ខេត្តព្រៃវែង ៖ សកម្មភាពដឹកឈើប្រណីតខុសច្បាប់នាំចេញទៅប្រទេសវៀតណាម ទាំងតាមផ្លូវគោក និងតាមផ្លូវទឹកកំពុងតែកម្រើកឡើងវិញនៅក្នុងទឹកដីខេត្តព្រៃវែង ដោយសារតែសមត្ថកិច្ចជំនាញត្រូវរ៉ូវគ្នាជាមួយឈ្មួញ ហើយនាំគ្នាបិទភ្នែកដេកលក់ស្ងាត់ឈឹង។
ខេត្តព្រៃវែង ៖ សកម្មភាពដឹកឈើប្រណីតខុសច្បាប់នាំចេញទៅប្រទេសវៀតណាម ទាំងតាមផ្លូវគោក និងតាមផ្លូវទឹកកំពុងតែកម្រើកឡើងវិញនៅក្នុងទឹកដីខេត្តព្រៃវែង ដោយសារតែសមត្ថកិច្ចជំនាញត្រូវរ៉ូវគ្នាជាមួយឈ្មួញ ហើយនាំគ្នាបិទភ្នែកដេកលក់ស្ងាត់ឈឹង។
តាមប្រភពព័ត៌មានច្បាស់ការណ៍មួយពីប្រជាពលរដ្ឋដែលរស់នៅតាមដងទន្លេមេគង្គក្នុងតំបន់ទន្លេលឿងត្រង់ចំណុចព្រំប្រទល់ស្រុកពាមរក៍ និងស្រុកពាមជរ ខេត្តព្រះវែង បានអះអាងប្រាប់កោះសន្តិភាពថា ថ្មីៗនេះមានរថយន្តយីឌុបខ្នាតយក្សដ៏ធំមួយជារថយន្តដដែលៗបានដឹកឈើប្រណីតរាប់រយដុំបង្កប់នៅពីក្រោមបាវស្រូវយកទៅទម្លាក់ចុះទូកដែលរង់ចាំរួចជាស្រេចបន្លំធ្វើដូចរថយន្តដឹកស្រូវរាល់ដងនៅចំណុចមាត់ទឹកក្បែរផ្ទះរបស់ពួកគាត់ជារៀងរាល់យប់។
ប្រភពនេះបានបញ្ជាក់ថា ទូកដែលមកចាំទទួលដាក់ឈើប្រណីតទាំងនោះ គឺជាទូករបស់ជនជាតិវៀតណាម ហើយបានបើកមកចតចាំតាំងពីថ្ងៃដូចបានត្រៀមទុកជាមុន។ ប៉ុន្តែរហូតដល់ម៉ោង៨ទៅ៩យប់ ទើបរថយន្តយីឌុបដឹកឈើប្រណីតមកដល់ ដោយមានទាំងកម្មករមកជាមួយស្រាប់ផង ។ ពេលមកដល់ភ្លាមៗគេចាប់រើដាក់ចុះទូកភ្លាមរហូតដល់ម៉ោង១ទៅ២រំលងអធ្រាត្រទើបរើឈើចុះទូកអស់រំខានដល់ដំណេរបស់ពួកគេ រួចគេចាក់ស្រូវចូលទូកគ្របពីលើឈើទាំងនោះតែម្តង ហើយបើកចេញទៅភ្លាមដោយមិនរង់ចាំឱ្យភ្លឺទាន់នោះទេ ទាំងទូក និងរថយន្ត។
អ្វីដែលធ្វើឱ្យប្រជាពលរដ្ឋនៅតំបន់នោះមានការងឿងឆ្ងល់នោះ គឺឈ្មួញដឹកឈើប្រណីតយ៉ាងគគ្រឹកគគ្រេង និងជារៀងរាល់យប់បែបនេះទៅហើយ ប៉ុន្តែគេពុំដែលឃើញសមត្ថកិច្ច ឬមន្ត្រីជំនាញណាមួយចុះទៅបង្ក្រាបសោះ គឺនាំគ្នាដេកលក់ឱ្យស្ងាត់ឈឹងតែម្តង ទំនងជាត្រូវថ្នាំរបស់ឈ្មួញម្ចាស់ឈើទាំងនោះអស់ហើយក៏មិនដឹង?
ពាក់ព័ន្ធករណីនេះត្រូវបានសមត្ថកិច្ចតូចតាចមួយចំនួននៅស្រុកពាមរក៍បង្ហើបឱ្យដឹងថា ឈើប្រណីតទាំងនោះគឺជារបស់មន្ត្រីកងរាជអាវុធហត្ថមានឥទ្ធិពលម្នាក់នៅខេត្តព្រៃវែង ដែលទាំងមន្ត្រីរាជការ សមត្ថកិច្ច និងប្រជាពលរដ្ឋទូទៅសុទ្ធតែបានដឹងថា មន្ត្រីម្នាក់នោះគឺជាថៅកែឈើគ្រញូងដ៏ល្បីល្បាញនៅក្នុងខេត្តព្រៃវែងដែរ ហើយភាពល្បីរបស់មន្ត្រីម្នាក់នោះគឺដោយសារតែគេពូកែរត់ការបិទមាត់សមត្ថកិច្ច និងមន្ត្រីជំនាញពាក់ប័ន្ធគ្រប់ស្ថាប័នឱ្យបិទមាត់ដេកលក់អស់ពេលដែលឈើប្រណីតចរាចរណ៍នាំចេញទៅប្រទេសវៀតណាមនោះ ។
ជាក់ស្តែងការនាំចេញឈើប្រណីតៗដែលអ្នកស្រុកបានឃើញជារៀងរាល់យប់នេះ គឺគេបានរត់ការបិទមាត់ជាមុនរួចអស់ទៅហើយ ពិសេសគឺមេប៉េអឹមម្នាក់នៅស្រុកពាមរក៍ និងមន្ត្រីគយមួយក្រុមដែលល្បីល្បាញខាងចាប់មិនដែលឱ្យរួចនោះក៏ត្រូវបានគេបិទមាត់យ៉ាងពេញចិត្តហើយដែរ ព្រោះឃើញមុខទៅទីនោះញឹកញាប់ តែមិនដែលបានចាប់ទេ។
ទោះជាយ៉ាងណាក៏ដោយក្រោយពីដឹងថា មានក្រុមអ្នកសារព័ត៌មានតាមប្រម៉ាញ់ព័ត៌មានពីការដឹកជញ្ជូនឈើប្រណីតៗខាងលើនេះក៏ស្រាប់តែបាត់លែងឃើញរថយន្តដឹកឈើប្រណីតទាំងនោះឱ្យឈឹងតែម្តងពីរបីយប់នេះដែលតាមប្រភពក្រៅផ្លូវការខ្លះបាននិយាយថា ក្រុមឈ្មួញបានដូរទីតាំងពីចុះឈើតាមផ្លូវទឹក ហើយងាកទៅតាមផ្លូវគោកវិញហើយដើម្បីគេចពីការតាមប្រម៉ាញ់របស់ក្រុមអ្នកកាសែត ៕
ចែករំលែកព័តមាននេះ