ខេត្តប៉ៃលិន ៖ នៅក្នុងចំការដ៏ធំល្វឹងល្វើយមួយកន្លែង ដែលមានពេញទៅដោយដើមឫស្សីរាប់ពាន់គុម្ព ស្ថិតនៅចំណុចក្បាលឡាន ក្នុងភូមិភ្នំស្ពង់ ឃុំសាលាក្រៅ ស្រុកសាលាក្រៅ ខេត្តប៉ៃលិន គឺមានប្រជាពលរដ្ឋមួយគ្រួសារ…
ខេត្តប៉ៃលិន ៖ នៅក្នុងចំការដ៏ធំល្វឹងល្វើយមួយកន្លែង ដែលមានពេញទៅដោយដើមឫស្សីរាប់ពាន់គុម្ព ស្ថិតនៅចំណុចក្បាលឡាន ក្នុងភូមិភ្នំស្ពង់ ឃុំសាលាក្រៅ ស្រុកសាលាក្រៅ ខេត្តប៉ៃលិន គឺមានប្រជាពលរដ្ឋមួយគ្រួសារ បានចំណាយដីដ៏ច្រើននេះ ដាំដើមឫស្សីសម្រាប់យកទៅទល់ដើមមៀនប៉ៃលិន ពេលដែលមានផ្លែច្រើន ការពារកុំឱ្យបាក់ដើម ថែមទាំងលក់ឱ្យអ្នកភូមិយកទៅប្រើប្រាស់ធ្វើសម្ភារៈផ្សេងៗ។ រីឯទំពាំង ម្ចាស់ចំការប្រមូលផលយកឱ្យកម្មករធ្វើម្ហូបអាហារ និងទុកសម្រាប់ទទួលទានខ្លួនឯង ព្រមទាំងលក់ដូរ ឱ្យប្រជាពលរដ្ឋក្នុងភូមិ និងរហូតដល់រាជធានីភ្នំពេញ។
បើតាមការរៀបរាប់ពីបុរសម្នាក់ ឈ្មោះ ភក្តី អាយុ២៥ឆ្នាំ ជាកម្មករក្នុងចំការខាងលើ បានរៀបរាប់ឱ្យដឹងនៅថ្ងៃទី១៨ ខែមីនា ឆ្នាំ២០២៥នេះថា ម្ចាស់ចំការឫស្សីខាងលើ មាន ឈ្មោះ កែម ភេទប្រុស អាយុ៧០ឆ្នាំ រស់នៅក្នុងភូមិភ្នំស្ពង់ ដោយគាត់បានដាំចំការឫស្សីនេះអស់រយៈពេលជាច្រើនឆ្នាំមកហើយ ក៏ធំលូតលាស់យ៉ាងល្អ អាចកាប់យកទៅប្រើប្រាស់ទល់ដើមមៀនប៉ៃលិន ពេលដែលមានផ្លែច្រើន ដើម្បីការពារកុំឱ្យបាក់មែក ឬរលំដើម ពេលមានខ្យល់បោកបក់ខ្លាំង។ ប្រភពដដែលបានបន្តទៀតថា ចំការឫស្សីខាងលើនេះ ត្រូវបានម្ចាស់កាប់ដើមជារៀងរាល់ឆ្នាំ ខណៈពេលដែលគាត់ដាក់អកម៉ូនបញ្ចេញផ្លែមៀនប៉ៃលិន រាប់ពាន់ដើមនៅក្នុងចំការក្បែរនោះ។
លោកបន្ថែមទៀតថា ទោះបីជាយ៉ាងណា ការដាំដើមឫស្សីនេះ គឺម្ចាស់ចំការដាំនៅរដូវវស្សា ដោយមិនចំណាយថវិកា ក្នុងការបូមទឹកស្រោចឡើយ ដោយគ្រាន់តែដាំរួច ក៏ត្រូវទឹកភ្លៀង បណ្តាលឱ្យដុះលូតលាស់យ៉ាងល្អ ហើយថៅកែចំការ ក៏បានឱ្យកម្មករកាត់ដើមណា ដែលអាចប្រើការបាន យកទៅទល់ដំណាំរបស់គាត់ មិនឱ្យបាក់មែក ឬដួលខូតខាតនោះឡើយ។ មិនត្រឹមតែយកទៅទល់ដំណាំប៉ុណ្ណោះទេ ដើមឫស្សីដ៏ខ្ពស់ត្រង់ទៅលើនេះ ត្រូវបានប្រជាពលរដ្ឋរស់នៅក្នុង ភូមិចូលទៅទិញ ដើម្បីយកទៅធ្វើជារនាបគ្រែ ឬធ្វើជារនូតផ្ទះ និងធ្វើជារបងក្រោលគោនៅតាមភូមិថែមទៀតផងដែរ។
លោកក៏បញ្ជាក់ថែមទៀតថា ចំការឫស្សីដ៏ធំល្វឹងល្វើយនេះ ជាផ្នែកមួយជួយទប់ខ្យល់ ដែលបក់បោកមកពីទិសខាងលិច មិនឱ្យដួលរលំដើមតាង៉ែនរបស់ថៅកែថែមទៀតផង ព្រោះដើមឫស្សីបានឈរបាំងខ្យល់យ៉ាងរឹងមាំ ទោះបីជាមានភ្លៀងលាយដោយខ្យល់កន្ត្រាក់ក៏មិនអាចធ្វើឱ្យដួលរលំផ្ទះឬដំណាំនៅពីក្រោយគុម្ពឫស្សីទាំងនោះបានឡើយ។
សូមបញ្ជាក់ផងដែរថា ដើមឫស្សីពិតជាអត្ថប្រយោជន៍ជាច្រើនសម្រាប់ប្រជាពលរដ្ឋក្នុងភូមិ ដែលមានជំនាញ អាចយកទៅផលិតជាគ្រឿងសិប្បកម្ម ដូចជា ចង្អេរ, កញ្ជើ,ល្អី, បង្គី, កញ្ច្រែង និងសម្ភារៈផ្សេងៗជាច្រើនទៀត លក់បាន ថវិកាសម្រាប់ផ្គត់ផ្គង់ជីវភាពប្រចាំថ្ងៃផងដែរ ។ រីឯដើមឫស្សីតូចៗល្មម គេអាចយកទៅកាត់ជាកង់ៗ ដើម្បីដុតនំក្រឡានថែមទៀតដែរ។ ដូច្នេះ ប្រសិននរណាម្នាក់ មានជំនាញខាងលើ ត្រូវការដើមឫស្សី អាចទៅរកទិញម្ចាស់ចំការខាងលើ ដោយគាត់លក់ដូរក្នុងតម្លៃសមរម្យ៕
ចែករំលែកព័តមាននេះ