ប្រទេសប្រេស៊ីល ៖ ប្រទេសប្រេស៊ីលដោយបន្តវោហាសាសន៍ប្រឆាំងប្រធានាធិបតីបារាំងលោកអេមម៉ានុយអែលម៉ាក្រុន កាលពីយប់ថ្ងៃទី២៦មក២៧សីហាបានបដិសេធ មិនខ្ចីទទួលយកជំនួយបន្ទាន់ដែលស្នើដោយបណ្ដាប្រទេសអ្នកមាននៃក្រុមG7 ដើម្បីទប់ទល់នឹងភ្លើងឆេះព្រៃអាម៉ាហ្សូន។ ប្រទេសនេះអះអាងថាភ្លើងឆេះព្រៃអាម៉ាហ្សូនដែលនៅរាលដាលនៅឡើយនាដើមសប្ដាហ៍នេះ ឥឡូវស្ថិតក្រោមការត្រួតត្រាហើយ។
មេដឹកនាំរបស់ប្រទេសមហាឧស្សាហកម្មទាំង៧ បានសន្យាផ្ដល់ជំនួយបន្ទាន់២០លានដុល្លារសម្រាប់បញ្ជូនបណ្ដាយន្តហោះទម្លាក់ទឹកបន្ថែមទៀត ជួយពន្លត់ភ្លើងឆេះព្រៃអាម៉ាហ្សូន។ ប៉ុន្តែនាយកខុន្ទកាល័យប្រធានាធិបតីប្រេស៊ីលលោក JAIR BOLSONAROប្រកាសថា ប្រេស៊ីលបដិសេធមិនទទួលជំនួយនេះរបស់G7 ដើម្បីប្រយុទ្ធតតាំងនឹងភ្លើងឆេះព្រៃអាម៉ាហ្សូនឡើយ។ ប្រធានាធិបតីប្រេសីុលដែលខឹងនឹងពាក្យរិះគន់របស់ប្រធានាធិបតីបារាំងនិងបំណងរបស់លោកចង់ឲ្យមានទណ្ឌកម្មអន្តរជាតិប្រឆាំងប្រេស៊ីលព្រោះរឿងភ្លើងឆេះព្រែអាម៉ាហ្សូននោះ បានប្រាប់ទៅលោកម៉ាក្រុនថា ឲ្យគិតតែពីខ្លួនឯង ផ្ទះរបស់លោកនិងបណ្ដាអាណានិគមរបស់ខ្លួនបានហើយ។
ប្រមុខខុន្ទកាល័យរូបនោះលោកONYX LORENZONIថ្លែងថា យើងអរគុណហើយដល់G7សម្រាប់ជំនួយនោះ ប៉ុន្តែទឹកប្រាក់នេះអាចទុកប្រើសម្រាប់ដាំដើមឈើឡើងវិញរបស់អឺរ៉ុបទៅ។
ប្រឈមមុខនឹងភាពធ្ងន់ធ្ងរនៃភ្លើងឆេះបំផ្លាញព្រៃសំខាន់បំផុតនោះនៃពិភពលោក ប្រទេសមហាឧស្សាហកម្មទាំង៧ដែលរួមប្រជុំកំពូលនៅទីក្រុងBIARRITZបារាំង បានសន្យាផ្ដល់ជំនួយបន្ទាន់២០លានដុល្លារ សម្រាប់បញ្ជូនបណ្ដាយន្តហោះទម្លាក់ទឹកបន្ថែមទៀត។ម្យ៉ាងវិញទៀតG7បានព្រមព្រៀងគ្នាលើផែនការជំនួយមួយមានទឹកប្រាក់យ៉ាងតិច៣០លានដុល្លារ សម្រាប់ដាំដើមឈើឡើងវិញក្នុងកម្រិតអ.ស.ប៕ កែសម្រួលដោយ ៖ សុឃាក់
ចែករំលែកព័តមាននេះ