ខេត្តបាត់ដំបង ៖ គេកំពុងសង្ស័យថា រថយន្តប៉ាកុងដឹកឈើ (អារ៉េវ) រាប់សិបគ្រឿងរបស់ក្រុមហ៊ុនមួយ ដែលតែងកាប់បំផ្លាញព្រៃឈើនៅក្នុងស្រុកសំឡូត នាពេលកន្លងមក កំពុងសំងំលាក់ខ្លួនយ៉ាងសុខសាន្ត នៅក្នុងព្រៃនៃភូមិសាស្ត្រនានានៅក្នុងស្រុកនេះនៅឡើយ…
ខេត្តបាត់ដំបង ៖ គេកំពុងសង្ស័យថា រថយន្តប៉ាកុងដឹកឈើ (អារ៉េវ) រាប់សិបគ្រឿងរបស់ក្រុមហ៊ុនមួយ ដែលតែងកាប់បំផ្លាញព្រៃឈើនៅក្នុងស្រុកសំឡូត នាពេលកន្លងមក កំពុងសំងំលាក់ខ្លួនយ៉ាងសុខសាន្ត នៅក្នុងព្រៃនៃភូមិសាស្ត្រនានានៅក្នុងស្រុកនេះនៅឡើយ ខណៈការចុះបង្ក្រាប ឬការចុះស្រាវជ្រាវស្វែងរកបទល្មើសព្រៃឈើ និងវត្ថុតាងប្រព្រឹត្តបទល្មើសទាំងនេះពីសំណាក់អាជ្ញាធរ ឬសមត្ថកិច្ចពាក់ព័ន្ធ ហាក់មិនកម្រើកក្នុងស្ថានភាពស្ងាត់ឈឹងដូចចោរលួចសេះ ។ អ្នកបាត់ដំបងថា ទាល់តែស្នាដៃលោកនាយឧត្តមសេនីយ៍ សៅ សុខា ទើបធ្វើបាន ។ ក្រៅពីហ្នឹង សុទ្ធតែគ្នាគេ ។
ប្រភពព័ត៌មាននានាពីអ្នកស្រុកសំឡូតបានទម្លាយប្រាប់កោះសន្តិភាព កាលពីចុងសប្ដាហ៍មុននេះថា គេបានប្រទះឃើញរថយន្តប៉ាកុង ដឹកឈើរាប់សិបគ្រឿង កំពុងសំងំលាក់ខ្លួនពូនអាត្មានៅក្នុងព្រៃជ្រៅ នៅតំបន់ «ថ្មបាំង ឬតំបន់ភ្នំសំកុស ឬនៅតាមតំបន់ព្រៃដទៃទៀត» ក្នុងភូមិសាស្ត្រ នានា នៃទឹកដីឃុំតាតោក ស្រុកសំឡូត។ ប្រភពនេះបានប្រាប់ថា រថយន្តទាំងនោះភាគច្រើនជារថយន្តដឹកឈើរបស់ក្រុមហ៊ុន«រ័ត្នសម្បត្តិ» ដែលមានទីតាំងនៅក្នុងភូមិអូរក្រូច ឃុំតាតោក ស្រុកសំឡូត។
គេនិយាយថា ពេលខ្លះក៏គេធ្លាប់ប្រទះឃើញរថយន្តប្រភេទនេះរាប់សិបគ្រឿងទៀត ត្រូវបានគេបញ្ជូនពីតំបន់ដទៃទៀត ចូលមកសំងំលាក់ខ្លួន នៅក្នុងភូមិសាស្ត្រនានានៃស្រុកសំឡូតនេះដែរ ដែលភាគច្រើនធ្វើសកម្មភាពនៅពេលយប់។ រថយន្តប៉ាកុងទាំងនោះ ទំនងពួកប្រព្រឹត្តបទល្មើសព្រៃឈើបញ្ជូនមកពីតំបន់ ស្រុកវាលវែង ខេត្តពោធិ៍សាត់ ឆ្លងព្រំប្រទល់ខេត្តទាំង២ ឆ្ពោះចូលមកកាន់ស្រុកសំឡូត ដើម្បីរត់គេចពីការតាមចាប់របស់សមត្ថកិច្ច ។
គេក៏មិនធ្លាប់ឃើញអាជ្ញាធរ ឬមន្ត្រីព្រៃឈើ ឬស្ថាប័នពាក់ព័ន្ធណាមួយ នៅក្នុងស្រុកសំឡូត ឬកម្លាំងមកពីខេត្ត ចុះបង្ក្រាបឬស្រាវជ្រាវស្វែងរករថយន្តប៉ាកុង ឬវត្ថុតាងប្រព្រឹត្តព្រៃឈើទាំងនេះនៅឡើយទេ រហូតមកដល់ពេលនេះ ដែលធ្វើឲ្យស្រុកនេះ កំពុងក្លាយជាជម្រកដ៏សុខសាន្ត នៃការលាក់បាំងវត្ថុតាងបទល្មើសព្រៃឈើ ពោលគឺស្ងាត់ជ្រៀបតែម្ដង ខណៈការបង្ក្រាបនេះ កំពុងកក្រើកខ្លាំង នៅតាមបណ្ដាខេត្ត ភាគឥសាន្ត នៃប្រទេស។
អ្នកស្រុកសំឡូតបានបង្ហើបឲ្យដឹងថា បើតាមការតាមដាននូវសកម្មភាពកាប់បំផ្លាញព្រៃឈើ និងការដឹកជញ្ជូនឈើនានារបស់ក្រុមហ៊ុននេះ ហាក់ទើបមានការស្ងប់ស្ងាត់មួយរយៈខ្លីកន្លងទៅនេះទេ។ ប៉ុន្តែសម្ភារ
(គ្រឿងយន្ត ឬរណារយន្ត) សម្រាប់អារច្រៀក ឬកាប់បំផ្លាញព្រៃឈើ និងរថយន្តដឹកជញ្ជូនឈើរាប់សិបគ្រឿង ហាក់មិនទាន់ឃើញមានសកម្មភាពដឹកជញ្ចូនចេញពីទឹកដី ស្រុកសំឡូតនៅឡើយ តែអាចបញ្ជូនចេញពីទីតាំងក្រុមហ៊ុនយកទៅលាក់ទុកនៅក្នុងព្រៃជ្រៅ តាមតំបន់ភ្នំនានាក្នុងស្រុកនេះ។ (សម្រួលដោយ៖ ស្រីណា)
ព័ត៌មានពិស្តារមានផ្សាយជូននៅលើទំព័រកាសែតកោះសន្តិភាព ។
ចែករំលែកព័តមាននេះ