ខេត្តបន្ទាយមានជ័យ ៖ សេចក្តីរាយការណ៍បឋមបានឲ្យដឹងថា បុរសម្នាក់បានដេកស្លាប់យ៉ាងអាណោចអាធម្មក្នុងវាលស្រែ ក្នុងហេតុការណ៍គ្រោះថ្នាក់ចរាចរណ៍កើតឡើងនៅថ្ងៃទី២៦ ខែសីហានេះប្រហែលជាម៉ោង៤និង០៥នាទីទៀបភ្លឺលើកំណាត់ផ្លូវជាតិលេខ៦ ក្រៅទីប្រជុំជន ត្រង់ចំណុចបង្គោលខ្សែភ្លើងលេខ០១៤៦-០១៤៧ ដែលស្ថិតនៅលើគល់ស្ពានច្រេសខាងលិច ក្នុងភូមិសាស្ត្រឃុំឈ្នួរមានជ័យ ស្រុកព្រះនេត្រព្រះ ខេត្តបន្ទាយមានជ័យ រវាងរថយន្តបុកជាមួយគោយន្តកន្ត្រៃ ។
សេចក្តីរាយការណ៍បន្ត លោកវរសេនីយ៍ឯក មាស ប្ញទ្ធី អធិការនគរបាលស្រុកព្រះនេត្រព្រះបានឲ្យដឹងថាជនរងគ្រោះត្រូវបានគេស្គាល់ឈ្មោះ សឿត ម៉ាប់ ភេទប្រុស អាយុ៤៦ឆ្នាំ នៅភូមិដូនល្វា ឃុំចាឈូក ស្រុកអង្គរជុំ ខេត្តសៀមរាប បើកបរគោយន្តកន្ត្រៃម៉ាក KUBOTA RT 140 ពណ៌ក្រហមរ៉ឺម៉កដែក ។
លោកអធិការបានបញ្ជាក់ បើតាមការត្រួតពិនិត្យរបស់សមត្ថកិច្ចនគរបាលជំនាញចរាចរណ៍ស្រុក មុនពេលកើតហេតុគោយន្តកន្ត្រៃបានធ្វើដំណើរក្នុងទិសដៅពីកើតទៅលិចដល់ចំណុចកើតហេតុលើគល់ស្ពានច្រេសខាងលិច ក្នុងភូមិសាស្ត្រឃុំឈ្នួរមានជ័យ ស្រុកព្រះនេត្រព្រះ មានរថយន្តមួយគ្រឿងមិនស្គាល់អត្តសញ្ញាណបានបើកបរទិសខាងកើតទៅទិសខាងលិចក្នុងទិសដៅស្របទិសគ្នាបានបុកចំពីក្រោយរ៉ឺម៉កគោយន្ត បណ្តាលឲ្យគោយន្តរេចង្កូតធ្លាក់ពីលើផ្លូវជាតិបុកគល់ដើមអាកាស្យ៉ាដាច់ខាងឆ្វេង ចំណែកអ្នកបើកបរផ្លោងខ្ទាតទៅស្លាប់ក្នុងវាលស្រែ ។ ចំណែកអ្នកបើកបររថយន្តបានបើកគេចខ្លួនបាត់ ។
លោកអធិការនគរបាលស្រុកព្រះនេត្រព្រះបានបញ្ជាក់ថា ក្រោយពីធ្វើការត្រួតពិនិត្យរួចកម្លាំងនគរបាលជំនាញបានប្រគល់សពជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី ចំណែកគោយន្តកន្ត្រៃយកមករក្សាទុកនៅអធិការដ្ឋានរង់ចាំប្រគល់ជូនក្រុមគ្រួសារផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ