រាជធានីភ្នំពេញ ៖ សមាសភាពគូប្រកួតប្រដាល់វគ្គជម្រុះវិលជុំឈានទៅដណ្តើមខ្សែក្រវាត់ស្រាបៀរភ្នំពេញ នៅលើសង្វៀនទូរទស្សន៍ CTN ថ្ងៃព្រហស្បតិ៍ ទី៦ មីនា ខាងមុខនេះ ហេង សត្រា មកពីក្លិបតាព្រហ្មមានជ័យបង្ក្រាបគ្រឿងញៀន ជួបជាមួយ ជន សាវុធ មកពីក្លិបពោធិជ័យកីឡា ចំណែកខុន សីហា មកពីក្លិបកងពលធំអន្តរាគមន៍លេខ៣ ព្រះវិហារ ជួបជាមួយ ខឹក សុខឿន មកពីក្លិបទ័ពពិសេសឆត្រយោង៩១១ ។
ហេង សត្រា និង ជន សាវុធ ទើបតែប្រកួតបានមួយលើកម្នាក់បុ៉ណ្ណោះ បុ៉ន្តែលទ្ធផលមិនដូចគ្នាទេ ពោលគឺ ហេង សត្រា ឈ្នះ ឯ ជន សាវុធ ចាញ់ ។ រវាងគូនេះ ជន សាវុធ ចាស់វស្សាជាងបន្តិច បុ៉ន្តែមួយរយៈមកនេះ គេមិនសូវលេចមុខនៅលើសង្វៀននោះឡើយ ដូច្នេះបើសិនជាធ្វើការប្រៀបធៀបជាមួយ ហេង សត្រា ដែលជាអ្នកប្រដាល់ជើងថ្មីវិញនោះ គឺមិនខុសគ្នាបុ៉ន្មានឡើយ ។ ម្យ៉ាងវិញទៀត ជន សាវុធ ក៏មិនមែនជាអ្នកប្រដាល់ដែលមានឈ្មោះបោះសំឡេងនៅលើសង្វៀននោះដែរ ដោយសារស្នៀតប្រយុទ្ធរបស់គេមើលទៅធម្មតាៗរាល់ពេលវាយចេញម្តងៗ ទាំងស្នៀតកែង ជង្គង់ កណ្តាប់ដៃម៉ាត់ និងទាត់មិនមានភាពសាហាវសោះឡើយ ឯចិត្តក៏មិនសូវសឿងទៀត ។ ដូច្នេះការចង់បាន៣ពិន្ទុលើកនេះមិនដឹងថា អាចទៅរួចឬអត់នោះទេ ។ ឯ ហេង សត្រា ទោះបីមិនសូវមានបទពិសោធន៍ប្រកួតនៅលើសង្វៀនដូច ជន សាវុធ មែន តែល្បិចនៃការប្រកួតរបស់គេពិតជាមិនអន់ឡើយ ហើយគេក៏មិនចេះអួតក្អេងក្អាងរបៀបមើលស្រាលលើគូប្រកួតនោះដែរ ទើបអ្នកមើលភាគច្រើនគេមានជំនឿចិត្តលើ ហេង សត្រា ច្រើនជាង ។
ខុន សីហា និង ខឹក សុខឿន ក៏ទើបតែប្រកួតបានមួយលើកម្នាក់ដូចគ្នា បុ៉ន្តែលទ្ធផលមិនដូចគ្នាទេ ដោយ ខុន សីហា ឈ្នះ ឯ ខឹក សុខឿន ចាញ់ ។ បើសង្កេតមើលការប្រកួតកន្លងមកឃើញថា ខុន សីហា ជាកីឡាករដែលមានស្នៀតប្រយុទ្ធមិនខ្លាំងបុ៉ន្មានឡើយ គ្រាន់តែចិត្តរបស់គេសឿង កម្លាំងខ្លាំងអាចប្រកួតបាន៥ទឹកពេញមិនលំបាកឡើយ ។ ឯ ខឹក សុខឿន ល្បិចប្រយុទ្ធនៅលើសង្វៀនរបស់គេក៏ប្រហាក់ប្រហែលនឹង ខុន សីហា ដែរ តែចិត្តរបស់គេរាងតូចបន្តិច ។ ចាំមើលលើកនេះ ខុន សីហា ឬ ខឹក សុខឿន ដែលជាអ្នកមានសំណាងរកបាន៣ពិន្ទុបន្ថែមទៀតនោះ ។ ចំណែកគូប្រកួតមិត្តភាពវិញ កីឡាករវៀត ប៊ុនឌឿន មកពីសមាគមកីឡាប្រដាល់ក្រសួងការពារជាតិ ជួបជាមួយកីឡាករផៃ គឹមហឿត មកពីក្លិបខេមរិន្ទមានរិទ្ធ ។
កីឡាករសល់ អាម៉ា មកពីក្លិបកុសលកីឡា ជួបជាមួយកីឡាករអេ អូត មកពីក្លិបអេភូថងកីឡា និងកីឡាកររិទ្ធ ប្រាក់បិន មកពីក្លិបកងពលតូចលេខ៧០ ជួបជាមួយកីឡាករលាភ ហេង មកពីក្លិបពន្លឺណេអុង៕
ចែករំលែកព័តមាននេះ