ខេត្តប៉ៃលិន ៖ រហូតមកដល់ថ្ងៃទី២៧ ខែមីនា ឆ្នាំ២០២៥នេះ ប្រជាពលរដ្ឋ១គ្រួសារ រស់នៅក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន…
ខេត្តប៉ៃលិន ៖ រហូតមកដល់ថ្ងៃទី២៧ ខែមីនា ឆ្នាំ២០២៥នេះ ប្រជាពលរដ្ឋ១គ្រួសារ រស់នៅក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន បានលើកឡើងដោយសង្ឃឹមថា ទិន្នផលដំណាំទុរេនរបស់ខ្លួន នឹងកើនឡើងខ្ពស់ ខណៈពេលដែលឆ្នាំមុន ប្រមូលផលដំបូងលក់បានជាង១ម៉ឺនដុល្លារ ។
បើតាមប្រភពព័ត៌មានពីលោក ទូច ប៉ង់ អាយុជាង៥០ឆ្នាំ បានរៀបរាប់ឱ្យដឹងថា ៖ លោកបានដាំដើមទុរេនជាង២០០ដើម នៅលើដីចំការរបស់ខ្លួន ស្ថិតនៅក្នុងភូមិកូនភ្នំ សង្កាត់ប៉ៃលិន ក្រុងប៉ៃលិន ខេត្តប៉ៃលន អស់រយៈពេលជាង៧ឆ្នាំមកហើយ ក៏បានដុះលូតលាស់យ៉ាងល្អ និងបានប្រមូលផលជាលើកដំបូងកាលពីឆ្នាំ២០២៤ ដោយបេះលក់ឱ្យឈ្មួញទិញយកទៅទទួលទានជួបជុំគ្រួសារ បានថវិកាជាង១ម៉ឺនដុល្លារ ។
លោកបន្តទៀតថា ប៉ុន្តែនៅឆ្នាំថ្មីនេះ ក្រោយពេលដើមទុរេន បន្តលូតលាស់យ៉ាងល្អ និងបញ្ចេញផ្កាផ្លែ ច្រើនជាងឆ្នាំមុនទ្វេដង ដោយលោកសង្ឃឹមថា នៅពេលប្រមូលផលនាដើមខែឧសភា ឆ្នាំ២០២៥ ខាងមុខនេះ អាចនឹងបានថវិកាជាង២ម៉ឺនដុល្លារ ព្រោះលោកបានសង្កេតឃើញផ្លែទុរេនរបស់ខ្លួន នៅលើដើមនីមួយៗ មានសភាពធំថ្លុសល្អ ពោលគឺទាំងដើម និងផ្លែមានកម្លាំងល្អជាងឆ្នាំមុនៗ ខណៈដែលលោកបានរៀនផ្សំជីធម្មជាតិពីកសិករថៃ ។
លោកបញ្ជាក់ទៀតថា មូលហេតុ ដែលធ្វើឱ្យដើមទុរេន បញ្ចេញផ្កាផ្លែយ៉ាងល្អបែបនេះ គឺ ៖ ទី១. ដោយសារតែអាកាសធាតុអំណោយផលល្អ ទី២. ការថែទាំស្រោចទឹកដិតដល់ និងជាប់ឥតដាច់ និងទី៣. ការប្រើជីធម្មជាតិកំប៉ុស ដោយគ្មានសារធាតុគីមី ហើយធ្វើឱ្យផ្លែទុរេនមានរសជាតិឈ្ងុយឆ្ងាញ់ ខណៈពេលដែលលោកបានរៀនបច្ចេកទេសដាំ និងថែទាំទាំងអស់នេះ មកពីកសិករថៃផងដែរ ។
ទោះបីជាយ៉ាងណា ផ្លែទុរេនរបស់លោក ពិតជាមានឱជារសឈ្ងុយឆ្ងាញ់មែន ក្រោយពេលមានប្រជាពលរដ្ឋទិញយកទៅពិសានៅឯផ្ទះ ព្រោះការផ្សំសារធាតុជី មានលក្ខណៈស្តង់ដា ដែលធ្វើ ឱ្យដំណាំទុរេនរបស់ខ្លួនលូតលាស់ល្អខុសពីដំណាំដទៃទៀត ពោលគឺមានសភាពស្រស់ស្អាតពីមួយថ្ងៃទៅមួយថ្ងៃ ដែលធ្វើឱ្យលោកនឹងប្រពន្ធសង្ឃឹមទុកជាមុនថា នឹងទទួលបានផលគាប់ប្រសើរនាពេលប្រមូលផលឆាប់ៗខាងមុខ ៕
ចែករំលែកព័តមាននេះ