ខេត្តកំពង់ស្ពឺ ៖ បុរសជាសង្សារត្រូវបាននគរបាលស្រុកសំរោងទងធ្វើការឃាត់ខ្លួនបានភ្លាមៗតាមបណ្តឹងរបស់ស្ត្រីម្នាក់ ខណៈដែលអ្នកទាំងពីរទាស់ពាក្យសម្តីគ្នារឿងលុយរកស៊ី ហើយស្ត្រីរូបនោះមិនព្រមសងក៏ក្លាយទៅជាហិង្សា ប្រុសស្នេហ៍ទាញសោរសូឡិចវាយស្ត្រីជាសង្សារបែកក្បាលហូរឈាមតែម្តង។
ការបង្កហិង្សានិងឃាត់ខ្លួនប្រុសស្នេហ៍វាយសង្សារខ្លួនឯងនេះកាលពីវេលាម៉ោង០២និង៣០នាទីរសៀលថ្ងៃទី១១ ខែតុលា ឆ្នាំ២០២៥ នៅក្នុងភូមិអង្គតាឡឹក ឃុំសំបូរ ស្រុកសំរោងទង ខេត្តកំពង់ស្ពឺ។
នគរបាលស្រុកសំរោងទងបាននិយាយឱ្យដឹងថា នៅមុនពេលឈានដល់ឃាត់ខ្លួនប្រុសស្នេហ៍ខាងលើដែលប្រើហិង្សា(បង្ករបួសស្នាម)លើសង្សារខ្លួនឯងនេះគឺ សមត្ថកិច្ចនគរបាលបានទទួលពាក្យបណ្តឹងពីឈ្មោះ រុន សុខុន ភេទស្រី អាយុ៣៨ឆ្នាំ ស្នាក់នៅផ្ទះជួលក្នុងភូមិអង្គតាឡឹក ឃុំសំបូរ ស្រុកសំរោងទង ខេត្តកំពង់ស្ពឺ។ នាងបានដាក់ពាក្យបណ្តឹងទៅលើឈ្មោះ គឹម សំណាង ភេទប្រុស អាយុ៤០ឆ្នាំ រស់នៅក្នុងភូមិ៧ សង្កាត់ផ្សារដេប៉ូ២ ខណ្ឌទួលគោក រាជធានីភ្នំពេញ (ត្រូវជាសង្សារ)។ នៅក្នុងពាក្យបណ្តឹងបានរៀបរាប់ថា កាលពីវេលាម៉ោង០២រសៀលថ្ងៃទី១១ ខែតុលា នាងបានរៀបចំរ៉ឺម៉ករើរចេញពីផ្ទះជួលទៅរស់នៅឯរាជធានីភ្នំពេញ ក៏ស្រាប់តែបុរសជាសង្សារខាងលើបានជិះម៉ូតូ០១គ្រឿង ម៉ាកហុងដា សេ១២៥ ពណ៌ខ្មៅ ស៊េរីឆ្នាំ២០២២ ពាក់ផ្លាកលេខភ្នំពេញ1JG-2463 មកសួរនាំថាហេតុអីបានរើផ្ទះចេញ ហើយមិនសងលុយសោះចឹង ក៏កើតបានទាស់ពាក្យសម្តីគ្នា។
នគរបាលស្រុកសំរោងទងបានបន្តថា ពេលទាស់ពាក្យសម្តីនោះឈ្មោះសំណាងក៏បានយកមេសោរម៉ាកសូឡិចវាយត្រូវចំក្បាលស្ត្រីជាសង្សារបណ្តាលឱ្យរងរបួសហូរឈាម បង្កឱ្យមានការភ្ញាក់ផ្អើលតែម្តង។ ក្រោយមកសមត្ថកិច្ចនគរបាលបានហៅអ្នកទាំងពីរមកសាកសួរ នៅប៉ុស្តិ៍នគរបាលរដ្ឋបាលឃុំសំបូរ ។ ពេលសួរនាំជនដៃដល់ដែលជាសង្សារបានឆ្លើយសារភាពថាខ្លួនពិតជាបានវាយទៅលើស្ត្រីរងគ្រោះ ពិតប្រាដកមែន ។ មូលហេតុដោយសារតែទាស់ពាក្យសម្តីរឿងលុយរកស៊ីជាមួយគ្នា ហើយនាងជំពាក់លុយមិនសងសោះ។
បច្ចុប្បន្នបុរសជាប្រុសស្នេហ៍ត្រូវបាននគរបាលធ្វើការឃាត់ខ្លួន នៅអធិការដ្ឋាននគរបាលស្រុកសំរោងទងធ្វើការសួរនាំ និងកសាងសំណុំរឿងដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ