រាជធានីភ្នំពេញ ៖ ប្រភពគួរឱ្យទុកចិត្តពីបុគ្គលិកសមាគម ឬអង្គការក្រៅរដ្ឋាភិបាល និងមន្ត្រីក្រសួងមហាផ្ទៃមួយចំនួនបានបង្ហើបឱ្យដឹងថា ការសុំចុះឈ្មោះ និងទទួលស្គាល់ពីសមាគម ឬអង្គការក្រៅរដ្ឋាភិបាលផ្លូវការពីសំណាក់ក្រសួងមហាផ្ទៃ សាម៉ីសមាគម ឬអង្គការក្រៅរដ្ឋាភិបាលត្រូវរត់ការដោយចំណាយលុយចាប់ពី៥០០ដុល្លារទៅ២.០០០ដុល្លារ
រាជធានីភ្នំពេញ ៖ ប្រភពគួរឱ្យទុកចិត្តពីបុគ្គលិកសមាគម ឬអង្គការក្រៅរដ្ឋាភិបាល និងមន្ត្រីក្រសួងមហាផ្ទៃមួយចំនួនបានបង្ហើបឱ្យដឹងថា ការសុំចុះឈ្មោះ និងទទួលស្គាល់សមាគម ឬអង្គការក្រៅរដ្ឋាភិបាលផ្លូវការពីសំណាក់ក្រសួងមហាផ្ទៃ សាម៉ីសមាគម ឬអង្គការក្រៅរដ្ឋាភិបាលត្រូវរត់ការដោយចំណាយលុយចាប់ពី៥០០ដុល្លារទៅ២.០០០ដុល្លារ ទៅតាមប្រភេទសកម្មភាព និងបេសកកម្មរបស់សមាគម ឬអង្គការក្រៅរដ្ឋាភិបាលនោះ ។
ប្រភពបានបន្តដោយលើកជាឧទាហរណ៍ថា ប្រសិនបើសមាគម ឬអង្គការក្រៅរដ្ឋាភិបាលធ្វើសកម្មភាពលើផ្នែកអប់រំ សុខាភិបាល ឬសង្គមកិច្ច នោះត្រូវរត់ការចាប់ពីថ្នាក់មូលដ្ឋាន រហូតទៅដល់ក្រសួងត្រូវចំណាយចាប់ពី៥០០ដុល្លារទៅដល់១.០០០ដុល្លារ ប៉ុន្តែបើសមាគមធ្វើសកម្មភាពលើផ្នែកឥណទាន (មីក្រូហិរញ្ញវត្ថុ) នោះត្រូវរត់ការដូចគ្នាខាងលើនេះ ដោយចំណាយចាប់ពី១.០០០ដុល្លារទៅ២.០០០ដុល្លារ ។
អ្នកនាំពាក្យក្រសួងមហាផ្ទៃ លោកនាយឧត្តមសេនីយ៍ ខៀវ សុភ័គ មិនអាចទាក់ទងតាមទូរស័ព្ទ ដើម្បីសុំសេចក្តីអត្ថាធិប្បាយបាននៅឡើយទេ នៅរសៀលថ្ងៃទី៥ មីនា ២០១៤ ។ យ៉ាងណាក៏ដោយ ប្រធានការិយាល័យគ្រប់គ្រងសមាគម និងអង្គការក្រៅរដ្ឋាភិបាលនៃនាយកដ្ឋានកិច្ចការនយោបាយក្រសួងមហាផ្ទៃ លោកឆាន់ ចន្ទសុភក្តិ បានបដិសេធរាល់ការចោទប្រកាន់ខាងលើ ដោយថា ជារឿងមិនពិត ព្រោះមន្ត្រី ឬបុគ្គលិករបស់លោកពុំដែលរត់ការនោះទេ ប៉ុន្តែបើមានអ្នកខាងក្រៅរត់ការ លោកក៏មិនដឹងនោះដែរ ។
បើតាមលោកប្រធានការិយាល័យគ្រប់គ្រងសមាគម និងអង្គការក្រៅរដ្ឋាភិបាលដដែល ការសុំចុះបញ្ជីទទួលស្គាល់ផ្លូវការពីក្រសួងមហាផ្ទៃត្រូវចំណាយត្រឹមតែ៥.០០០រៀលប៉ុណ្ណោះ លើការទិញពាក្យ និងសំណុំបែបបទក្នុងការចុះបញ្ជីសមាគម ឬអង្គការក្រៅរដ្ឋាភិបាល ៕
ចែករំលែកព័តមាននេះ