រាជធានីភ្នំពេញ ៖ មិនថាតំបន់ទេសចរណ៍ណានោះទេ ឱ្យតែថ្ងៃចុងសប្តាហ៍ឬថ្ងៃបុណ្យជាតិម្តងៗមានភ្ញៀវទេសចរជាតិនិងអន្តរជាតិ បាននាំក្រុមគ្រួសារមិត្តភក្តិស្រីប្រុស ទៅទស្សនាកម្សាន្តលំហែកាយ ដើម្បីផ្លាស់ប្តូរបរិយាកាស និងរំសាយអារម្មណ៍បន្ទាប់ពីនឿយហត់ ក្រោយបំពេញការងារទាំងមន្ត្រីបម្រើការងាររដ្ឋ និងឯកជន ។ តំបន់ទេសចរណ៍ក្នុងប្រទេសកម្ពុជាមានច្រើនកន្លែងណាស់ ទាំងតំបន់ធម្មជាតិ និងតំបន់ប្រាសាទនានា ។ ក្នុងនោះកោះដាច់ ជារមណីយដ្ឋានមួយ ដែលគួរឱ្យចាប់អារម្មណ៍ និងជាតំបន់មួយដែលនៅជិតរាជធានីភ្នំពេញ ហើយបើយើងធ្វើដំណើរតាមផ្លូវជាតិលេង៦ ប្រហែលជា១២គីទ្បូម៉ែត្រប៉ុណ្ណោះ រួចឆ្លងតាមកំពង់ចម្លងក្តីចាស់ យើងនឹងទៅដល់តំបន់រមណីដ្ឋានកោះដាច់ ។
ប្រជាពលរដ្ឋរស់នៅកោះនេះ ប្រកបរបរកសិកម្ម និងដាំដំណាំដូចតំបន់ផ្សេងៗទៀតផងដែរ ។ ទន្ទឹមនឹងនេះ បើមើលពីចំណាយកោះដាច់មានសម្រស់គួរឱ្យចង់គយគន់ ព្រោះថាមានឆ្លេរខ្សាច់នៃទន្លេមេគង្គ ដែលមានទឹកពណ៌ផ្ទៃមេឃ និងអាចឱ្យភ្ញៀវទេសចរងូតទឹកលេងយ៉ាងសប្បាយរីករាយ ។ រមណីយដ្ឋានកោះដាច់ នៅថ្ងៃទិវាអន្តរជាតិនារី៨មីនា មានភ្ញៀវទេសចរទៅទស្សនាយ៉ាងច្រើនទាំងភ្ញៀវជាតិ និងអន្តរជាតិ ព្រមទាំងមានសេវាកម្មម្ហូបអាហារដូចកន្លែងទេសចរណ៍នានាផងដែរ ។ ទន្ទឹងនឹងនេះ យើងក៏អាចយកម្ហូបអាហារពីផ្ទះដោយខ្លួនឯងទៅញុំនៅលើក្យូសនៅនោះបានថែមទៀត ។ ចំពោះភ្ញៀវទេសចរចូលទៅទស្សនាតំបន់រមណីយដ្ឋានកោះដាច់នេះ ត្រូវតែបង់ថ្លៃចំនួន២ពាន់រៀល និងតម្លៃផ្ញើយានជំនិះផ្សេងទៀត ។ មន្ត្រីរាជការម្នាក់ដែលបាននាំក្រុមគ្រួសារទៅលំហែកាយនៅថ្ងៃបុណ្យសិទ្ធិនារី៨មីនា នៅរមណីយដ្ឋានកោះដាច់ បាននិយាយថា រមណីយដ្ឋានកោះដាច់ គឺជាកន្លែងទេសចរណ៍មួយដែលគួរឱ្យចង់មកលេង ព្រោះថាកន្លែងនេះមានទឹកងូតលេង អាកាសធាតុត្រជាក់ និងទីធ្លាធំទូលាយ ។ ទោះយ៉ាងណាក្តី មន្ត្រីរូបនេះក៏មិនសូវពេញចិត្តនឹងសេវាកម្មរបស់ម្ចាស់តូប ព្រោះថាមិនបានកំណត់តម្លៃច្បាស់លាស់សម្រាប់មុខម្ហូប និងសេវាកម្មផ្សេងទៀត ក៏នៅមិនទាន់ទទួលបានផងដែរ ។
ភ្ញៀវទេសចរដែរទៅលំហែកាយក៏បាននាំគ្នានិយាយសរសើរមិនដាច់ពីមាត់ថា រមណីយដ្ឋានកោះដាច់មានសម្រស់ស្រស់ស្អាតគួរឱ្យចង់ទៅទស្សនា និងមិនចេះណាយ ប៉ុន្តែពួកគាត់ក៏បានស្នើសុំឱ្យអ្នកគ្រប់គ្រងរមណីយដ្ឋានកោះដាច់ដាក់តម្លៃឱ្យបានច្បាស់លាស់ និងបម្រើសេវាកម្មឱ្យបានល្អជាងនេះ ។ គួរបញ្ជាក់ផងដែរ នៅថ្ងៃបុណ្យអន្តរជាតិនារី៨មីនា ក្រុមការងារកោះសន្តិភាពក៏បានទៅទស្សនានៅរមណីយដ្ឋានកោះដាច់នេះដែរ ដើម្បីលំហែកាយក៏ដូចជាពង្រឹងចំណងមិត្តភាព និងសាមគ្គីភាព ក្រោយពេលសម្រាកពីការងារ ៕
ចែករំលែកព័តមាននេះ