ខេត្តតាកែវ ៖ មេបាចាស់ទុំនិងសាច់ញាតិបានត្រឹមតែអង្គុយឱបក្បាលជង្គង់បង្ហូរទឹកភ្នែក ដោយសារខ្មាសអស់បងប្អូនសាច់ញាតិនៅក្នុងភូមិនិងភ្ញៀវដែលបានចែកធៀបការរួចហើយ ដើម្បីមកចូលរួមពិធីមង្គលការកូនស្រីនៅថ្ងៃទី៧ មីនា តែអ្វីៗដែលស្មានមិនដល់គឺបានរលាយអស់ទៅវិញ ខណៈពេលដែលជិតដល់ថ្ងៃចូលរោងការទៅហើយ ស្រាប់តែកូនក្រមុំរត់ចោលផ្ទះបាត់មិនដឹងទៅដល់ណា
ខេត្តតាកែវ ៖ មេបាចាស់ទុំនិងសាច់ញាតិបានត្រឹមតែអង្គុយឱបក្បាលជង្គង់បង្ហូរទឹកភ្នែក ដោយសារខ្មាសអស់បងប្អូនសាច់ញាតិនៅក្នុងភូមិនិងភ្ញៀវដែលបានចែកធៀបការរួចហើយ ដើម្បីមកចូលរួមពិធីមង្គលការកូនស្រីនៅថ្ងៃទី៧ មីនា តែអ្វីៗដែលស្មានមិនដល់គឺបានរលាយអស់ទៅវិញ ខណៈពេលដែលជិតដល់ថ្ងៃចូលរោងការទៅហើយ ស្រាប់តែកូនក្រមុំរត់ចោលផ្ទះបាត់មិនដឹងទៅដល់ណា ធ្វើឱ្យឪពុកម្ដាយខ្មាសគេពេញភូមិ និងសងថ្លៃបណ្ណាការទៅឱ្យកូនកំលោះទាំងក្ដីអាម៉ាស់ ។
ហេតុការណ៍កូនក្រមុំរត់ចោលផ្ទះមិនព្រមចូលរោងការចោលកូនកំលោះឱ្យចំបែងឯកានេះ បានកើតឡើងកាលពីវេលាម៉ោង៨យប់ថ្ងៃទី៤ មីនា នៅក្នុងភូមិអំពិល ឃុំស្លា ស្រុកសំរោង ។តាមសម្ដីសាច់ញាតិខាងកូនក្រមុំបានរៀបរាប់ថា កូនក្រមុំឈ្មោះ អ៊ុន ចន្ទ្រា អាយុ ១៨ឆ្នាំ ជាកូនច្បងក្នុងចំណោមកូនស្រី៣នាក់ ។ នាងជាកម្មការិនីរោងចក្រកាត់ដេរនៅឯរាជធានីភ្នំពេញ ហើយនាងត្រូវកំណត់ចូលរោងការនៅថ្ងៃទី៧ មីនា ភ្ញៀវមកពិសាភោជនីយហារនៅថ្ងៃទី៨ មីនា ។ ចំពោះកូនកំលោះឈ្មោះ ឈា មាន អាយុ ៣២ឆ្នាំ រស់នៅភូមិស្លែងរមាំង ឃុំជំរះពេន ស្រុកសំរោង ។
សាច់ញាតិដដែលបានបន្ដទៀតថា នៅថ្ងៃទី៥ មីនា ឪពុកម្ដាយកូនក្រមុំបានជូនដំណឹងដល់ខាងប្រុសឱ្យបានដឹង និងនៅតែទន្ទឹងរង់ចាំកូនស្រីត្រឡប់មកចូលរោងការវិញ តែមិនឃើញនាងមកវិញទេ ។ លុះដល់ល្ងាចថ្ងៃទី៦ មីនា ដើម្បីកុំឱ្យខ្មាសគេ ព្រោះភ្ញៀវក៏បានហៅរួចរាល់អស់នោះ ឪពុកម្ដាយទាំងសងខាងក៏បានពិភាក្សាជាមួយខាងកូនកំលោះដោយលើកកូនស្រីប្អូនឈ្មោះ អ៊ុន សិលា អាយុ ១២ឆ្នាំ ឱ្យចូលរោងការជំនួស ដែលនាងកំពុងរៀនថ្នាក់ទី៧ នៃវិទ្យាល័យប៊ុន រ៉ានី ហ៊ុន សែន ភ្នំជីសូរ តែដំណោះស្រាយនេះខុសនឹងច្បាប់ ហើយអាជ្ញាធរក៏បានចុះទៅឃាត់មិនឱ្យរៀបចំមង្គលការឡើយ ព្រោះកូនស្រីមិនទាន់គ្រប់អាយុ ។ នៅថ្ងៃទី៧ មីនា ទាំងឪពុកម្ដាយកូនក្រមុំ និងកូនកំលោះបានពិភាក្សាគ្នាដោយភាគីខាងឪពុកម្ដាយកូនក្រមុំបានឯកភាពសងថ្លៃបណ្ណាការទៅកូនកំលោះចំនួន២.៧៥០ដុល្លារអាមេរិក ដែលថ្លៃផ្ទះយកតែ១.៥០០ដុល្លារអាមេរិកនោះ ។
កូនកំលោះអភ័ព្វស្នេហ៍ឈ្មោះ ឈា មាន បានរៀបរាប់ថា ការមានចិត្ដប្រតិព័ទ្ធទៅលើនាងជាកូនក្រមុំនោះ គឺតាមរយៈសាច់ញាតិខាងនាងតែប៉ុណ្ណោះ ដែលបានណែនាំថា នាងជានារីម្នាក់មានចរិតលក្ខណៈស្លូតបូត សុភាពរាបសា ក៏បានឱ្យឪពុកម្ដាយចូលស្ដីដណ្ដឹងរៀបការធ្វើជាគូអនាគត តែដល់ថ្ងៃចូលរោងការ ស្រាប់តែនាងរត់បាត់ ។ នៅពេលឪពុកម្ដាយនាងមកប្រាប់ក៏មិនបានថាអ្វីដែរ នឹកស្មានថា នាងទៅលេងផ្ទះមិត្ដភក្ដិ២-៣ថ្ងៃ លុះដល់ថ្ងៃចូលរោងការនាងនឹងត្រឡប់មកវិញ តែរហូតដល់ថ្ងៃទី៧ មីនា នៅតែមិនឃើញស្រមោលនាងមកទៀត ប្រហែលជានាងមិនពេញចិត្ដរស់នៅជាប្ដី-ប្រពន្ធជាមួយរូបគេ ទើបនាងរត់ចោលផ្ទះបែបនេះ ។ កូនកំលោះខកចិត្ដបន្ដថា សម្លៀកបំពាក់បានទិញរួចរាល់អស់ ភ្ញៀវក៏បានអញ្ជើញអស់ហើយដែរ ហើយរូបគេក៏ស្រមៃនៅក្នុងចិត្ដថា នឹងបានក្រាបផ្ទឹមជាមួយនាងទទួលពរជ័យពីញាតិមិត្ដជិតឆ្ងាយ តែក្ដីស្រមៃនេះបានរលាយដូចអំបិលត្រូវទឹក ។
បើនិយាយពីបណ្ណាការនេះគឺថ្លៃផ្ទះតម្លៃ១.៥០០ដុល្លារ តែខាងប្រុសបានទាមទារឱ្យខាងកូនក្រមុំសងថ្លៃបណ្ណាការចំនួន២.៧៥០ដុល្លារអាមេរិក ដោយបូករួមទាំងការចំណាយផ្សេងៗទាំងអស់សម្រាប់ការខកខានដែលបង្កឡើងដោយកូនក្រមុំនេះ ។ ប្រជាពលរដ្ឋរស់នៅក្នុងភូមិនាំគ្នានិយាយថា កូនក្រមុំរត់ចោលរោងការនេះ នាងធ្វើជាកម្មការិនីរោងចក្រកាត់ដេរនៅរាជធានីភ្នំពេញ ពិតជាមានសង្សារហើយមើលទៅបានជាដល់ថ្ងៃរៀបមង្គលការមានគូអនាគតទៅហើយ ហ៊ានរត់ចោលបែបនេះ ។ ពិតជាកូនអត់លើកកិត្ដិយសឪពុកម្ដាយមែន ព្រោះថាបើមិនស្ម័គ្រ គួរតែប្រកែកឱ្យហើយទៅល្អជាង ។ «ថ្ងៃចូលរោងការបាត់រូបជីវ៉ា ប្រហារដួងចិត្ដ មេបាចាស់ទុំ អាចារ្យក្រមក្រឹត្យ ស្លាកស្នាមជីវិត គិតស្មានមិនដល់» ៕
ចែករំលែកព័តមាននេះ