រាជធានីភ្នំពេញ ៖ យ៉ាងហោចណាស់មនុស្សប្រុស ស្រី៣នាក់បានលេបថ្នាំសម្លាប់ខ្លួនក្នុងថ្ងៃតែមួយ គឺថ្ងៃទី៧ មីនា ២០១៤ នៅកន្លែងផ្សេងគ្នា តែមិនបណ្តាលឱ្យស្លាប់បាត់បង់ជីវិតទេ។
ករណីទី១ កម្មការិនីម្នាក់ខឹងបងប្រុសមិនឱ្យទៅលេងផ្ទះសង្សារថ្ងៃសិទ្ធិនារីលេបថ្នាំប៉ារ៉ាសេតាម៉ុលអស់៣២គ្រាប់ធ្វើអត្តឃាត ករណីទី២ យុវជនម្នាក់ខឹងបងប្អូនស្តីបន្ទោសរឿងយកទូរស័ព្ទទៅលក់ រត់ទៅផឹកស្រាអស់កន្លះកាទិន រួចលេបថ្នាំប៉ារ៉ាសេតាម៉ុលអស់ជាង៣០គ្រាប់ធ្វើអត្តឃាតដែរ ចំណែកករណីទី៣ កម្មការិនីម្នាក់ទៀតខឹងបងស្រីជីដូនមួយបង្ខំឱ្យទៅជួយលក់បាយបែកឆ្ងាយពីសង្សារលេបថ្នាំងងុយដេកអស់៣គ្រាប់ធ្វើអត្តឃាត។
កម្មការិនីកាត់ដេរទាំង២នាក់ ម្នាក់ឈ្មោះស៊ន សំអូន អាយុ២០ឆ្នាំ ស្នាក់នៅផ្ទះជួលក្នុងសង្កាត់កំបូល ខណ្ឌពោធិ៍សែនជ័យ និងម្នាក់ទៀតឈ្មោះរ៉ុង អាយុ១៩ឆ្នាំ ស្នាក់នៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅភូមិព្រែកតាអុង ឃុំស្វាយយា ស្រុកស្វាយជ្រុំ ខេត្តស្វាយរៀង។ ដោយឡែកយុវជនលេបថ្នាំប៉ារ៉ាសាតាម៉ុលសម្លាប់ខ្លួនឈ្មោះស៊ី ដារិទ្ធិ អាយុ២៧ឆ្នាំ នៅយាមដីឱ្យបងនៅសង្កាត់ទួលសង្កែ ខណ្ឌប្ញស្សីកែវ។
ជនរងគ្រោះទាំង៣នាក់ត្រូវសាច់ញាតិយកទៅសង្គ្រោះនៅមន្ទីរពេទ្យទាន់ពេល៕
ចែករំលែកព័តមាននេះ