ប្រទេសអុីស្រាអែល-លីបង់ ៖ ប្រមុខក្រុមហេសប៊ុលឡាហ៍លីបង់លោក ហាសាន់ ណាស្ត្រាលឡាហ៍ កាលពីថ្ងៃទី២៥ សីហា បានគំរាមអុីស្រាអែលធ្វើការសងសឹកវិញបន្ទាប់ពីការវាយប្រហារដោយដ្រូនប្រដាប់អាវុធប្រឆាំងទីតាំងរបស់ចលនាប្រដាប់អាវុធស៊ីអុីតលីបង់ដ៏ខ្លាំងនោះក្នុងទីក្រុងបេរូត ។ ដ្រូន២បានផ្ទុះក្នុងសង្កាត់មួយនាភាគខាងត្បូងក្រុងបេរូត ។ ដ្រូនមួយបានផ្ទុះជិតអគារមួយប្រើជាការិយាល័យទំនាក់ទំនងរបស់ពួកហេសប៊ុលឡាហ៍ ។
ក្នុងសុន្ទរកថា មួយផ្សាយបន្តផ្ទាល់តាមអេក្រង់យក្សមួយនៅមុខមណ្ដាអ្នកគាំទ្រក្នុងតំបន់ជាយក្រុងនោះលោក ណាស្រាលឡាហ៍ និយាយថា ចំពោះអ្វីដែលកើតមានកាលពីយប់ថ្ងៃទី២៤ សីហា ជាការវាយប្រហារប្រើដ្រូនអត្តឃាតប្រឆាំងគោលដៅយើងមួយនាជាយក្រុងភាគខាងត្បូងក្រុងបេរូត ។
លោក ណាស្រាលឡាហ៍ ដែលចលនា ហេសប៊ុលឡាហ៍ របស់លោកជាសត្រូវរបស់អុីស្រាអែលនោះ ពុំបានបញ្ជាក់ឡើយថា តើគោលដៅនោះជាគោលដៅអ្វីឡើយ ។ លោកហៅការវាយប្រហារនោះថា ជាអំពើឈ្លានពានលើកដំបូងរបស់អុីស្រាអែលនៅលីបង់ ចាប់តាំងពីសង្គ្រាមរវាងប្រទេសទាំង២កាលពីឆ្នាំ២០០៦មក ។ លោកបន្តថា ខ្ញុំនិយាយទៅកាន់ទាហានអុីស្រាអែលនៅព្រំដែនថា ចាប់ពីយប់នេះទៅចូរពួកអ្នកត្រៀមខ្លួនហើយរង់ចាំមួយថ្ងៃ ២ថ្ងៃ ឬ៣ថ្ងៃ ថាតើនឹងមានអ្វីកើតមាន ។
ប្រមុខហេសប៊ុលឡាហ៍គូសបញ្ជាក់ថា ដ្រូនស៊ើបការណ៍មួយបានហោះហើរកាលពីយប់ថ្ងៃទី២៤ សីហា ក្នុងកម្ពស់យ៉ាងទាបពីលើតំបន់ជាយក្រុងបេរូតភាគខាងត្បូង ហើយហោះតាមពីក្រោយដោយដ្រូនប្រដាប់អាវុធមួយគ្រឿង ហើយដ្រូនទាំង២ត្រូវបានបំផ្ទុះ។ ការវាយប្រហារដោយដ្រូននេះបើតាមពួកហេសប៊ុនឡាហ៍ថា បណ្ដាលឲ្យមានការខូតខាតនានាតែពុំមានជនរងគ្រោះឡើយ ។
លោក ណាស្ត្រាលឡាហ៍ ដែលយុទ្ធជនរបស់លោកចូលរួមប្រយុទ្ធក្នុងសង្គ្រាមស៊ីរីជួយខាងកងទ័ពរដ្ឋាភិបាល លើកឡើងម្យ៉ាងទៀតពីការវាយប្រហារតាមអាកាសរបស់អុីស្រាអែល កាលពីយប់ថ្ងៃទី២៤ សីហា ដែរនៅជិតក្រុងដាម៉ាស់ ។ លោកថា នៅកន្លែងរងការវាយប្រហារនោះមានតែពួកយុវជន ហេសប៊ុលឡាហ៍ វ័យក្មេងសម្រាកហើយបណ្ដាលឲ្យពួកគេស្លាប់២នាក់ ។ លោកបដិសេធការអះអាងរបស់អុីស្រាអែលដែលថា ការវាយប្រហារនេះគឹសំដៅលើទីតាំងកងឆ្មាំបដិវត្តន៍អុីរ៉ង់នៅស៊ីរី ៕
កែសម្រួលដោយ ៖ សំណាង
ចែករំលែកព័តមាននេះ