រាជធានីភ្នំពេញ៖ មន្រ្តីជាន់ខ្ពស់គណបក្សប្រជាជនកម្ពុជា ( CPP ) លោកបណ្ឌិត ជាម យៀប និងជាប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារនិងសវនកម្មនៃរដ្ឋសភាបានមានប្រសាសន៏ស្វាគមន៏ចំពោះគម្រោងរៀបចំបើកសិក្ខាសាលាថ្នាក់ជាតិស្តីពីការកែទម្រង់ប្រព័ន្ឋបោះឆ្នោតនៅក្នុងប្រទេសកម្ពុជា ។
ការប្រកាសស្វាគមន៏របស់លោកបណ្ឌិត ជាម យៀប នៅពេលនេះ ធ្វើឡើងប្រមាណមួយម៉ោងប៉ុណ្ណោះ បន្ទាប់ពីលោក សម រង្ស៊ី ប្រធានគណបក្សសង្គ្រោះជាតិបានថ្លែងក្នុងសិក្ខាសាលាស្តីពីការកែទម្រង់ការបោះឆ្នោតនាព្រឹកថ្ងៃទី០៧ មីនា ២០១៤នេះដោយស្នើឲ្យគណបក្សប្រជាជនកម្ពុជា រួមគ្នាជាមួយគណបក្សសង្រ្គោះជាតិ និងសង្គមស៊ីវិល រៀបចំសិក្ខាសាលាថ្នាក់ជាតិមួយស្តីពីការកែទម្រង់ប្រព័ន្ឋបោះឆ្នោត ។
បើតាមលោកបណ្ឌិត ជាម យៀប សិក្ខាសាលានេះគង់តែរៀបចំធ្វើទេ ព្រោះកន្លងមកគណៈកម្មការចម្រុះមកពីគណបក្សទំាងពីរបានឯកភាពគ្នារួចរាល់ហើយ ហើយថានៅក្នុងជំនួបនាថ្ងៃទី១០ មីនា ២០១៤ខាងមុខនេះ គណៈកម្មការចម្រុះនឹងជជែកពិភាក្សាគ្នាអំពីប្រធានបទដែលត្រូវដាក់បញ្ចូលក្នុងសិក្ខាសាលានោះ ដែលក្នុងនោះមានការរៀបចំការចុះបញ្ជីឈ្មោះអ្នកបោះឆ្នោត និង ការបង្កើតខ្ទង់ថវិកាសម្រាប់គណបក្សនយោបាយចូលរួមប្រកួតប្រជែងក្នុងការបោះឆ្នោតជាដើម ។
ជាមួយគ្នានេះ យន្តការនៃការបោះឆ្នោត ការដោះស្រាយវិវាទក្នុងការបោះឆ្នោត និង បញ្ហាប្រព័ន្ឋផ្សព្វផ្សាយ ក៏នឹងត្រូវដាក់បញ្ជូលក្នុងការពិភាក្សាគ្នានោះផងដែរ ៕
ចែករំលែកព័តមាននេះ