ជាទូទៅការបរិភោគអាហារប្រចាំថ្ងៃយ៉ាងហោចណាស់៣ដងក្នុងមួយថ្ងៃគឺពេលព្រឹក ថ្ងៃត្រង់ និងពេលល្ងាច ហើយការទទួលទានតម្រូវឱ្យមានភាពទៀងទាត់ពេលវេលាដើម្បីសម្រួលដល់អវយវៈក្នុងរាងកាយបញ្ចៀសពីជំងឺដង្កាត់ផ្សេងៗ ។
លោកវេជ្ជបណ្ឌិតសេង សេរី ឯកទេសជំងឺទឹកនោមផ្អែមនៃមន្ទីរពេទ្យព្រះកុសុមៈបានប្រាប់កោះសន្ដិភាពឱ្យដឹងថា ការទទួលទានមានសារសំខាន់ណាស់ដើម្បីទ្រទ្រង់ជីវិតរស់នៅ ហើយការទទួលទានអាហារចាំបាច់ត្រូវតែអនុវត្តឱ្យបានទៀងទាត់ដោយអាហារពេលព្រឹកគួរតែទទួលទានឱ្យបានច្រើនជាងអាហារពេលថ្ងៃត្រង់និងល្ងាច ។ បើលោកអ្នកអាចធ្វើយ៉ាងនេះបានជារៀងរាល់ថ្ងៃនោះអាចកាត់បន្ថយជំងឺលើសទម្ងន់ធាត់ លើសឈាម ទឹកនោមផ្អែម និងក្រពះ ពោះវៀនបានយ៉ាងប្រសើរ ។ សម្រាប់អ្នកជំងឺទឹកនោមផ្អែមការបរិភោគចំណីអាហារគឺមានលក្ខណៈខុសគ្នាពីអ្នកដែលគ្មានជាតិស្ករច្រើនត្រូវតែទទួលទានអាហារតិចៗតែច្រើនដងគឺ៤ទៅ៥ដងក្នុងមួយថ្ងៃ ហើយត្រូវហូបឱ្យទៀងទាត់ពេលវេលា ។ បើអ្នកអាចអនុវត្តតាមវិធីនេះបាននឹងជួយឱ្យអត្រាស្ករក្នុងឈាមមានលំនឹងល្អជាពិសេសជួយការពារខ្វះជាតិស្ករឬកម្រិតស្ករក្នុងឈាមធ្លាក់ចុះខ្លាំង ។
អ្នកជំងឺទឹកនោមផ្អែមគប្បីចេះជ្រើសរើសម្ហូបអាហារនិងកំណត់ពេលវេលាទទួលទានឱ្យបានទៀងទាត់ទោះជារវល់ឬក៏មិនឃ្លានក៏ដោយត្រូវតែទទួលទានសិន ។ ការធ្វើបែបនេះមានប្រសិទ្ធភាពជួយព្យាបាលជំងឺទឹកនោមផ្អែមនិងអាចទប់ស្កាត់ផលវិបាកក្នុងកម្រិតខ្ពស់ព្រមទាំងជួយសម្រាលភាពតប់ប្រមល់ទល់ពុទ្ធោក្នុងអារម្មណ៍មិនឱ្យស្មុគស្មាញ ហើយលើកកម្ពស់គុណភាពនៃជីវិតឱ្យរស់នៅប្រកបដោយភាពស្រស់ថ្លា ៕
ចែករំលែកព័តមាននេះ