រាជធានីភ្នំពេញ ៖ នៅល្ងាចថ្ងៃសៅរ៍ ទី៨ មីនានេះ កីឡាកររ៉ាក់ វិឆ័យ ជើងខ្លាំងប្រចាំក្លិបកងពលតូចលេខ៧០ និងកីឡាករឯម វិចិត្រ មកពីក្លិបឫទ្ធិពោធិសែនជ័យ នឹងជួបប្រកួតគ្នាជាថ្មីម្តងទៀតហើយនៅលើសង្វៀនទូរទស្សន៍បាយ័នស្ទឹងមានជ័យ បន្ទាប់ពីការប្រកួតលើកមុនបានលេចចេញលទ្ធផលប្រកបដោយចម្រូងចម្រាសបំផុត ។
រាជធានីភ្នំពេញ ៖ នៅល្ងាចថ្ងៃសៅរ៍ ទី៨ មីនានេះ កីឡាកររ៉ាក់ វិឆ័យ ជើងខ្លាំងប្រចាំក្លិបកងពលតូចលេខ៧០ និងកីឡាករឯម វិចិត្រ មកពីក្លិបឫទ្ធិពោធិសែនជ័យ នឹងជួបប្រកួតគ្នាជាថ្មីម្តងទៀតហើយនៅលើសង្វៀនទូរទស្សន៍បាយ័នស្ទឹងមានជ័យ បន្ទាប់ពីការប្រកួតលើកមុនបានលេចចេញលទ្ធផលប្រកបដោយចម្រូងចម្រាសបំផុត ។ ការប៉ះគ្នាលើកនេះមានការចោទសួរជាខ្លាំងថា រ៉ាក់ វិឆ័យ នឹងប្រើស្នៀតអ្វីទៀតបន្ទាប់ពីលើកមុនបានឈ្នះកីឡាករឯម វិចិត្រ ដោយប្រើល្បិចស៊ីឡាក់ម្តងនោះ ?
ពិតជាមានការភ្ញាក់ផ្អើលទៀតហើយជាមួយនឹងការប៉ះគ្នាដើម្បីសងសឹករវាងកីឡាករទាំងពីររូបនេះក្នុងជំនួបលើកទី២ ។ ការចាប់អារម្មណ៍មួយនេះ គឺបន្ទាប់ពីអ្នកដែលមានសមត្ថភាព និងមានកម្រិតប្រកួតវាយចេញបានល្អជាងក្នុងការប្រកួតកាលពីលើកទី១ បែរជាត្រូវឡើងរេញសងសឹកទៅលើកីឡាករដែលត្រូវគេមើលឃើញថាចាញ់ប្រៀប និងមានចំណុចខ្សោយជាងទាំងស្រុងក្នុងការប៉ះគ្នា ។ រំលឹកដល់ការប្រកួតកាលពីលើកនោះ អ្នកណាក៏ឃើញដែរថា កីឡាករឯម វិចិត្រ មានបទពិសោធន៍ខ្ពស់ជាង និងមានឱកាសវាយចេញល្អជាង ។ គេបានទាំងវាយសម្រុកទៅលើកីឡាកររ៉ាក់ វិឆ័យ ឱ្យឈានដល់ចំណុចទាល់ច្រកម្តងជាពីរដង ជាមួយនឹងស្នៀតយ៉ាងល្អឥតខ្ចោះ ដែលស្ទើរតែគ្មានស្នៀតណាមួយដែលអាចធ្វើឱ្យកីឡាកររ៉ាក់ វិឆ័យ គេចផុតនោះទៀតផង ។ ជំនួបកាលពីថ្ងៃទី២២ កុម្ភៈនោះ កីឡាកររ៉ាក់ វិឆ័យ មិនមានឱកាសណាមួយដែលត្រូវគេមើលឃើញថា អាចទប់ទល់បានជាមួយកីឡាករឯម វិចិត្រ នោះទេ ពិសេសក្នុងពេលដែល ឯម វិចិត្រ ស្ទុះស្ទាវាយសង្គ្រុបក្នុងអំឡុង២ទឹកដំបូងដែលសឹងតែធ្វើឱ្យគេរកកន្លែងតដៃមិនកើតនោះ ។
ឈានដល់ទឹកទី៣ កីឡាករឯម វិចិត្រ កាន់តែមានមោទនភាព និងស្ទុះវាយសង្គ្រុបលើ រ៉ាក់ វិឆ័យ ដើម្បីឱ្យគេសន្លប់ថែមទៀត ទើបធ្វើឱ្យគេស្ទុះស្ទាវាយសង្គ្រុបនាពេលនោះ រហូតឈានដល់ចំណុចភ្លាត់ស្នៀត ហើយនាំឱ្យខុសលក្ខន្តិកៈ ។ ឯម វិចិត្រ ត្រូវគេចាប់កំហុសភ្លាមៗបន្ទាប់ពីភ្លាត់វាយថែមទៅលើ រ៉ាក់ វិឆ័យ ព្រោះតែជក់ដៃវាយលុក ហើយ រ៉ាក់ វិឆ័យ ក៏ធ្វើជាប្រកាច់នឹងមួយដៃថែមនោះ រហូតមិនអាចបន្តការប្រកួតបាន ។ អ្នកទស្សនាគ្រប់គ្នាសម្តែងការរិះគន់ចំពោះ រ៉ាក់ វិឆ័យ យ៉ាងខ្លាំង ដែល ឯម វិចិត្រ វាយសម្រុកតាំងពីណាពីណី បែរជាអត់សន្លប់ ហើយមកសន្លប់នឹងមួយដៃថែមចុងក្រោយ ដែលអ្នកណាក៏មើលឃើញថា ជារឿងស៊ីឡាក់ ។ ទទួលបានឱកាសនោះ ទើបគេឃើញ រ៉ាក់ វិឆ័យ បន្តធ្វើប្រកាច់តែម្តងដែលឈានទៅដល់ការកាត់ក្តីដោយភាពចម្រូងចម្រាសមួយនៅទីបញ្ចប់ ។ ឯម វិចិត្រ បានបង្ហាញអារម្មណ៍ស្រយុតចិត្តយ៉ាងខ្លាំង បន្ទាប់ពី រ៉ាក់ វិឆ័យ យកលេសធ្វើសន្លប់ប្រកួតលែងកើត ហើយតម្រូវឱ្យក្រុមគណៈកម្មការសម្រេចកាត់ក្តីឱ្យគេចាញ់ក្នុងទឹកទី៣ ។ មិនត្រឹមតែត្រូវគណៈកម្មការបណ្តេញចុះដោយការអាម៉ាស់បុ៉ណ្ណោះទេ ឯម វិចិត្រ ថែមទាំងត្រូវដើរចេញពីរេញទាំងស្រក់ទឹកភ្នែក ព្រោះតែខឹងនឹងខ្លួនឯងនោះផង ។ នោះគឺបទពិសោធន៍មួយដែល ឯម វិចិត្រ ហាក់ចងចាំមកទល់ពេលនេះ ពិសេសនៅពេលរំលឹកដល់ការប្រកួតទាំងមូលជាមួយ រ៉ាក់ វិឆ័យ ។
ក្រោយការកាត់ក្តី កីឡាកររ៉ាក់ វិឆ័យ ត្រូវគេប្រើពាក្យពេចន៍ទ្រគោះបោះបោកឱ្យគួរសម ហើយក៏ធ្វើឱ្យគេទទួលជ័យជម្នះដោយបាត់បង់នូវទំនុកចិត្តមួយផ្នែកផងដែរ បើធៀបនឹងក្រេឌីតដែលគេធ្លាប់បានទទួលមុនៗ ។ ឯម វិចិត្រ ប្រាប់ថា លទ្ធផលមួយនោះនៅមិនបានធ្វើឱ្យលោកភ្លេចនោះទេ ហើយខ្លួនក៏ដេកមិនលក់ បក់មិនល្ហើយនោះដែរ មកទល់ពេលនេះ ។ អុីចឹងហើយ ទើបការប្រកួតល្ងាចនេះនឹងក្លាយទៅជាសង្វៀនដ៏ក្តៅគគុកមួយដែលលោកត្រូវតែបំបាក់ រ៉ាក់ វិឆ័យ ឱ្យខាងតែបាន សងភាពអាម៉ាស់មកវិញ ។ លោកសន្យាមិនឱ្យកើតមាននូវភាពភ្លាត់ស្នៀតដូចដែលបានជ្រុលជ្រួសកាលពីលើកមុននោះទេ ដោយបានទាំងអះអាងថា រ៉ាក់ វិឆ័យ ថ្ងៃនេះនឹងដឹងគ្នាជាមួយលោក ដោយគ្មានលក្ខខណ្ឌ ។ ផ្អែកតាមសមត្ថភាពជាក់ស្តែង ឯម វិចិត្រ មានស្នៀតច្បាស់ជាង ល្អជាង និងកម្លាំងពេញដូចគ្នា ។ ជាមួយនឹងការមើលឃើញនេះ ទើបគេសួរថា តើ រ៉ាក់ វិឆ័យ នឹងអាចទៅរួចទេ បើគ្មានឱកាសស៊ីឡាក់ដូចដែលគេបានធ្វើ ? យ៉ាងណាក៏ដោយ រ៉ាក់ វិឆ័យ ក៏មានស្នៀតមួយចំនួនពិបាកមើលស្រាលផងដែរ ដូចជាជង្គង់ និងកណ្តាប់ដៃ បើទោះជាគេមានសភាពវាយចេញស្ពឹក ដែលមិនរហ័សដូចកីឡាករឯម វិចិត្រ នោះក៏ដោយ ។ ក្រុមអ្នកតាមដាននិយាយថា បើ ឯម វិចិត្រ រក្សាជំហរវាយបានល្អដូចការជួបគ្នាលើកទី១ មានន័យថា រ៉ាក់ វិឆ័យ មិនមែនជាដៃគូនោះទេ ហើយបើ ឯម វិចិត្រ ស្រាប់តែពុះពោរដោយកំហឹងក្នុងការសងសឹកសម្រាប់លើកនេះទៀត នោះពិតជាធ្វើឱ្យ រ៉ាក់ វិឆ័យ នឹងកាន់តែយ៉ាប់ ។
បុ៉ន្តែ ឯម វិចិត្រ ក៏ត្រូវដាស់ស្មារតីខ្លួនឯងឱ្យបានជាប្រចាំផងដែរ ដើម្បីកុំឱ្យភ្លាត់ស្នៀតថែមខុស ព្រោះតែភាពរហ័សនោះ ។ ចំពោះការប្រកួតជម្រុះជុំទី៣ ឆ្ពោះទៅកាន់ការដណ្តើមពានរង្វាន់ BTV ទម្ងន់៥១គីឡូក្រាមនៅថ្ងៃសៅរ៍នោះដែរ កីឡាករចៅ រស់ មកពីក្លិបចាក់អង្រែមានជ័យ ជួបប្រកួតជាមួយកីឡាករអ៊ុន រតនា មកពីក្លិបតាឡីដំរីមានឫទ្ធិ ។ កាលពីជុំទី១ កីឡាករអ៊ុន រតនា វាយចាញ់ ជួប ជាង មកពីក្លិបនិរោធមានជ័យក្នុងទឹកទី៣ និងជុំទី២ វាយចាញ់ រិទ្ធ កៅ ដោយពិន្ទុ ដែលមានន័យថា ទោះជាគេឈ្នះសម្រាប់ជុំនេះ ក៏នឹងអស់ឱកាសឡើងវគ្គផ្តាច់ព្រ័ត្រដូចគ្នា ។ ចំណែក ចៅ រស់ គេវាយឈ្នះ១ប្រកួត និងចាញ់១ប្រកួត ដូច្នេះហើយទើបការយកឈ្នះលើកីឡាករអ៊ុន រតនា សម្រាប់ល្ងាចនេះគឺជារឿងសំខាន់ ។ កាលពីជុំទី១ ចៅ រស់ វាយឈ្នះ រិទ្ធ កៅ មកពីក្លិបមជ្ឈមណ្ឌលកីឡា ខ.ភ.ម ដោយពិន្ទុ និងជុំទី២ គេវាយចាញ់ពិន្ទុ ជួប ជាង អ្នកប្រដាល់ក្លិបនិរោធមានជ័យ ។ ការប្រកួតមួយគូទៀត កីឡាកររិទ្ធ កៅ មកពីក្លិបមជ្ឈមណ្ឌលកីឡា ខ.ភ.ម ប្រកួតជាមួយកីឡាករជួប ជាង មកពីក្លិបនិរោធមានជ័យ ។ អ្នកប្រដាល់ទាំងពីរនេះជួបគ្នាបីដងហើយ ដោយរិទ្ធ កៅ វាយចាញ់ពីរដង និង ឈ្នះម្តង ។
ក្នុងជុំទី១ រិទ្ធ កៅ វាយចាញ់ ចៅ រស់ ដោយពិន្ទុ និងជុំទី២ វាយឈ្នះ អុ៊ន រតនា ដោយពិន្ទុ ។ ចំណែក ជួប ជាង នៅជុំទី១ វាយឈ្នះ អ៊ុន រតនា ក្នុងទឹកទី៣ និងជុំទី២ វាយឈ្នះ ចៅ រស់ ដោយពិន្ទុ ។ ដូច្នេះពីរប្រកួតកន្លងមក រិទ្ធ កៅ វាយឈ្នះ១ ចាញ់១ បាន៤ពិន្ទុ ឯជួប ជាង បាន៦ពិន្ទុ ដែលមានន័យថា គេកំពុងជិះសេះលែងដៃ៕
ចែករំលែកព័តមាននេះ