ខេត្តស្ទឹងត្រែង ៖ អាជ្ញាធរខេត្តស្ទឹងត្រែង បាននិងកំពុងសិក្សា និងរៀបចំគម្រោងអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ឆ្ពោះទៅកាន់តំបន់ទេសចរណ៍សំខាន់ៗតាមដងទន្លេមេគង្គ ក្នុងភូមិសាស្ត្រក្រុងស្ទឹងត្រែង និងស្រុកបុរីអូរស្វាយសែនជ័យ ដើម្បីបង្កើនភាពងាយស្រួលដល់ការធ្វើដំណើរ និងលើកកម្ពស់សក្តានុពលទេសចរណ៍ខេត្ត ។…
ខេត្តស្ទឹងត្រែង ៖ អាជ្ញាធរខេត្តស្ទឹងត្រែង បាននិងកំពុងសិក្សា និងរៀបចំគម្រោងអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ឆ្ពោះទៅកាន់តំបន់ទេសចរណ៍សំខាន់ៗតាមដងទន្លេមេគង្គ ក្នុងភូមិសាស្ត្រក្រុងស្ទឹងត្រែង និងស្រុកបុរីអូរស្វាយសែនជ័យ ដើម្បីបង្កើនភាពងាយស្រួលដល់ការធ្វើដំណើរ និងលើកកម្ពស់សក្តានុពលទេសចរណ៍ខេត្ត ។
គម្រោងនេះនឹងផ្តោតលើការប្រែក្លាយផ្លូវដីឱ្យទៅជាផ្លូវកៅស៊ូ ឬផ្លូវបេតុង រួមជាមួយការសាងសង់ស្ពានតូចៗ ប្រព័ន្ធបង្ហូរទឹក និងការបំពាក់ស្លាកសញ្ញាសម្គាល់ទិសដៅទេសចរណ៍។ បន្ថែមពីនេះ អាជ្ញាធរក៏មានផែនការរៀបចំចំណតយានយន្តឱ្យមានរបៀបរៀបរយ ដើម្បីធានាសុវត្ថិភាព និងផាសុកភាពជូនដល់ភ្ញៀវទេសចរជាតិ និងអន្តរជាតិ ។
ក្រៅពីការស្ថាបនាផ្លូវ គម្រោងនេះក៏រួមបញ្ចូល នូវការអភិវឌ្ឍសេវាកម្មទេសចរណ៍បន្ថែម រួមមាន ៖ រៀបចំកន្លែងសម្រាកកាយ និងកន្លែងលក់ផលិតផលសហគមន៍ ។
ក្នុងឱកាសចុះពិនិត្យទីតាំងផ្ទាល់នាពេលថ្មីៗនេះ ថ្នាក់ដឹកនាំខេត្តស្ទឹងត្រែងបានបញ្ជាក់ថា ៖ «ការអភិវឌ្ឍផ្លូវ គឺជាគន្លឹះយុទ្ធសាស្ត្រក្នុងការបើកច្រកសក្តានុពលទេសចរណ៍។ កាលណាមានហេដ្ឋារចនាសម្ព័ន្ធល្អ វានឹងទាក់ទាញភ្ញៀវទេសចរឱ្យមកកម្សាន្តកាន់តែច្រើន ដែលជាកម្លាំងចលករជួយដល់សេដ្ឋកិច្ចគ្រួសាររបស់ប្រជាពលរដ្ឋតាមរយៈការលក់ដូរ និងសេវាកម្មផ្សេងៗ» ។
ទន្ទឹមនឹងការអភិវឌ្ឍ អាជ្ញាធរខេត្តបានសង្កត់ធ្ងន់លើគោលការណ៍ «អភិវឌ្ឍន៍អមដោយការអភិរក្ស» ដោយយកចិត្តទុកដាក់ខ្ពស់លើកិច្ចការពារបរិស្ថាន និងធនធានធម្មជាតិ ដើម្បីធានាបាននូវចីរភាពសម្រាប់បម្រើដល់វិស័យទេសចរណ៍យូរអង្វែង។
គម្រោងអភិវឌ្ឍន៍នេះ ត្រូវបានរំពឹងថានឹងក្លាយជាសញ្ញាវិជ្ជមានថ្មីមួយ ក្នុងការតភ្ជាប់បណ្តាញទេសចរណ៍តាមដងទន្លេមេគង្គឱ្យកាន់តែទូលំទូលាយ និងជំរុញឱ្យខេត្តស្ទឹងត្រែងក្លាយជាគោលដៅទេសចរណ៍ដ៏ទាក់ទាញបំផុតមួយនៅតំបន់ភូមិភាគឦសាន ៕
ចែករំលែកព័តមាននេះ