រាជធានីភ្នំពេញ ៖ ការប្រកួតប្រដាល់នៅលើសង្វៀន CTN កាលពីរសៀលថ្ងៃសៅរ៍ ទី៨ មីនា ប្រព្រឹត្ដទៅក្នុងសភាពមិនសូវជារលូនទាល់តែសោះ ព្រោះក្នុងចំណោមគូប្រកួតទាំង៧គូ ទាំងគូដណ្ដើមខ្សែក្រវាត់ស្រាបៀរលីអូរ មាន៥គូសុទ្ធតែចាញ់សន្លប់មិនលើសពីទឹកទី៣ឡើយ ឯគូឯកយឹម ឌៀប មកពីសមាគមកីឡាប្រដាល់ក្រសួងការពារជាតិ និងប្រាក់ ចាន់ស៊ីន មកពីក្លិបមិត្ដប៉ូលិស ត្រូវអាជ្ញាកណ្ដាលបណ្ដេញចុះពីលើសង្វៀនទាំង២នាក់ ដោយសារតែពួកគេប្រកួតមិនអស់ពីសមត្ថភាព ។
យឹម ឌៀប និងប្រាក់ ចាន់ស៊ីន ត្រូវបានគណៈកម្មការរៀបចំការប្រកួតដាក់ឱ្យប្រកួតក្នុងឋានៈជាគូឯកប្រចាំសប្ដាហ៍ ប៉ុន្ដែគេបែរជាធ្វើឱ្យអ្នកមើលភាគច្រើនរិះគន់យ៉ាងខ្លាំងលើសកម្មភាពប្រកួតរបស់ពួកគេ ។ គ្រាន់តែចាប់ផ្ដើមប្រកួតនៅទឹកទី១ភ្លាម ប្រាក់ ចាន់ស៊ីន ដែលនរណាក៏ដឹងថា គេជាកីឡាករជើងខ្លាំងនិងជាម្ចាស់ខ្សែក្រវាត់ជើងឯកកំពូលអ្នកប្រយុទ្ធគុនខ្មែរវគ្គ១ ក្នុងប្រភេទទម្ងន់៦៥គីឡូក្រាម បែរជាបណ្ដោយឱ្យយឹម ឌៀប វាយតាមអំពើចិត្ដ ដោយពុំបានធ្វើការតបតវិញឡើយរហូតដល់ត្រូវអាជ្ញាកណ្ដាលរាប់ដល់ទៅ២លើក ។ ចូលដល់ទឹកទី២ គេនៅតែបើកដៃឱ្យយឹម ឌៀប វាយមកលើរូបគេតាមចិត្ដដូចកាលពីទឹកទី១ទៀត តែគណៈកម្មការនៅតែទុកឱកាសឱ្យគេប្រកួតបន្ដទៀត ដោយគ្រាន់តែព្រមានពួកគេឱ្យវាយឱ្យអស់សមត្ថភាព ប៉ុន្ដែពួកគេទាំង២ ប្រហែលជាមានចេតនាចង់លក់ការប្រកួតមែនហើយ ទើបគេស្ដែងចេញសកម្មភាពប្រកួតដូចទឹកទី១ដដែល ដូច្នេះលោកអាជ្ញាកណ្ដាល សុខ វិជ័យ ក៏បានសម្រេចបញ្ឈប់ការប្រកួតតែម្ដង ។ គូនេះគេបានទម្លាក់កំហុសទៅលើប្រាក់ ចាន់ស៊ីន ច្រើនជាង ព្រោះថាគេគឺជាម្ចាស់ខ្សែក្រវាត់មួយរូបដែរ មិនគួរណាធ្វើបែបនេះសោះ ហើយការសម្រេចចិត្ដមិនប្រកាសលទ្ធផលរបស់លោកអាជ្ញាកណ្ដាលគឺដើម្បីកុំឱ្យពួកអ្នកលេងភ្នាល់លុយបានចិត្ដតែប៉ុណ្ណោះ ។
ពេជ្រ ម៉ាប់ មកពីក្លិបសាលវ័ន្ដកីឡា បានវាយសោម តឿទី មកពីក្លិបខ្លារខិនមានឫទ្ធិ ឱ្យសន្លប់នៅមុនស្នូរជួងបញ្ចប់ទឹកទី៣ ។ នៅក្នុងទឹកទី១ សោម តឿទី ត្រូវពេជ្រ ម៉ាប់ វាយឱ្យរាប់ដល់៨ម្ដង ដោយសារមិនមានលទ្ធភាពក្នុងការវាយតបតវិញ ។ ចូលដល់ទឹកទី២ ពេជ្រ ម៉ាប់ មានប្រៀបជាងសោម តឿទី ដាច់តែម្ដងគឺគេបានសង្ខើញដើរចូលវាយ ដោយប្រើស្នៀតកែងនិងជង្គង់សង្គ្រុបទៅលើសោម តឿទី ធ្វើឱ្យអាជ្ញាកណ្ដាលបង្ខំរាប់៨ជាលើកទី២ ។ ចូលដល់ទឹកទី៣ ដោយសារតែឃើញសោម តឿទី លែងមានឱកាសតដៃបានទៅហើយ លោកអេ ភូថង ដែលជាអាជ្ញាកណ្ដាលក៏សម្រេចបញ្ឈប់ការប្រកួតតែម្ដងទៅ ។
ឃីម បូរ៉ា មកពីក្លិបរស្មីភូមិគាប ខេត្ដបន្ទាយមានជ័យ បានប្រើស្នៀតកែងវាយផ្ដួលមួក សាវឌី មកពីសមាគមកីឡាប្រដាល់ក្រសួងការពារជាតិឱ្យសន្លប់នៅមុនស្នូរជួងបញ្ចប់់ទឹកទី២ ។ នៅទឹកទី១ បូរ៉ា បានម៉ាត់ចូលមុខសាវឌី យ៉ាងពេញទំហឹងបណ្ដាលឱ្យដួលអុកគូទ ហើយត្រូវអាជ្ញាកណ្ដាលរាប់៨ម្ដង ។ លុះចូលដល់ទឹកទី២ នៅពេលដែលសាវឌី ដើរចូលវាយដោយខ្វះការប្រុងប្រយ័ត្ននោះត្រូវបូរ៉ា បុកមួយកែងចូលសៀតផ្កាពេញទំហឹងបណ្ដាលឱ្យដួលសន្លប់ហើយទោះបីជាអាជ្ញាកណ្ដាលរាប់ដល់១០ក៏គេនៅតែមិនអាចក្រោកប្រកួតបានទៀតដែរ ។
កង មករា មកពីក្លិបកងពលតូចឆត្រយោង៩១១ បានវាយអ្នកប្រដាល់ជើងចាស់លី ចំរើន មកពីក្លិបរស្មីកុមារកំព្រា ឱ្យសន្លប់ឈរនៅត្រឹមទឹកទី២ ។ នៅក្នុងទឹកទី១ ចំរើន ក៏មានឱកាសវាយតបតជាមួយមករាដែរ លុះចូលដល់ទឹកទី២ រៀបតែនឹងបញ្ចប់ទឹកទៅហើយនោះ គេត្រូវមករា ម៉ាត់ចូលមុខមួយដៃយ៉ាងពេញទំហឹងបណ្ដាលឱ្យសន្លប់ឈរនៅអែបខ្សែរេញមួយសន្ទុះទើបដួល ។
វី សេរីចាន់ឌីន មកពីក្លិបខ្លារខិនមានឫទ្ធិ ត្រូវអាជ្ញាកណ្ដាលប្រកាសឱ្យចាញ់អ៊ុម កំសត់ មកពីក្លិបព្រៃទទឹងមានឫទ្ធិបង្ក្រាបគ្រឿងញៀន នៅត្រឹមទឹកទី៣ ដោយសារតែការវាយថែមទៅលើគូប្រកួត ។ ចំណែកម៉ឺន មេឃា មកពីក្លិបអេ ភូថងកីឡា ឈ្នះពិន្ទុ អេង នីត មកពីក្លិបខ្លារខិនមានឫទ្ធិ ។
រីឯគូដណ្ដើមខ្សែក្រវាត់ស្រាបៀរលីអូរវិញ ឡៅ ចន្ទ្រា មកពីក្លិបកងពលតូចឆត្រយោង៩១១ ពេលនេះគេកើនបាន៣ពិន្ទុទៀតហើយ បន្ទាប់ពីបានយកឈ្នះនឿន សាវឌី មកពីក្លិបអេភូថងកីឡា ដោយពិន្ទុ ។ នឿន សាវឌី ប្រកួតបាន៣លើកចាញ់ទាំង៣លើក មាន៣ពិន្ទុ ចំណែកឡៅ ចន្ទ្រា ប្រកួតបាន៣លើកដូចគ្នានៅមិនទាន់ស្គាល់ចាញ់ម្ដងណាឡើយ មាន៩ពិន្ទុកំពុងនាំមុខគេនៅក្នុងតារាង ៕
ចែករំលែកព័តមាននេះ