ខេត្តស្ទឹងត្រែង ៖ ថ្មីៗនេះកសិករនៅខេត្តស្ទឹងត្រែងបាននាំយករុក្ខជាតិម្យ៉ាងដែលគេហៅតៗគ្នាថា«ម្អមផ្អែម» ជាអំបូនៃពូជម្អមមកដាំដុះ ដោយសាររុក្ខជាតិនោះមានរសជាតិផ្អែមដូចអំពៅ តែគ្មានក្លិនក្រអូបឈ្ងុយដូចម្អមស្រែនោះឡើយ។
ពូជរុក្ខជាតិ«ម្អមផ្អែម»ខាងលើនេះត្រូវបានកសិករនៅឃុំស្រែ ក្រសាំងយកមកដាំ និងដាក់បញ្ចូលជាដំណាំកសិកម្មប្រភេទថ្មីមួយទៀតទៅក្នុងវិស័យកសិកម្មដែលមានវត្តមាននៅក្នុងខេត្ត ហើយអាជ្ញាធរភូមិឃុំក៏កំពុងបំផុសកសិករដទៃទៀតជ្រើសដាំដើម្បីទាញយកផលប្រយោជន៍ពីដំណាំនេះផងដែរ ។
លោក អ៊ាង សំអូន មេឃុំស្រែក្រសាំងបានបញ្ជាក់ថា ដំណាំម្អមផ្អែមនេះ សម្រាប់បណ្តាខេត្តនៃប្រទេសកម្ពុជាយើងមិនដឹងថាមានដាំដុះនៅកន្លែងណាខ្លះទេ តែសម្រាប់ខេត្តស្ទឹងត្រែងគឺមិនទាន់មានអ្នកដាំដុះទាល់តែសោះ ព្រោះរុក្ខជាតិប្រភេទនេះកសិករយើងបាននាំយកពូជពីប្រទេសថៃមកដាំ ហើយហៅតៗគ្នាថា «ម្អមផ្អែម»។
លោកទទួលស្គាល់ថា តាមការពិនិត្យជាក់ស្តែង រុក្ខជាតិ«ម្អមផ្អែម»នេះមានឫស ដើម ស្លឹក និងផ្កា ដូចម្អមស្រែដែលខ្មែរយើងតែងយកទៅបង់បន្ថែមរសជាតិក្នុងសម្លដើម្បីឱ្យមានក្លិនក្រអូបឈ្ងុយ ចំណែកម្អមផ្អែមនេះគ្មានក្លិននោះទេ តែមានរសជាតិផ្អែមទៅវិញ។ លោកបន្តថា ម្អមផ្អែមនេះវាគ្មានក្លិនក្រអូបឈ្ងុយនោះទេ ប៉ុន្តែម្អមស្រែខ្មែរយើងក៏គ្មានរសជាតិផ្អែមដូចអំពៅនោះដែរ ខណៈយើងបេះម្អមផ្អែមយកមកទុំពារក្នុងមាត់វាមានរសជាតិផ្អែមពិតមែន វាខុសប្លែកពីម្អមស្រែខ្មែរយើង ។
លោកញ៉ រ៉ាន់ ជាកសិករនៅភូមិភ្នំក្រហម ឃុំស្រែក្រសាំង ស្រុកសៀមបូក ដែលជ្រើសយកការដាំម្អមផ្អែមនេះបានឱ្យដឹងថា តាមមន្ត្រីជំនាញកសិកម្មនៃប្រទេសថៃបានឱ្យដឹងថា ម្អមផ្អែមនេះគេហៅថា«ដើមញ៉ាវ៉ាន់ ឬស្ទេវា» ដែលស្ថិតក្នុងអម្បូរពពួករុក្ខជាតិទាំងដើមទាំងស្លឹកមានទឹក និងរសជាតិផ្អែមដូចអំពៅ ហើយនៅប្រទេសថៃកសិករនិយមដាំច្រើនសម្បើមណាស់ ។ លោកបន្តថា ម្អមផ្អែមនេះងាយស្រួលក្នុងការដាំដុះ មិនរើសប្រភេទដីនោះឡើយ ដូច្នេះកសិករផ្សេងៗអាចយកពូជទៅដាំបន្តបាន ព្រោះវាមានទីផ្សារនាំយកទៅលក់នៅក្រៅប្រទេស ហើយកសិផលនេះគេទទួលទិញដើម្បីចម្រាញ់យកទឹកធ្វើស្ក សម្រាប់ផលិតជាផលិតផលមានរសជាតិផ្អែមមិនប៉ះពាល់ដល់សុខភាពឡើយ។
លោកបន្ថែមថា នៅប្រទេសថៃ កសិករទីនោះគេដាំដុះម្អមផ្អែមច្រើនណាស់ ក្រោយការលូតលាស់ គេអាចច្រូតលក់ បើគិតជាលុយខ្មែរក្នុង១គីឡូក្រាមតម្លៃ៥០០០រៀល តែគាត់មិនទាន់បានច្រូតលក់នោះទេ គ្រាន់តែដាំយកពូជទុកសិន ហើយការដាំយកពូជនេះមិនមែនយកគ្រាប់នោះទេ គឺកាត់មែកណាដែលចាស់ៗជាពីរជាបីកំណាត់យកទៅដោតផ្សាំក្នុងកន្ទោង ។ លោកក៏បានបន្តទៀតថា ប្រសិនបើមានកសិករណាចង់ដាំដុះម្អមផ្អែម គាត់នឹងប្រាប់ពីវិធីដាំទាំងអស់ដោយមិនលាក់លៀមនោះទេ បើចង់កាត់ពីទីកន្លែងផ្ទាល់យកទៅដាំក៏បានឲ្យតែមើលទៅដើមនឹងចាស់ជាងគេ ហើយដើមនឹងយកទៅធ្វើជាពូជបាន ។
លោក ងិន សារ៉េត ប្រធានសហគមន៍ អ៊ុំឃួងរុងរឿង ស្ថិតក្នុងឃុំស្រែក្រសាំងបានគាំទ្រចំពោះការចែករំលែកពូជដំណាំម្អមផ្អែមនេះ ហើយសមាជិកសហគមន៍ និងនាំពូជយកមកដាំឱ្យបានច្រើនគ្នា ដើម្បីធ្វើឱ្យភូមិឃុំស្រែក្រសាំងមានផលិតផលមួយភូមិមួយថ្មីបន្ថែមទៀតគឺ«ម្អមផ្អែម»នេះ។
គួរបញ្ជាក់ថា នេះជាប្រភេទដំណាំមួយមុខទៀត ដែលកសិករឃុំស្រែក្រសាំងដាំអស់រយៈពេល២ឆ្នាំមកហើយ ដោយសាតែរុក្ខជាតិនេះដូចដើមម្អម ទើបពួកគាត់ដាក់ឈ្មោះថា«ម្អមផ្អែម» ចំណែកនៅប្រទេសថៃ អ្នកជំនាញកសិកម្មហៅថា«ស្មៅស្ទេវា» រុក្ខជាតិផ្អែម៕ (កែសម្រួលដោយ ៖ ធីតា)
ចែករំលែកព័តមាននេះ