អន្តរជាតិ ៖ បន្ទាប់ពីការយឺតយ៉ាវអស់រយៈពេលជាង២ខែ ដោយសារតែជម្លោះនៅតំបន់មជ្ឈិមបូព៌ានោះ ទីបំផុត កប៉ាល់ដឹកប្រេងខ្នាតយក្ស ៣ គ្រឿង ផ្ទុកប្រេងឆៅប្រហែល ៦…
អន្តរជាតិ ៖ បន្ទាប់ពីការយឺតយ៉ាវអស់រយៈពេលជាង២ខែ ដោយសារតែជម្លោះនៅតំបន់មជ្ឈិមបូព៌ានោះ ទីបំផុត កប៉ាល់ដឹកប្រេងខ្នាតយក្ស ៣ គ្រឿង ផ្ទុកប្រេងឆៅប្រហែល ៦ លានបារ៉ែល បានឆ្លងកាត់ច្រកសមុទ្រហ័រមូស (Hormuz) ដោយតម្រង់ទិសឆ្ពោះទៅកាន់ទីផ្សារអាស៊ី។ នេះបើយោងតាមប្រភពពី Reuters ដោយស្រង់ទិន្នន័យសមុទ្រពីផ្សារហ៊ុនទីក្រុងឡុងដ៍ ចក្រភពអង់គ្លេស (London Stock Exchange) និងក្រុមហ៊ុនវិភាគ Kpler កាលពីថ្ងៃទី២០ ខែឧសភា ឆ្នាំ២០២៦។
កប៉ាល់ទាំងនោះពីមុនបានចតនៅឯឈូងសមុទ្រពែរ្សអស់រយៈពេលជាង២ខែ ដោយដឹកប្រេងឆៅពីតំបន់មជ្ឈិមបូព៌ាចំនួន ៦ លានបារ៉ែល ហើយបើតាមរបាយការណ៍ កប៉ាល់ទីប ៤ ក៏កំពុងចាប់ផ្តើមចូលទៅក្នុងផ្លូវនេះផងដែរ។ កប៉ាល់ទាំងនោះ ស្ថិតនៅក្នុងចំណោមកប៉ាល់ដឹកប្រេងធុនធ្ងន់បំផុតមួយចំនួនតូច ដែលបានចាកចេញពីតំបន់ឈូងសមុទ្រក្នុងខែនេះ ដោយធ្វើដំណើរតាមផ្លូវឆ្លងកាត់ដែលកំណត់ដោយប្រទេសអ៊ីរ៉ង់។
គួរបញ្ជាក់ថា ជម្លោះរវាងសហរដ្ឋអាមេរិក-អ៊ីស្រាអែល ជាមួយនឹងអ៊ីរ៉ង់ ដែលបានផ្ទុះឡើងនៅថ្ងៃទី២៨ ខែកុម្ភៈ ឆ្នាំ២០២៦ បានធ្វើឱ្យការដឹកជញ្ជូនតាមសមុទ្រឆ្លងកាត់ច្រកសមុទ្រហ័រមូសជាប់គាំង ខណៈជាផ្លូវទឹកសំខាន់មួយគ្រប់គ្រងការដឹកជញ្ជូនប្រហែល១ភាគ៥នៃការផ្គត់ផ្គង់ប្រេង និងថាមពលរបស់ពិភពលោក។
ការបិទច្រកដ៏តូចចង្អៀតមួយនេះ ក៏បានធ្វើឱ្យតម្លៃប្រេងឆៅអន្តរជាតិហក់ឡើងដល់៣ខ្ទង់ផងដែរ។ គិតត្រឹមម៉ោង ៣ រសៀលថ្ងៃទី២១ ខែឧសភា ឆ្នាំ២០២៦ (ម៉ោងនៅកម្ពុជា) តម្លៃប្រេងឆៅ Brent ដែលជាស្តង់ដាពិភពលោកឈរនៅតម្លៃ ១០៦ ដុល្លារអាមេរិកក្នុង១បារ៉ែល។ ចំណែកប្រេងឆៅស្តង់ដាសហរដ្ឋអាមេរិក WTI ឈរនៅតម្លៃ ៩៩,៣០ ដុល្លារអាមេរិកក្នុង១បារ៉ែល៕
ចែករំលែកព័តមាននេះ