រាជធានីភ្នំពេញ ៖ យោងតាមការអះអាងរបស់គ្រូបង្វឹកលោក ហ៊ុន ច័ន្ទរាជ្យ ដែលគេស្គាល់ជាគ្រូបង្វឹកប្រដាល់ដាក់ទ្រុងដ៏ល្បីនៅកម្ពុជា និងជាគ្រូក្លិបប្រដាល់ Cambodian Top Team…
រាជធានីភ្នំពេញ ៖ យោងតាមការអះអាងរបស់គ្រូបង្វឹកលោក ហ៊ុន ច័ន្ទរាជ្យ ដែលគេស្គាល់ជាគ្រូបង្វឹកប្រដាល់ដាក់ទ្រុងដ៏ល្បីនៅកម្ពុជា និងជាគ្រូក្លិបប្រដាល់ Cambodian Top Team (CTT) ថា រូបលោកនិងកូនសិស្សជាច្រើន នាក់ត្រូវបានក្រុមហ៊ុនផលិតភាពយន្តឯកសារ
របស់អាមេរិកមួយ ជ្រើសរើសឲ្យដើរតួជាអ្នក ស៊ើបអង្កេតអ្នកជាប់ទោសឬអ្នកជាប់គុកម្នាក់ក្នុងរយៈពេល៣សប្ដាហ៍ ។ ពាក់ព័ន្ធនឹងតម្លៃខ្លួន លោកថាទទួលបានខ្ពស់ធៀបនឹងតម្លៃខ្លួនថតកុនក្នុងស្រុក ។
លោក ហ៊ុន ចាន់រាជ្យ បង្ហើបថា ខាងក្រុមហ៊ុនអាមេរិកមិនទាន់អនុញ្ញាតឲ្យបង្ហើបអំពីចំណងជើងរឿងដែលមកថតនៅស្រុកខ្មែរនោះនៅឡើយទេ ប៉ុន្តែភាពយន្តនេះកំពុងនៅបន្ត ថតទៀតនៅទឹកដីអាមេរិក ។ ភាពយន្តនេះនៅពេលថតចប់លើទឹកដីអាមេរិក នឹងមកថតនៅកម្ពុជាក្នុងទីតាំងដែលផលិតករកំណត់យក តែក្រុមការងារបានកំណត់ជ្រើសរើសតួសម្ដែងរួចហើយ ដោយលោកបង្ហាញទឹកចិត្តរំភើបយ៉ាងខ្លាំងដែលរូបលោកនិងកូនសិស្សជាច្រើនរូបត្រូវបានជ្រើសរើសឲ្យថរក្នុងភាពយន្តនេះ ។
លោកបន្តថា នេះជាសញ្ញាជោគជ័យរបស់ កីឡាករខ្មែរក្នុងភាពយន្តបរទេស ក៏ដូចជាដើម្បី ផ្សព្វផ្សាយពីកីឡាករខ្មែរឲ្យផលិតករបរទេស និង អន្តរជាតិបានស្គាល់ពីសមត្ថភាពក្នុងការសម្ដែងផង ។ ភាយយន្តនេះ គ្រោងនឹងថត ចប់ឆាប់ៗដោយត្រូវដាក់បញ្ចាំងជា ផ្លូវការនៅឆ្នាំ២០២០ខាងមុខ ។
លោក ហ៊ុន ច័ន្ទរាជ្យ បានថ្លែងប្រាប់បណ្ដាញ ព័ត៌មានក្នុងស្រុកថា ៖ «ខាងក្រុមហ៊ុនគេអត់ ចង់បង្ហើបសាច់រឿងទេ ប៉ុន្តែខ្ញុំបានដើរតួធំដែរ គឺតួជាមេប៉ូលិសស៊ើបអង្កេតអ្នកទោស និងស៊ើប អង្កេតការជួញដូរគ្រឿងញៀនទៀតផង ហើយកូនសិស្សខ្ញុំជាច្រើនក្នុងក្លិបបានដើរតួដែរ។
តាមពិត សាច់រឿងនេះគឺតម្រូវថតនៅថៃទេ តែគេយកទីតាំងមកថតនៅកម្ពុជា ហើយខ្ញុំ ជាមេប៉ូលិស ពាក់ឈុតខោអាវប៉ូលិសថៃដើម្បី ស៊ើបអង្កេត»។
គ្រូបង្វឹករូបនេះរៀបរាប់ត្រួសៗថា កីឡាករ ដែលចូលរួមថតក្នុងភាពយន្តនោះរួមមាន លោក
ហ៊ុន ច័ន្ទរាជ្យ កីឡាករ សាន សៅយ៉ាន់ កីឡា ករ ស សី កីឡាករ សុខ ធី កីឡាករ សុខ រិទ្ធ កីឡាករ រិន សារ័ត្ន កីឡាករចាន់ សំអាត និងកូនសិស្សជាច្រើននាក់ទៀត ។ ចំពោះទីតាំងថតដែលមានសកម្មភាពស៊ើបអង្កេត និងមានអ្នកទោសជាប់គុកជាប់ច្រវាក់ផងនោះ ត្រូវបានគេអះអាងថា ស្ថិតនៅម្ដុំវាលព្រះមេរុ ។
លោកថ្លែងថា ភាពយន្តនេះមានការសហ ការគ្នារវាងក្រុមហ៊ុនអាមេរិកនិងក្រុមហ៊ុននៅ ថៃ ដោយសាច់រឿងទាំងមូលគឺនិយាយពីជីវិត ពិតរបស់អ្នកទេសចរម្នាក់ដែលត្រូវគេចាប់
ដាក់គុកនៅថៃ ។
គួរបញ្ជាក់ថា ក្លិប Cambodian Top Team ជាក្លិបប្រដាល់មួយដែលទទួលបាន ការ គាំទ្រពីសំណាក់ការហ្វឹកហាត់ក្នុងស្រុក និងអន្តរ ជាតិ ហើយក្លិបមានទំនាក់ទំនងទៅក្រៅប្រទេស ជាច្រើនដូចជា ថៃ មីយ៉ាន់ម៉ា និង សង្វៀន ONE Championship ជាដើម ទើបកីឡាករកម្ពុជាជាច្រើនរូបមានឱកាសបង្ហាញមុខក្នុងសង្វៀនប្រដាល់ដាក់ទ្រុង ។ ក្លិបនេះត្រូវបាន បង្កើតដោយលោក ហ៊ុន ច័ន្ទរាជ្យ នៅឆ្នាំ ២០១៣ ដោយប្ដូរទីតាំងចំនួន៣ដងរួចមកហើយ ។ បច្ចុប្បន្ននេះ ក្លិបមានទីតាំងថ្មីលេខ #2s ផ្លូវលេខ៤៦៨ សង្កាត់ទួលទំពូងទី១ ខណ្ឌ ចំការមន រាជធានីភ្នំពេញ ដោយទំហំទទឹង ១៤ ម៉ែត្រ និងបណ្ដោយ៣៥ម៉ែត្រ ៕ (កែសម្រួលដោយ ៖ បុប្ផា)
ចែករំលែកព័តមាននេះ