រាជធានីភ្នំពេញ ៖ គណៈកម្មាធិការជាតិអូឡាំពិកកម្ពុជា សហការជាមួយសហព័ន្ធកីឡាប្រដាល់កម្ពុជា ឧបត្ថម្ភដោយក្រុមហ៊ុន CAMBROW, Ltd បានប្រកាសនៅក្នុងសន្និសីទកាសែតស្តីពីការរៀបចំការប្រកួតប្រដាល់ដណ្តើមខ្សែក្រវាត់ស្រាបៀរ Black Panther ក្នុងប្រភេទទម្ងន់៦៣,៥០គីឡូក្រាមជាលក្ខណៈទេសចរណ៍ចំនួន៧ខេត្ត-រាជធានី រួមទាំងចូលរួមផ្សព្វផ្សាយពីយុទ្ធនាការដែលកម្ពុជាធ្វើជាម្ចាស់ផ្ទះស៊ីហ្គេមនៅឆ្នាំ២០២៣ ខាងមុខ ។
សន្និសីទកាសែតនោះបានរៀបចំធ្វើកាលពីថ្ងៃទី៤ មីនា នៃទីស្នាក់ការគណៈកម្មាធិការជាតិអូឡាំពិកកម្ពុជា ដោយមានការចូលរួមពីលោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា, លោកឧត្តមសេនីយ៍ឯក តែម ម៉ឺន ប្រធានសហព័ន្ធកីឡាប្រដាល់កម្ពុជា តំណាងក្រុមហ៊ុន CAMBROW, Ltd និងកីឡាករជាច្រើននាក់ ។ សម្រាប់ការប្រកួតនេះមានកីឡាករប្រដាល់ចំនួន១២នាក់ចូលរួម ដោយធ្វើការចាប់ឆ្នោតតាមពូលក្នុងមួយពូលៗមាន៦នាក់ ។ ពូល A រួមមាន កីឡាករសួស យ៉ាត (ក្លិបកងទ័ពជើងទឹក), កីឡាករសល់ ប៊ុនហូវ (ក្លិបកុសលកីឡា), កីឡាករឃឹម ពេជ្រចិន្តា (ក្លិបបូរីនាគរាជ), កីឡាករសោម តឿទី (ក្លិបខ្លារខិនមានរិទ្ធ), កីឡាករផល សីហា (ក្លិបយុវជនកម្ពុជាមានជ័យ) និងកីឡាករតក់ សោភ័ណ្ឌ (ក្លិបអេភូថងកីឡា) ។ សម្រាប់ពូលB វិញមានកីឡាករផាន់ សុវណ្ណ (ក្លិបមិត្តប៉ូលិស), កីឡាករឡុង ប៊ុនរ៉ាត់ (ក្លិបសាលវ័ន្តកីឡា), កីឡាករឈិន ក្វាន់ងុ៉យ (ក្លិបមកុដរាជសីហ៍), កីឡាករនួន សេតសង់ (សមាគមក្រសួងការពារជាតិ), កីឡាករឡៅ ផានាថ (ក្លិបរស្មីកុមារកំព្រា) និងកីឡាករកែវ វិរៈ (ក្លិបព្រះខ័នរាជ) ។
លោកវ៉ាត់ ចំរើន បានមានប្រសាសន៍ថា ក្បាច់គុនបុរាណខ្មែរពិតជាល្អជាងគេ ទាំងកម្លាំងកាយ និងបច្ចេកទេសក្នុងការប្រកួត ។ មិនត្រឹមតែបុ៉ណ្ណោះ ការប្រកួតនេះធ្វើឡើងមានគោលបំណង ក៏ដូចជាគោលដៅសំខាន់៣ គឺទី១ ចូលរួមផ្សព្វផ្សាយពីយុទ្ធនាការកម្ពុជាធ្វើជាម្ចាស់ផ្ទះកីឡាស៊ីហ្គេមឆ្នាំ២០២៣ ទៅតាមបណ្តាខេត្ត ។ ទី២ ផ្សព្វផ្សាយយុទ្ធនាការប្រជាជនមួយរូបចេះកីឡាមួយប្រភេទ និងទី៣ ត្រៀមកីឡាប្រដាល់ដាក់ក្នុងវិញ្ញាសាស៊ីហ្គេមនៅឆ្នាំ២០២៣ ។ លោកតែម ម៉ឺន បានធ្វើការក្រើនរំលឹកដល់កីឡាករទាំងអស់ ធ្វើយ៉ាងណាប្រកួតឱ្យអស់ពីលទ្ធភាព ទោះជាដឹងថាខ្លួនមានពិន្ទុតិចជាងគេ ឬចាញ់នៅបាតតារាងក៏ដោយ ដើម្បីធ្វើខ្លួនជាគំរូដល់ថ្នាលជំនាន់ក្រោយ ជាពិសេសនោះទទួលបានការស្រឡាញ់ពេញចិត្តពីប្រជាជនតាមតំបន់នីមួយៗ ។ លោកបន្តថា សហព័ន្ធបានរៀបចំគណៈកម្មការបច្ចេកទេស និងបំពាក់បំប៉នចំណេះដឹងបន្ថែមដើម្បីដឹកនាំ ក៏ដូចជាកាត់សេចក្តីឱ្យមានភាពយុត្តិធម៌សម្រាប់ការប្រកួតតាមខេត្ត-រាជធានី ។ មួយវិញទៀត ការប្រកួតដែលមានលក្ខណៈផ្សព្វផ្សាយនេះនឹងធ្វើឱ្យអ្នកទស្សនាគិតថា កីឡាប្រដាល់ក្បាច់គុនបុរាណខ្មែរពិតជាមានវិសាលភាពធំធេង ជាប្រភេទកីឡាប្រយុទ្ធ តែមិនមែនកាចសាហាវដោយការប្រកួតចាញ់ឈ្នះជាលក្ខណៈបច្ចេកទេស ។ មួយវិញទៀត បង្ហាញឱ្យឃើញថា ការលេងកីឡានាំមកនូវមិត្តភាព សាមគ្គីភាព ជាពិសេសទទួលបានសុខភាពល្អផងដែរ ។
ការប្រកួតប្រដាល់ខាងលើ នឹងត្រូវចាប់ផ្តើមធ្វើពីថ្ងៃទី៤ ខែមេសា ឆ្នាំ២០១៤ តទៅ ដោយមានខេត្ត៧ ដែលត្រូវធ្វើដំណើរទៅដែលដំបូងខេត្តកំពង់ធំ បន្ទាប់មកអំឡុងថ្ងៃចូលឆ្នាំប្រពៃណីខ្មែរ នឹងធ្វើដំណើរទៅប្រកួតនៅខេត្តសៀមរាបក្នុងពិធីមហាសង្ក្រាន្ត ហើយបន្តចេញដំណើរទៅកាន់ខេត្តឧត្តរមានជ័យ, បន្ទាយមានជ័យ, ព្រះវិហារ, ស្វាយរៀង, កំពង់ចាម និងវគ្គផ្តាច់ព្រ័ត្រធ្វើនៅរាជធានីភ្នំពេញតែម្តងក្នុងអំឡុងខែមិថុនា ខាងមុខ ។ ចំពោះប្រាក់រង្វាន់វិញ ចំណាត់ថ្នាក់លេខ១ ទទួលបានខ្សែក្រវាត់មួយ ប្រាក់១.៧០០ដុល្លារ និងរង្វាន់ផ្សេងៗទៀត ។ លេខ២ ទទួលបានទឹកប្រាក់១.០០០ដុល្លារ និងរង្វាន់ផ្សេងទៀត ។ លេខ៣ ទទួលបានទឹកប្រាក់៦៥០ដុល្លារ និងរង្វាន់ផ្សេងទៀត និងលេខ៤ ទទួលបានទឹកប្រាក់៣៥០ដុល្លារ និងរង្វាន់ផ្សេងទៀត ៕
ចែករំលែកព័តមាននេះ