រាជធានីភ្នំពេញ៖ ចោរប្លន់១ក្រុមបានធ្វើសកម្មភាពធាក់ផ្ដួលយុវជនដែលជាកម្មកររោងចក្រម្នាក់ កំពុងជិះម៉ូតូ បណ្ដាលឲ្យដួល ហើយជនរងគ្រោះក្រោកប្រវាយប្រតប់តដៃវិញ ក៏ត្រូវក្រុមចោរកាប់ បណ្ដាលឲ្យរងរបួសរយះខ្នងយ៉ាងដំណំប្លន់យកម៉ូតូ១គ្រឿងបានសម្រេច នេះបើតាមការប្រាប់ឲ្យដឹងពីលោកវរសេនីយ៍ឯកជឹម ស៊ីថា អធិការនគរបាលខណ្ឌដង្កោ…
រាជធានីភ្នំពេញ៖ ចោរប្លន់១ក្រុមបានធ្វើសកម្មភាពធាក់ផ្ដួលយុវជនដែលជាកម្មកររោងចក្រម្នាក់ កំពុងជិះម៉ូតូ បណ្ដាលឲ្យដួល ហើយជនរងគ្រោះក្រោកប្រវាយប្រតប់តដៃវិញ ក៏ត្រូវក្រុមចោរកាប់ បណ្ដាលឲ្យរងរបួសរយះខ្នងយ៉ាងដំណំប្លន់យកម៉ូតូ១គ្រឿងបានសម្រេច នេះបើតាមការប្រាប់ឲ្យដឹងពីលោកវរសេនីយ៍ឯកជឹម ស៊ីថា អធិការនគរបាលខណ្ឌដង្កោ ។ បន្ទាប់មកបានគេចខ្លួនបានស្រមោល លុះរយៈពេលជាង១០ថ្ងៃក្រោយមក ក៏ត្រូវបានកម្លាំងនគរបាលខណ្ឌដង្កោ សហការជាមួយកម្លាំងនគរបាលការិយាល័យព្រហ្មទណ្ឌកម្រិតស្រាលស្នងការដ្ឋាននគរបាលរាជធានីភ្នំពេញ ព្រមទាំងកម្លាំងអធិការដ្ឋាននគរបាលខណ្ឌពោធិ៍សែនជ័យ ធ្វើការស្រាវជ្រាវនិងឃាត់ខ្លួនបាន៣នាក់ និងរត់រួចម្នាក់ ។
ការឃាត់ខ្លួននោះបានធ្វើឡើងកាលពីវេលាម៉ោង១០និង៣០នាទីព្រឹក ថ្ងៃទី២០ ខែឧសភា ឆ្នាំ២០២៦ នៅចំណុចបន្ទប់ជួលលេខ២៨ ស្ថិតនៅតាមផ្លូវបេតុងភូមិក្បាលដំរី១ សង្កាត់កាកាបទី១ខណ្ឌពោធិ៍សែនជ័យ រាជធានីភ្នំពេញ ។
ចោរប្លន់ដែលត្រូវនគរបាលឃាត់ខ្លួនបាន៣នាក់នោះរួមមាន ១,ឈ្មោះ រ័ត្ន វណ្ណៈ ហៅ អាហ្សា ភេទប្រុស អាយុ២១ឆ្នាំ ជនជាតិខ្មែរ ៣,ឈ្មោះ សាវុត សុភី ភេទប្រុស អាយុ១៨ឆ្នាំ ជនជាតិខ្មែរ ទាំង២នាក់នេះស្នាក់នៅក្នុងបន្ទប់ជួលលេខ២៨ ស្ថិតនៅភូមិក្បាលដំរី១ សង្កាត់ការកាបទី១ ខណ្ឌពោធិ៍សែនជ័យ ។ ៣,ឈ្មោះ វី ជីវ័ន្ត ភេទប្រុស អាយុ១៨ឆ្នាំ ជនជាតិខ្មែរ មានទីលំនៅភូមិពន្លៃ ឃុំបាបោង ស្រុកពាមរក៍ ខេត្តព្រៃវែង អ្នកទាំង៣នេះពុំមានសារធាតុញៀននោះទេ ។ កម្លាំងនគរបាលខាងលើដកហូតបានម៉ូតូ២គ្រឿង ,ស្លាកលេខម៉ូតូ១បន្ទះលេខបាត់ដំបង ចំនួន០១បន្ទះ 1AZ-3798 និងទូរស័ព្ទចំនួន០២គ្រឿង រីឯបក្ខពួកម្នាក់ទៀតឈ្មោះ ណាក់ អាយុ២៥ឆ្នាំ កំពុងរត់គេចខ្លួន ។
ដោយឡែកយុវជនរងគ្រោះឈ្មោះ សៅ រៀម អាយុ២០ឆ្នាំ ជនជាតិខ្មែរ មុខរបរកម្មកររោងចក្រ ស្នាក់នៅបន្ទប់ជួល ស្ថិតនៅក្នុងភូមិត្រពាំងជ្រៃ សង្កាត់ការកាបទី២ ខណ្ឌពោធិ៍សែនជ័យ រាជធានីភ្នំពេញ ។ ម៉ូតូរបស់ជនរងគ្រោះរូបនេះមិនត្រូវបានចោរយកទៅលក់នៅឡើយទេ និងត្រូវបាននគរបាលរកឃើញយកមកវិញហើយ ប៉ុន្តែក្រុមចោរបានដោះយកស្លាកលេខទៅលក់បាត់ហើយ ។
នគរបាលបានប្រាប់ថា ហេតុការណ៍ធាក់និងកាប់ប្លន់យកម៉ូតូខាងលើនោះបានកើតឡើង កាលពីថ្ងៃទី១០ ខែឧសភា ឆ្នាំ២០២៦ វេលាម៉ោង២២និង០០នាទីយប់ នៅតាមមហាវិថីស៊ី ជីនពីង (ផ្លូវក្រវ៉ាត់ក្រុងទី៣ )ស្ថិតនៅក្នុងភូមិគងនយ សង្កាត់គងនយ ខណ្ឌដង្កោ រាជធានីភ្នំពេញ ។ ដោយនៅមុនពេលកើតហេតុ យុវជនរងគ្រោះបានជិះម៉ូតូ១គ្រឿងម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខ ភ្នំពេញ1MK-1210 ត្រឡប់មកពីផ្ទះមិត្តស្រីនៅឯស្រុកកណ្តាលស្ទឹង ខេត្តកណ្តាល ឆ្ពោះទៅកាន់បន្ទប់ជួលនៅសង្កាត់កាកាប២ ខណ្ឌពោធិ៍សែនជ័យវិញ ។
នគរបាលបានប្រាប់ឲ្យដឹងបន្តទៀតថា លុះពេលជិះដល់ត្រង់ចំណុចភូមិគងនយ សង្កាត់គងនយ ខណ្ឌដង្កោ ក៏ត្រូវចោរ១ក្រុមខាងលើ ជិះម៉ូតូ១គ្រឿងទៅទៅពីក្រោយអែបជិត រួចធាក់ដៃចង្កូតម៉ូតូជនរងគ្រោះ បណ្ដាលឲ្យដួល ។ ពេលនោះជនរងគ្រោះបានក្រោកប្រវាយប្រតប់តដៃវិញ ក៏ត្រូវបានក្រុមចោរកាប់បណ្ដាលឲ្យរបួសរយៈខ្នងយ៉ាងដំណំ ហើយក្រុមចោរក៏បានលើកយកម៉ូតូរបស់ជនរងគ្រោះជិះរត់គេចខ្លួនបាត់ដោយសុវត្ថិភាព ។ បន្ទាប់មកជនរងគ្រោះបានទៅព្យាបាលរបួសនៅមន្ទីរពេទ្យ លុះដល់នៅថ្ងៃទី១១ ខែឧសភា ឆ្នាំ២០២៦ ជនរងគ្រោះបានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលគងនយ ដើម្បីឲ្យសមត្ថកិច្ចស្រាវជ្រាវ និងស្វែងរកម៉ូតូរបស់ខ្លួនវិញ ព្រមទាំងវែករកមុខក្រុមចោរប្លន់ខាងលើផងដែរ ។
នគរបាលបានប្រាប់បន្ថែមថា បន្ទាប់មក ដោយមានបញ្ជារដ៏ខ្ពង់ខ្ពស់របស់លោកឧត្តមឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កម្លាំងនគរបាលខណ្ឌដង្កោ ដឹកនាំលោកវរសេនីយ៍ឯក ជឹមស៉ីថា អធិការនគរបាលខណ្ឌដង្កោ ។ លោកវរសេនីយ៍ទោ ជាង ហុកសែ អធិការរងទទួលផែនព្រហ្មទណ្ឌខណ្ឌដង្កោ បានសហការជាមួយកម្លាំងនគរបាលការិយាល័យព្រហ្មទណ្ឌកម្រិតស្រាល នៃស្នងការដ្ឋានរាជធានីភ្នំពេញ បានបើការស្រាវជ្រាជ្រាវដុតដៃដុតជើងដើម្បីបង្ក្រាបក្រុមចោរប្លន់ទាំងនោះ ។
នគរបាលបានបញ្ជាក់ប្រាប់ថែមទៀតថា ក្រោយមកក៏កំណត់បានមុខសញ្ញាក្រុមចោរ ហើយនៅថ្ងៃទី២០ ខែឧសភា ឆ្នាំ២០២៦ កម្លាំងនគរបាលខាងលើបានចុះទៅសហការជាមួយកម្លាំងអធិការដ្ឋាននគរបាលខណ្ឌពោធិ៍សែនជ័យឃាត់ខ្លួនចោរបាន៣នាក់ខាងលើ នៅចំណុចបន្ទប់ជួលលេខ២៨ ស្ថិតនៅតាមផ្លូវបេតុងភូមិក្បាលដំរី១ សង្កាត់កាកាបទី១ខណ្ឌពោធិ៍សែនជ័យ ។ បន្ទាប់មកនាំសាកសួរនៅអធិការដ្ឋាននគរបាលខណ្ឌដង្កោ ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់ ហើយចោរបានសារភាពប្រាប់នគរបាលថា ពួកខ្លួនមានគ្នា៤នាក់ពិតជាបានធ្វើសកម្មភាពធាក់ប្លន់ម៉ូតូពីយុវជនរងគ្រោះខាងលលប្រាកដមែន ក្រោយមកបានយកទៅទុកនៅបន្ទប់ជួលរបស់ឈ្មោះ រ័ត្ន វណ្ណៈ ហៅ អាហ្សា រួចដោះយកតែស្លាកលេខម៉ូតូ ទៅលក់ក្នុងតម្លៃ២៥ដុល្លារ ៕
ចែករំលែកព័តមាននេះ