រាជធានីភ្នំពេញ ៖ នៅសល់តែ២សប្តាហ៍ទៀតប៉ុណ្ណោះ កម្មវិធីប្រកួតប្រដាល់ដណ្តើមខ្សែក្រវាត់ជើងឯកកំពូលអ្នកប្រយុទ្ធគុនខ្មែរវគ្គ២ឈានដល់វគ្គពាក់កណ្តាលផ្តាច់ព្រ័ត្រហើយ ។ នៅថ្ងៃអាទិត្យ ទី៩ មីនា ស្អែកនេះ កម្មវិធីប្រកួតប្រដាល់នេះនឹងបន្តធ្វើនៅសង្វៀនទូរទស្សន៍ CTN ដែលមានទាំងអស់៦គូ ក្នុងនោះគូមិត្តភាពមានចំនួន១គូ ។
រាជធានីភ្នំពេញ ៖ នៅសល់តែ២សប្តាហ៍ទៀតប៉ុណ្ណោះ កម្មវិធីប្រកួតប្រដាល់ដណ្តើមខ្សែក្រវាត់ជើងឯកកំពូលអ្នកប្រយុទ្ធគុនខ្មែរវគ្គ២ឈានដល់វគ្គពាក់កណ្តាលផ្តាច់ព្រ័ត្រហើយ ។ នៅថ្ងៃអាទិត្យ ទី៩ មីនា ស្អែកនេះ កម្មវិធីប្រកួតប្រដាល់នេះនឹងបន្តធ្វើនៅសង្វៀនទូរទស្សន៍ CTN ដែលមានទាំងអស់៦គូ ក្នុងនោះគូមិត្តភាពមានចំនួន១គូ ។ ឯគូដែលជាបេក្ខភាពដណ្តើមខ្សែក្រវាត់ទាំង៥គូនោះគឺប្រភេទទម្ងន់៦៥គីឡូក្រាម២គូ ប្រភេទទម្ងន់៦០គីឡូក្រាម២គូ និងប្រភេទទម្ងន់៥៧គីឡូក្រាម១គូ ។
ប្រភេទទម្ងន់៦៥គីឡូក្រាមមាន ថៃ រិទ្ធី មកពីក្លិបនាគរាជគុនខ្មែរ ជួបជាមួយ មាស មើុ មកពីក្លិបទីបញ្ជាការកងទ័ពជើងគោក និងង៉ែត ប៊ុនធឿន មកពីក្លិបខេត្តកំពង់ធំ ជួបជាមួយ ឆៃ សារា៉ មកពីក្លិបមជ្ឈមណ្ឌលកីឡានៃកងយោធពលខេមរៈភូមិន្ទ ។ សម្រាប់២គូក្នុងប្រភេទទម្ងន់ធ្ងន់នេះ មានតែមាស មើុ ប៉ុណ្ណោះ ដែលអាចរកកន្លែងឈរជើងនៅវគ្គពាក់កណ្តាលផ្តាច់ព្រ័ត្រជាបន្តទៀតបានដោយស្វ័យប្រវត្តិ ដោយសារប្រកួតបាន៥លើក មិនដែលស្គាល់ចាញ់ម្តងណាឡើយ ។ ដូច្នេះការមកប៉ះ ថៃ រិទ្ធី លើកនេះ ទោះចាញ់ឬឈ្នះក៏គេមិនបារម្ភប៉ុន្មានដែរ ។ ចំណែក ថៃ រិទ្ធី បើសិនជាលើកនេះឈ្នះទៀត ទើបមានផ្លូវអ៊ុតខ្លះ ដោយសារគេប្រកួតបាន៥លើក ឈ្នះ៣លើកចាញ់២លើក ។ រីឯ ង៉ែត ប៊ុនធឿន និង ឆៃ សារា៉ វិញនោះ វាសនារបស់គេទាំង២មិនសូវល្អដូចគ្នា ជាពិសេស ង៉ែត ប៊ុនធឿន តែម្តង ដែលប្រកួតបាន៤លើកឈ្នះ២ចាញ់២ ។ ចំណែកឯ ឆៃ សារា៉ ប្រកួតបាន៥លើក ឈ្នះ៣ចាញ់២ ហើយលើកនេះបើសិនជាឈ្នះអាចមានសង្ឃឹមច្រើនក្នុងការស្វែងរកកន្លែងនៅវគ្គពាក់កណ្តាលផ្តាច់ព្រ័ត្រ ឯង៉ែត ប៊ុនធឿន កំពុងធ្លាក់ក្នុងក្រឡាយា៉ប់អាចជ្រុះចេញពីវគ្គនេះទៀតផង ។
ប្រភេទទម្ងន់៦០គីឡូក្រាម ដែលមានចំនួន២គូនោះគឺ ព្រីង ដារិន មកពីក្លិបខេត្តបាត់ដំបងជួបជាមួយ ចាន់ សំអាង មកពីក្លិបកងពលធំអន្តរាគមន៍លេខ៣ព្រះវិហារ និងថៃ ប៊ុនតត មកពីក្លិបនាគរាជគុនខ្មែរ ជួបជាមួយ ឌុន ប៊ុនធឿន មកពីក្លិបអេភូថងកីឡា ។ រវាង ព្រីង ដារិន និងចាន់ សំអាង សុទ្ធតែឆ្លងកាត់ការប្រកួតបាន៥លើកម្នាក់រួចមកហើយ ក្នុងនោះឈ្នះ២ចាញ់៣លើកដូចគ្នា ។ គូនេះមើលទៅសុទ្ធតែយា៉ប់ដូចគ្នា ទើបក្តីសង្ឃឹមក្នុងការឡើងទៅកាន់វគ្គពាក់កណ្តាលផ្តាច់ព្រ័ត្រស្ថិតក្នុងសន្ទស្សន៍តិចតួចណាស់ ។ ថៃ ប៊ុនតត និងឌុន ប៊ុនធឿន វិញ ក៏ឆ្លងកាត់ការប្រកួតបាន៥លើកម្នាក់រួចមកហើយដែរ ក្នុងនោះឈ្នះ៣ចាញ់២ដូចគ្នាទៀត លើកនេះពួកគេត្រូវការឈ្នះរៀងខ្លួនដើម្បីទទួលបានឱកាសឡើងទៅប្រកួតនៅវគ្គបន្តទៀត ។
ប្រភេទទម្ងន់៥៧គីឡូក្រាមដែលមានតែ១គូនោះគឺ ធែល សុភ័ក្រ មកពីក្លិបគជសារកីឡា ជួបជាមួយ ខុន ឆៃយា៉ន់ មកពីក្លិបកងពលធំអន្តរាគមន៍លេខ៣ព្រះវិហារ ។ ធែល សុភ័ក្ត្រ ពេលនេះមានតែផ្លូវហាលខោប៉ុណ្ណោះ ព្រោះកីឡាកររូបនេះប្រកួតបាន៥លើក ស្គាល់ឈ្មោះតែម្តងគត់ រីឯ ខុន ឆៃយា៉ន់ ប្រកួតបាន៥លើកឈ្នះ៣ចាញ់២ មិនដឹងថា គេមានវាសនាឡើងទៅដល់វគ្គ១/២ផ្តាច់ព្រ័ត្របានឬអត់?
ចែករំលែកព័តមាននេះ