ទីក្រុងហ្កាហ្សា៖ លើកនេះច្បាស់ហើយ ក្រុមហាម៉ាស់ប្រកាសថាខ្លួនមិនទម្លាក់អាវុធចុះជាដាច់ខាត។ នៅក្នុងបទសម្ភាសថ្មីៗនេះ មន្ត្រីជាន់ខ្ពស់របស់ហម៉ាស់ថ្លែងថាហាម៉ាស់តាំងចិត្តថាត្រូវតែមើលការខុសត្រូវទៅលើប្រព័ន្ធសន្តិសុខនៅតំបន់ហ្កាហ្សានៅក្នុងសម័យអន្តរកាលដែលកំពុងមានបទឈប់បាញ់។ មន្ត្រីរូបនេះមិនធានាថាយុទ្ធជនរបស់ក្រុមហាម៉ាស់នឹងកាត់រំសាយអាវុធនោះទេ។
ការថ្លែងដូច្នេះដើម្បីឆ្លើយតបទៅនឹងការទាមទាររបស់លោកត្រាំ និងអ៊ីស្រាអែលដើម្បីធ្វើជាបុរេលក្ខខណ្ឌនៃការអនុវត្តផែនការសន្តិភាពដំណាក់កាលបន្តបន្ទាប់ទៀត។ តាមពិតការដោះលែងចំណាប់ខ្មាំង និងការប្រគល់សាកសពចំណាប់ខ្មាំងគ្រាន់តែជាដំណោះស្រាយដ៏តូចមួយតែប៉ុណ្ណោះ។ នៅមានបញ្ហាស៊ីជម្រៅដែលស្មុគស្មាញជាងនេះជាច្រើនទៀតដែលមិនទាន់មានដំណោះស្រាយ។
មន្ត្រីជាន់ខ្ពស់របស់ក្រុមហាម៉ាស់ លោកមហាមេត ណាហ្សាល់ (Mohammed Nazzal) ថ្លែងថាក្រុមរបស់លោកត្រៀមខ្លួនទទួលយកបទឈប់បាញ់រយៈពេល៥ឆ្នាំដើម្បីយកឱកាសនេះកសាងតំបន់ហ្កាហ្សាឡើងវិញបន្ទាប់ពីរងគ្រោះយ៉ាងដំណំដោយសារសង្គ្រាមរយៈពេល២ឆ្នាំកន្លងទៅនេះ។ ចំពោះរបាយការណ៍ថាហាម៉ាស់ចាប់ផ្ដើមពង្រឹងកម្លាំង និងចាត់ការក្រុមដែលប្រឆាំងនឹងខ្លួននោះ លោកណាហ្សាល់សូមការពារចំណាត់ការនេះ។ លោកចាត់ទុកថាក្រុមបងធំដែលធ្លាប់អុកឡុកតំបន់ហ្កាហ្សានៅពេលហាម៉ាស់ជាប់ដៃធ្វើសង្គ្រាមនោះពួកគេជាឧក្រិដ្ឋជនដែលសម្លាប់មនុស្ស។ ដូច្នេះត្រូវតែកម្ចាត់ចោល។
បើដូចការលើកឡើងរបស់មន្ត្រីជាន់ខ្ពស់ហាម៉ាស់មែន មានន័យថាកិច្ចខិតខំប្រឹងប្រែងដើម្បីអនុវត្តបទឈប់បាញ់ឱ្យបានពេញលេញប្រហែលជាពិបាកនឹងទៅរួច។ ឥឡូវនេះ មានគំលាតគ្នាខ្លាំងរវាងជំហររបស់ក្រុមហាម៉ាស់ និងផែនការសន្តិភាពដែលផ្ដួចផ្ដើមឡើងដោយលោកត្រាំ។ គម្រោងចរចាគ្នាជាថ្មីនឹងចាប់ផ្ដើមឆាប់ៗនេះដោយផ្ដោតសំខាន់ទៅលើការកាត់រំសាយអាវុធរបស់ហាម៉ាស់ និងការគ្រប់គ្រងតំបន់ហ្កាហ្សា។
អ្នកសារព័ត៌មានបានទាក់ទងទៅខុទ្ទកាល័យរបស់លោកណឺតាន់យ៉ាហ៊ូដើម្បីធ្វើអត្ថាធិប្បាយពាក់ព័ន្ធនឹងការលើកឡើងរបស់មន្ត្រីជាន់ខ្ពស់ហាម៉ាស់ដូចខាងលើនេះ។ ខុទ្ទកាល័យថ្លែងថាអ៊ីស្រាអែលគាំទ្រស្មារតីនៃបទឈប់បាញ់ជានិច្ច ហើយនឹងបន្តអនុវត្តយ៉ាងពេញលេញទៅតាមផែនការសន្តិភាព។ គួរកត់សម្គាល់ថាក្រុមហាម៉ាស់ប្រកាសគាំទ្រផែនការសន្តិភាពទាំងម្ភៃចំណុចនោះដោយអន្លើ។ មានន័យថាពួកគេមិនទាន់ឯកភាព១០០%ទេដោយលើកហេតុផលថាចាំពិគ្រោះជាមួយក្រុមប៉ាឡេស្ទីនដទៃទៀតសិន៕
ចែករំលែកព័តមាននេះ