាទី ។ កីឡាករហ្វាំងឡង់ Jari-Matti Latvala ដែលបើកបរឱ្យក្រុម Volkswagen ផងដែរនោះ បញ្ចប់ការប្រណាំងក្នុងលំដាប់ទី២ បន្ទាប់ពីបានប្រើអស់ថិរវេលា៤ម៉ោង២៨នាទី និង៥៤.៤វិនាទីនាំមុខកីឡាករបែលហ្ស៊ិក Thierry Neuville ដែលបញ្ចប់ការប្រណំាំងក្នុងលំដាប់ទី៣ ។ អ្នកបើកបរឱ្យក្រុម Hyundai រូបនេះបានប្រើអស់ថិរវេលា៤ម៉ោង៣៣នាទី និង១០.៤វិនាទី ។
បញ្ចប់ការប្រណាំងក្នុងចំណាត់ថ្នាក់លេខ៤ គឺកីឡាករអង់គ្លេស Elfyn Evans ។ Evansដែលបើកបរឱ្យក្រុម M-Sport Ford ប្រើអស់ថិរវេលា៤ម៉ោង ៣៤នាទី និង ៣១.១វិនាទី ។ ឯកីឡាករជើងខ្លាំងរបស់ហ្វាំងឡង់ Mikko Hirvonen ធ្វើមិនបានល្អនោះទេនៅក្នុងការប្រណាំងលើកនេះ ។ គេប្រើអស់ថិរវេលាដល់ទៅ៤ម៉ោង៤៤នាទី និង៤៨.៦វិនាទីនាំមុខ២៥នាទី និង៤១.៦វិនាទីលើកីឡាករជើងខ្លាំងរបស់ន័រវែស Mads Ostberg ដែលបើកបរឱ្យក្រុម Citroen ។
សម្រាប់ Ogier នេះគឺជាជ័យជម្នះពានជើងឯកលើកទី២របស់គេក្នុងរដូវកាលថ្មី ។ គេបាននិយាយថា៖ «ខ្ញុំបើកបរបានល្អក្នុងថ្ងៃនេះ ។ ឈ្នះការប្រណាំងលើកនេះ ខ្ញុំមានអារម្មណ៍ល្អខ្លាំងណាស់ ។ នេះជាការប្រណាំងដ៏ពិបាកបំផុត។ ការប្រណាំង៥ថ្ងៃខ្ញុំបានយកឈ្នះស្ទើរគ្រប់ថ្ងៃទាំងអស់» ។ដោយឡែកកីឡាករសេបាស្ទៀន ឡូអែបដែលជាគូប្រជែងដ៏ខ្លាំងរបស់ Ogier មិនបានមកចូលរួមការប្រណាំងលើកនេះទេ ។
នៅលើតារាងជើងឯកពិភពលោក កីឡាករ Ogier កំពុងនាំមុខគេជាមួយនឹងពិន្ទុ៦៣ពិន្ទុ ។ ស្ថិតនៅលំដាប់ទី២គឺកីឡាករ Jari-Matti Latvala ដែលសន្សំបាន៦០ពិន្ទុ ខណៈកីឡាករMads Ostbergសន្សំបាន៣២ពិន្ទុស្ថិតនៅលំដាប់ទី៣ ។សូមបញ្ជាក់ថា ការប្រណាំងរថយន្តប្រភេទRally សម្រាប់ឆ្នាំ២០១៤នេះមាន១៣ដំណាក់កាល ។ ដំណាក់ទី១ចាប់ផ្តើមកាលពីថ្ងៃទី១៤ ខែមករា ដើមឆ្នាំនៅប្រទេសបារាំង និងដំណាក់ចុងក្រោយបំផុតនឹងធ្វើនៅថ្ងៃទី១៤ដល់ទី១៦ ខែវិច្ឆិកា ខាងមុខនៅប្រទេសអង់គ្លេស ។ ការប្រណាំងដំណាក់ទី៤នឹងធ្វើនៅប្រទេសព័រទុយហ្គាល់ក្នុងកម្មវិធីឈ្មោះ Vodafone Rally de Portugal ។ កម្មវិធីនេះនឹងចាប់ផ្តើមពីថ្ងៃទី៣ ខែមេសា ៕
ចែករំលែកព័តមាននេះ