រាជធានីភ្នំពេញ ៖ មន្រ្តីកងរាជអាវុធហត្ថលើផ្ទៃប្រទេស អង្គភាពរថពាសដែកម្នាក់ បានជិះម៉ូតូដួលកាលពីយប់ ប៉ុន្តែភ្លាមៗមិនអីនោះទេ នៅដើរបានជាធម្មតា លុះដេកមួយយប់រហូតដល់ព្រឹកឡើង ត្រូវបានបងប្អូនហៅទៅផឹកស៊ីជាមួយ តែមិនទាន់បានផឹកផងគ្រាន់តែទៅដល់ ត្អូញថាចុកពោះ ពេលនោះគេបានដាក់ខ្នើយឲ្យសម្រាកហើយគ្រាន់តែ ប្រះខ្លួនដេកបានបន្តិច ក៍ស្រាប់តែដាច់ខ្យល់ស្លាប់ភ្លាមៗ ។
ហេតុការណ៍នោះបានកើតឡើងកាល ពីវេលាម៉ោង៨និង២០នាទីព្រឹក ថ្ងៃទី០៥ មីនា ឆ្នាំ២០១៤ នៅចំណុចបន្ទប់ផ្ទះជួល លេខ៧ ស្ថិតក្នុងភូមិផ្សារកំបូល សង្កាត់កំបូល ខណ្ឌពោធិ៍សែនជ័យ ។ ជនរងគ្រោះឈ្មោះ ជ័រ សាវិន អាយុ៥០ឆ្នាំ ជាមន្រ្តីកងរាជអាវុធហត្ថលើផ្ទៃប្រទេសអង្គភាពរថពាសដែក ស្នាក់នៅក្នុងភូមិសេប៉េសេ សង្កាត់ទឹកថ្លា ខណ្ឌសែនសុខ មានប្រពន្ធឈ្មោះ ហង្ស សាមុនី អាយុ៤៣ឆ្នាំ មានស្រុកកំណើត នៅក្នុងភូមិជើងឆ្នុក ឃុំតាំងក្រាំង ស្រុកបាធាយ ខេត្តកំពង់ចាម ។
តាមប្រភពព័ត៌មានបានឲ្យដឹងថា នៅមុនពេលកើតហេតុ បងប្អូនជនរងគ្រោះមានគ្នា៣នាក់បាននាំគ្នា ផឹកស៊ីជុំគ្នា ហើយក៍បានទូរស័ព្ទហៅជនរងគ្រោះ ឲ្យទៅចូលរួមផឹកស៊ីជាមួយ ពេលនោះជនរងគ្រោះបានជិះម៉ូតូ១គ្រឿងម៉ាកវីវ៉ា ពណ៌ខ្មៅ ពាក់ស្លាកលេខតាកែវ 1A-4928 ទៅតាមការហៅនោះ ។ លុះពេលទៅដល់មិនទាន់បានផឹកនៅឡើយទេ ជនរងគ្រោះបានអង្គុយនៅមាត់ទ្វារ ហើយត្អូញថាចុកពោះខ្លាំងណាស់ ភ្លាមៗនោះបងប្អូនបាននាំគ្នា យកខ្នើយដាក់ឲ្យគាត់កើយ គាត់ក៍បានប្រះខ្លួនដេក ស្រាប់តែបានដាច់ខ្យល់ស្លាប់ភ្លាមមួយរំពេចតែម្ដង។
ប្រភពដដែលបានបន្តថា កាលពីវេលាយប់ថ្ងៃទី០៤ មីនា ជនរងគ្រោះបានជិះម៉ូតូចេញពីធ្វើការ ហើយបានធ្លាក់ជង្ហុកដួល ដោយខ្លួនឯង ប៉ុន្តែពេលនោះមិនមានបញ្ហាអ្វីកើតឡើងនោះទេ៕
ចែករំលែកព័តមាននេះ