ខេត្តកំពង់ស្ពឺ៖ បុរសម្នាក់បានស្លាប់ភ្លាមៗនៅកន្លែងកើតហេតុខណៈដែលជាម៉ូតូម្នាក់ឯងជ្រុលទៅបុកពីក្រោយរថយន្តដឹកស៊ីទែនប្រេងសាំងយសោរសូគីមិចដែលកំពុងតែឈប់ចតអមផ្លូវជាតិលេខ ៤យ៉ាងពេញទំហឹង។
ហេតុការណ៍បុរសម្នាក់ជាម៉ូតូបុករថយន្តដឹកប្រេងសាំងយាហោសូគីមិចបានកើតឡើងកាលពីវេលាម៉ោង ០១និង៣៥នាទីរសៀលថ្ងៃទី២៩ ខែមេសា ឆ្នាំ២០២៦ នៅតាមបណ្ដោយផ្លូវជាតិលេខ៤ ចន្លោះបង្គោលគីឡូម៉ែត្រលេខ៩០ ទៅលេខ៩១ ស្ថិតនៅក្នុងភូមិទី៤ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
នគរបាលស្រុកភ្នំស្រួចបាននិយាយដឹងថានៅមុនពេលកើតហេតុ មានម៉ូតូ០១ គ្រឿង ម៉ាកហុងដាសេ១២៥ ស៊េរីឆ្នាំ២០១៥ ពណ៌ខ្មៅ គ្មានផ្លាកលេខ បើកបរដោយឈ្មោះសឿន សារ៉េន ភេទប្រុស អាយុ៣០ឆ្នាំ រស់នៅក្នុងភូមិលាំងជ័យចាស់ ឃុំពោធិ៍ចំរើន ស្រុកបសេដ្ឋ ខេត្តកំពង់ស្ពឺ បានបើកបរតាមបណ្ដោយផ្លូវជាតិលេខ៤ ពីទិសខាងលិចទៅទិសខាងកើត លុះពេលធ្វើដំណើរមកដល់ចំណុចកើតហេតុខាងលើ ក៏បានជ្រុលទៅបុក រថយន្ដដឹកស៊ីទែនប្រេងសាំងយីហោសូគីមិច ០១គ្រឿង ម៉ាកCHENG LONG ពណ៌សលាយក្រហម ពាក់ផ្លាកលេខភ្នំពេញ3D-8488 សន្ដោងសឺមីរ៉ុម៉កពាក់ផ្លាកលេខ4A-4171 អ្នកបើកបរមិនស្គាល់អត្តសញ្ញាណ ដែលកំពុងចតនៅលើចិញ្ចើមផ្លូវកៅស៊ូខាងស្ដាំដៃ ស្របទិសគ្នាពីក្រោយយ៉ាងពេញទំហឹង បណ្ដាលឲ្យស្លាប់អ្នកបើកបរម៉ូតូនៅកន្លែង ឈ្មោះ (សឿន សារ៉េន) ។
នគរបាលស្រុកភ្នំស្រួចបាននិយាយឲ្យដឹងទៀតថាក្រោយកើតហេតុនគរបាលជំនាញបានជាប់ធ្វើការវាស់វែងនៅកន្លែងកើតហេតុ យកសពទៅតម្កល់ទុកនៅវត្តរង់ចាំសាច់ញាតិមកទទួលយកទទួលបុណ្យតាមប្រពៃណី។
នគរបាលស្រុកភ្នំស្រួចបានបញ្ជាក់ដឹងថាក្រោយកើតហេតុចំពោះវត្ថុតាងទាំង០២គ្រឿង នគរបាលជំនាញបានយកមករក្សាទុកនៅអធិការដ្ឋាន នគរបាលស្រុកភ្នំស្រួច ដើម្បីកសាងសំណុំរឿងចាត់ការបន្តតាមផ្លូវច្បាប់៕
ចែករំលែកព័តមាននេះ