រាជធានីភ្នំពេញ ៖ ផ្លែទុរេនស្រស់កម្ពុជា ជើងដំបូងជាង១៧តោន ត្រូវបាននាំចេញជាផ្លូវការទៅកាន់ទីផ្សារប្រទេសចិន បន្ទាប់ពីបានឆ្លងកាត់ការត្រួតពិនិត្យ និងការបញ្ជាក់គុណភាពពីក្រសួងកសិកម្ម ស្របតាមពិធីសារ នៃការនាំចេញរួចមក នេះបើតាមការឲ្យដឹងពីអ្នកនាំពាក្យក្រសួងកសិកម្ម…
រាជធានីភ្នំពេញ ៖ ផ្លែទុរេនស្រស់កម្ពុជា ជើងដំបូងជាង១៧តោន ត្រូវបាននាំចេញជាផ្លូវការទៅកាន់ទីផ្សារប្រទេសចិន បន្ទាប់ពីបានឆ្លងកាត់ការត្រួតពិនិត្យ និងការបញ្ជាក់គុណភាពពីក្រសួងកសិកម្ម ស្របតាមពិធីសារ នៃការនាំចេញរួចមក នេះបើតាមការឲ្យដឹងពីអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ ។
លោក ឃឹម ហ្វីណង់ អ្នកនាំពាក្យក្រសួងកសិកម្ម បានឲ្យដឹងតាមប្រព័ន្ធតេឡេក្រាមនៅល្ងាចថ្ងៃទី១៧ ខែកក្កដា ឆ្នាំ២០២៥ថា
ទុរេនទាំងនេះ នឹងដឹកចេញតាមច្រកសមុទ្រ នៅថ្ងៃស្អែក និងគ្រោងទៅដល់ប្រទេសចិន ក្នុងរយៈពេល៩ថ្ងៃទៀត។ បើមិនមានអ្វីប្រែប្រួលទេ យើងនឹងមានទុរេន ៣កុងតឺន័រទៀត ត្រៀមដឹកជញ្ជូននាំចេញបន្ថែម នៅសប្តាហ៍ក្រោយ ។
លោកបានបញ្ជាក់ថា ៖ “នេះគឺជាការជោគជ័យថ្មីមួយទៀត សម្រាប់ការនាំចេញផ្លែឈើស្រស់របស់កម្ពុជា ទៅកាន់ទីផ្សារដ៏មានសក្តានុពលមួយនេះ ហើយក៏ជាសមិទ្ធផល នៃកិច្ចសហប្រតិបត្តិការរវាងរដ្ឋាភិបាលទាំងពីរ និងវិស័យឯកជន។ សូមចូលរួមអបអរសាទរដល់កសិករ និងម្ចាស់ចម្ការទាំងអស់គ្នាផង” ។
សូមជម្រាបថា ទុរេនកម្ពុជា ជើងដំបូង១៧តោន ត្រូវបាននាំចេញទៅប្រទេសចិន តាមកំពង់ផែក្រុងព្រះសីហនុ ក្រោយរដ្ឋបាលគយចិនទទួលស្គាល់ចំការទុរេន ១១២ចំការ និងរោងចក្រវេចខ្ចប់ប្រមាណ ៣០រោងចក្រ ។ នេះជាសមិទ្ធផលថ្មីមួយសម្រាប់កម្ពុជា ហើយទុរេនជាផលិតផលខេត្តត្បូងឃ្មុំ ។
ការនាំចេញផ្លែទុរេនកម្ពុជា ទៅលក់នៅលើទីផ្សាររបស់ប្រទេសចិន បានធ្វើឡើងដោយក្រុមហ៊ុន អេច អេហ្វ ហ្វ្រូត ឯ.ក (HF FRUIT LTD.) បានសហការជាមួយក្រុមហ៊ុននៅប្រទេសចិន បន្ទាប់ពីក្រុមបានសម្ពោធជាផ្លូវការ កាលពីថ្ងៃទី១ ខែឧសភា ឆ្នាំ២០២៥ នៅខេត្តត្បូងឃ្មុំ ។
មុននាំចេញ រដ្ឋបាលគយចិន បានពិនិត្យគុណភាព អនាម័យ ភូតគាមអនាម័យ និងសុវត្ថិភាពយ៉ាងម៉ត់ចត់ នូវផ្លែទុរេនស្រស់ដែលមកពីចំការចំនួន ១១២ និងរោងចក្រវេចខ្ចប់ ៣០ ។ តាមគម្រោង ក្រុមហ៊ុន អេច អេហ្វ ហ្វ្រូត ឯ.ក នឹងបន្តនាំចេញទុរេនរាប់សិបតោនទៅកាន់ទីផ្សារប្រទេសចិន តាមរយៈការប្រមូលទិញពីកសិករ ដែលដាំទុរេនក្នុងខេត្តត្បូងឃ្មុំទាំងអស់ ដោយកំណត់ទិញទៅតាមទំហំផ្លែ ប្រភេទផ្លែ និងគុណភាព នៃផ្លែទុរេន តាមតម្លៃទីផ្សាជាក់ស្តែង ។
សូមជម្រាបថា ប្រទេសកម្ពុជា មានផ្ទៃដីដាំដុះដំណាំទុរេន ចំនួនប្រមាណជាង ១០,០០០ហិកតា ក្នុងនោះផ្ទៃដីប្រមូលផល មានចំនួនជាង ៧០០ហិកតា ដែលអាចទទួលបរិមាណផលប្រមាណជាង ១២០,០០០តោនក្នុង១ឆ្នាំ។ ដោយឡែកសម្រាប់ខេត្តត្បូងឃ្មុំ បច្ចុប្បន្នមានផ្ទៃដីដាំដុះដំណាំទុរេនទូទាំងខេត្ត សរុបប្រមាណ ៩៥០ហិកតា ផ្ទៃដីប្រមូលផលចំនួន ៦៨៥ហិកតា និងទទួលបានបរិមាណផលប្រមាណ ១០,០០០ តោន៕
ចែករំលែកព័តមាននេះ