រាជធានីភ្នំពេញ ៖ ការប្រកួតប្រដាល់វគ្គជម្រុះវិលជុំ ឈានទៅដណ្តើមខ្សែក្រវាត់ស្រាបៀរលីអូ ក្នុងប្រភេទទម្ងន់៦០គីឡូក្រាម នៅលើសង្វៀន CTN ថ្ងៃសៅរ៍ ទី៨ មីនា ដែលជាថ្ងៃបុណ្យសិទ្ធិនារី មានតែមួយគូប៉ុណ្ណោះ គឺជាការជួបគ្នារវាង នឿន សាវឌី មកពីក្លិបអេភូថងកីឡា និងឡៅ ចន្ទ្រា មកពីក្លិបទ័ពពិសេសឆត្រយោង៩១១ ។ នឿន សាវឌី និងឡៅ ចន្ទ្រា ប្រកួតបាន២លើកម្នាក់រួចមកហើយ ប៉ុន្តែលទ្ធផលមិនដូចគ្នាទេ ដោយនឿន សាវឌី អត់ទាន់ស្គាល់ពាក្យថា ឈ្នះម្តងណាឡើយ ។
ចំណែកឯ ឡៅ ចន្ទ្រា ឈ្នះទាំង២លើកតែម្តង ហើយលើកនេះគេសង្ឃឹមថានឹងអាចឈ្នះទៀតមិនខានដោយសារ នឿន សាវឌី បើមើលលើបច្ចេកទេសប្រកួតពិតជាទៅមិនរួចជាមួយគេឡើយ ។ នឿន សាវឌី ស្នៀតកែង និងជង្គង់របស់គេអន់បំផុត ឯស្នៀតកណ្តាប់ដៃនិងស្នៀតជើងអាចធ្វើការវាយចេញបានល្អគួរសម ។ នឿន សាវឌី មានទម្លាប់មួយគឺចូលចិត្តឱ្យគេវាយឈឺសាច់ជាមុនសិន ទើបវាយតបតវិញ ប៉ុន្តែការមកប៉ះ ឡៅ ចន្ទ្រា លើកនេះមិនអាចលេងសើចបានឡើយ ព្រោះបើហា៊នតែប្រហែសបន្តិចច្បាស់ជាសន្លប់ធំមិនខាននោះទេ។ គេដឹងរួចមកហើយថា ចន្ទ្រា គឺជាកំពូលអ្នកប្រើស្នៀតកែង និងជង្គង់យា៉ងស្ទាត់ជំនាញបំផុត ឯស្នៀតជើង និងស្នៀតកណ្តាប់ដៃក៏ខ្លាំងមិនធម្មតាដែរ ដូច្នេះសម្រាប់ការមកប៉ះ នឿន សាវឌី លើកនេះ បើទោះជាគេមិនហា៊នអួតទុកមុនពីលទ្ធផលចាញ់ឈ្នះ ក៏មហាជនទូទៅគេនៅតែមានការជឿជាក់លើគេក្នុងសន្ទស្សន៍ច្រើនដែរ ។
ចំណែកគូប្រកួតមិត្តភាពដែលទទួលការឧបត្ថម្ភដោយក្រុមហ៊ុនស្រាផែនដីវិញនោះមាន យឹម ឌៀប មកពីសមាគមកីឡាប្រដាល់ក្រសួងការពារជាតិ ជួបជាមួយ ប្រាក់ ចាន់សីុន មកពីក្លិបមិត្តប៉ូលិស ។ សោម តឿទី មកពីក្លិបខ្លារខិនមានឫទ្ធិ ជួបជាមួយលោក ពេជ្រ មា៉ប់ មកពីក្លិបសាលវ័ន្តកីឡា ។ មួក សាវឌី មកពីសមាគមកីឡាប្រដាល់ក្រសួងការពារជាតិ ជួបជាមួយ ឃឹម បូរា៉ មកពីក្លិបរស្មីភូមិគាប ខេត្តបន្ទាយមានជ័យ ។ កង មករា មកពីក្លិបទ័ពពិសេសឆត្រយោង៩១១ ជួបជាមួយ លី ចំរើន មកពីក្លិបរស្មីកុមារកំព្រា ។ វី សេរីចាន់ឌីន មកពីក្លិបខ្លារខិនមានឫទ្ធិ ជួបជាមួយ អ៊ុម កំសត់ មកពីក្លិបព្រៃទទឹងមានឫទ្ធិ ខេត្តបាត់ដំបង និងនី កុសល មកពីក្លិបកងពលធំអន្តរាគមន៍លេខ៣ព្រះវិហារ ជួបជាមួយ សេរី សីហា មកពីក្លិបអេភូថងកីឡា ៕
ចែករំលែកព័តមាននេះ