ម្ចាស់ជើងឯកអូឡាំពិក២ជំនាន់ម៉ូ ហ្វារ៉ា បានបញ្ជាក់ថា ខ្លួននឹងទៅចូលរួមប្រកួតប្រជែងដណ្តើមតំណែងជើងឯករត់ប្រណាំងនៅក្នុងព្រឹត្តិការណ៍ Glasgow Grand Prix ដែលនឹងរៀបចំធ្វើនៅថ្ងៃទី១១ ខែកក្កដា ខាងមុខលើទឹកដីប្រទេសស្កុតឡែន ។ ព្រឹត្តិការណ៍នេះត្រូវបានរៀបចំធ្វើឡើងតែ២សប្តាហ៍ប៉ុណ្ណោះ មុនព្រឹត្តិការណ៍កីឡា Commonwealth Games ដែលនឹងត្រូវរៀបចំនៅទីក្រុង Glasgow នេះផងដែរ ។ វាជាលើកទី១ហើយដែល Glasgow ទទួលធ្វើម្ចាស់ផ្ទះព្រឹត្តិការណ៍កីឡាធំដល់ទៅ២ ។
កាលពីប្រកួតក្នុងព្រឹត្តិការណ៍កីឡាអូឡាំពិករដូវក្តៅទីក្រុងឡុងដ៍ ឆ្នាំ២០១២កន្លងមក ម៉ូ ហ្វារ៉ា ដណ្តើមបានមេដាយមាសចំនួន២គ្រឿងក្នុងនោះ១គ្រឿងលើវិញ្ញាសារត់ចម្ងាយ ៥ពាន់ម៉ែត្រនិង១គ្រឿងទៀតលើវិញ្ញារត់ចម្ងាយ ១០គីឡូម៉ែត្រ ។ ចំណែកក្នុងព្រឹត្តិការណ៍ជ្រើសរើសជើងឯកពិភពលោក World Championships ឆ្នាំ ២០១៣ អត្តពលិកអង់គ្លេសរូបនេះក៏ធ្វើបានល្អដូចក្នុងព្រឹត្តិការណ៍អូឡាំពិកផងដែរ ។
យ៉ាងណាក៏ដោយ សម្រាប់ព្រឹត្តិការណ៍ Glasgow Grand Prix ខែកក្កដាខាងមុខនេះ ហ្វារ៉ា មិនទាន់បានកំណត់វិញ្ញាដែលត្រូវប្រកួតនោះទេ ។ អត្តពលិកវ័យ៣០ឆ្នាំរូបនេះបានថ្លែងថា ៖«Glasgow នឹងក្លាយជាផ្នែកមួយនៃការបង្ហាញខ្លួនលើកដំបូងរបស់ខ្ញុំនៅចំពោះមុខហ្វូងមនុស្សនៅចក្រភពអង់គ្លេសសម្រាប់ឆ្នាំ២០១៤នេះ» ។ គេបានបន្តថា ៖«បានបង្ហាញនូវសមត្ថភាពរបស់ខ្លួននៅចំពោះមុខអ្នកគាំទ្រជាជនរួមជាតិ គឺពិតជារឿងមួយអស្ចារ្យបំផុត ។ ខ្ញុំកំពុងរង់ចាំការវិលទៅកាន់ទីនោះជាថ្មី ជាពិសេសការជួបជាមួយអ្នកគាំទ្រ ។
នៅក្នុងលោកនេះ គ្មានអ្វីអាចប្រៀបធៀបនឹងអ្នកគាំទ្រជាជនជាតិខ្ញុំបាននោះទេ ។ ខ្ញុំនឹងធ្វើអ្វីគ្រប់យ៉ាងតាមដែលអាចដើម្បីទទួលបានអ្នកគាំទ្របន្ថែមទៀត» ។ចំណែកម្ចាស់ជើងឯកពិភពលោករត់ចម្ងាយ៤០០ម៉ែត្រ Christine Ohuruogu ក៏នឹងអមដំណើរទៅចូលរួមការប្រកួតជាមួយម៉ូ ហ្វារ៉ាផងដែរ ៕
ចែករំលែកព័តមាននេះ