រាជធានីភ្នំពេញ ៖ ជ័យជម្នះរបស់ក្រុមបាល់ទាត់សាកលវិទ្យាល័យអាស៊ីអឺរុ៉បទៅលើក្រុមបាល់ទាត់សាកលវិទ្យាល័យបៀលប្រាយ ក្នុងលទ្ធផល៣-២ ក្នុងការប្រកួតនៅលើទីលានពហុកីឡដ្ឋានជាតិ កាលពីថ្ងៃទី១ មីនា បាននាំឱ្យក្រុមថ្មីមួយនេះឡើងមកនៅលេខរៀងទី៨ វិញក្នុងតារាង ហើយត្រូវបានគេចាត់ទុកថា ជាជ័យជម្នះគួរឱ្យកត់សម្គាល់បំផុតនៅក្នុងក្របខ័ណ្ឌបាល់ទាត់ Metfone Cambodian Leaque ២០១៤ ។
លោកប៊ុន សម្បត្តិ គ្រូបង្ហាត់របស់ក្រុមសាកលវិទ្យាល័យអាស៊ីអឺរុ៉បបានឱ្យដឹងថា ក្រុមសាកលវិទ្យាល័យបៀលប្រាយគឺជាក្រុមមួយខ្លាំង មិនងាយនឹងបំបាក់ឡើយ ហើយក៏ជាក្រុមដែលធ្លាប់មានបទពិសោធន៍ខ្ពស់ក្នុងការលេងបាល់ទាត់អស់រយៈពេលជាច្រើនឆ្នាំមកហើយដែរ ។ ចំណែកឯក្រុមសាកលវិទ្យាល័យអាស៊ីអឺរុ៉បវិញ គឺជាក្រុមក្មេងខ្ចីជាងគេ មិនសូវមានបទពិសោធន៍ក្នុងការលេងកីឡាបាល់ទាត់នេះឡើយ ។ បុ៉ន្តែគេអាចបង្កើតបាននូវភាពភ្ញាក់ផ្អើលគួរឱ្យកត់សម្គាល់មួយ និងមិនគួរឱ្យជឿឡើយ ។ គ្រាន់តែនៅក្នុងតង់ទី១ បុ៉ណ្ណោះ គេអាចយកឈ្នះលើក្រុមសាកលវិទ្យាល័យបៀលប្រាយ ក្នុងលទ្ធផល៣-០ នាំមុខមុនរួចទៅហើយ ។ ទោះបីយ៉ាងណា ក្រុមសាកលវិទ្យាល័យបៀលប្រាយបានតាមរកគ្រាប់បាល់សង២គ្រាប់វិញនៅមុនម៉ោងបញ្ចប់ការប្រកួត៩០នាទី ។ លោកបានបន្តឱ្យដឹងទៀតថា ជ័យជម្នះដ៏ត្រចះត្រចង់នេះ គឺបានកើតឡើងដោយសារតែការលេងមានការសហការគ្នាយ៉ាងល្អពីកីឡាកររួមក្រុមតែបុ៉ណ្ណោះ ។
លោកបានបញ្ជាក់ពីគោលជំហររបស់ក្រុមបាល់ទាត់សាកលវិទ្យាល័យអាស៊ីអឺរុ៉បថា កាលពីដើមរដូវកាល អាស៊ីអឺរុ៉បព្យាយាមមិនដាក់កីឡាករបរទេសឱ្យចូលលេងឡើយ ធ្វើឱ្យក្រុមមួយនេះចាញ់ប្រៀបគេយ៉ាងខ្លាំង ព្រោះគ្រប់ក្រុមទាំងអស់សុទ្ធតែដាក់កីឡាករបរទេសចូលលេង ។ ហេតុនេះហើយទើបធ្វើឱ្យក្រុមសាកលវិទ្យាល័យអាស៊ីខិតចូលទៅក្នុងតំបន់កាត់ចោលជាច្រើនលើកច្រើនសា បុ៉ន្តែពេលនេះដោយសារតែបានការជួយឧបត្ថម្ភពីសាលារៀនខេមអេលីត ធ្វើឱ្យក្រុមសាកលវិទ្យាល័យអាស៊ីអឺរុ៉បមានលទ្ធភាពក្នុងការដាក់កីឡាករបរទេសចូលលេង និងអាចនាំឱ្យក្រុមមួយនេះទទួលបានលទ្ធផលដ៏គួរឱ្យភ្ញាក់ផ្អើលបែបនេះ ហើយបានឃ្លាតចេញពីតំបន់កាត់ចោល ដោយឡើងមកនៅលេខរៀងទី៨ ក្នុងតារាងវិញ ៕
ចែករំលែកព័តមាននេះ