ខេត្តតាកែវ ៖ ជនសង្ស័យម្នាក់ត្រូវបានប៉ូលិសក្រុងដូនកែវ ឃាត់ខ្លួនកាលពីវេលាម៉ោង១២យប់ថ្ងៃទី២៨ កុម្ភៈ រួចកសាងសំណុំរឿងបញ្ជូនបន្តទៅសាលាដំបូងខេត្តកាត់ទោសទៅតាមច្បាប់ ពីបទលួចខោអាវរោងចក្រយកទៅលក់ ។ ជនម្នាក់នេះឈ្មោះស្រួច ប៉ោលឹម ភេទប្រុស អាយុ២៥ឆ្នាំ ទីលំនៅភូមិព្រៃសួរ ឃុំពត់សរ ស្រុកបាទី ជាអ្នកបើកបររថយន្តដឹកខោអាវឱ្យរោងចក្រកាត់ដេរសម្លៀកបំពាក់យីហោយានតារ៉ុងហ្វុង និងរោងចក្រហុង សេន ស្ថិតនៅភូមិតាឌូ សង្កាត់រកាក្រៅ ក្រុងដូនកែវ ។
តាមប្រភពព័ត៌មានឱ្យដឹងថា ជនឈ្មោះស្រួច ប៉ោលឹម ត្រូវខាងរោងចក្រឱ្យដឹកខោអាវពីរោងចក្រកាត់ដេរនៅឯខេត្តកំពត លុះពេលដឹកមកដល់ខាងជើងផ្សារអង្គតាសោម ស្រុកត្រាំកក់ ក៏លួចលក់ខោអាវឱ្យគេនៅទីនោះ ហើយពេលត្រឡប់មកដល់រោងចក្រនៅក្នុងក្រុងដូនកែវ ប្រធានរដ្ឋបាលពិនិត្យដឹងថា បាត់ខោអាវក៏ប្ដឹងប៉ូលិសឱ្យចាប់ខ្លួនតែម្ដង ។ នេះជាលទ្ធផលនៃភាពមិនសុចរិតដែលនាំឱ្យជួបនឹងផលវិបាកដោយចៀសមិនផុត ។
មន្ត្រីប៉ូលិសព្រហ្មទណ្ឌក្រុងដូនកែវ បានឱ្យដឹងថា ជនឈ្មោះស្រួច ប៉ោលឹម នេះបានត្រូវប្រធានរដ្ឋបាលរោងចក្រឈ្មោះតាំង ទិចហេង ភេទប្រុស អាយុ៤៤ឆ្នាំ ប្រើឱ្យបើករថយន្តទៅដឹកខោអាវពីរោងចក្រនៅខេត្តកំពតចំនួន៩.៦៤៤សម្រាប់ មកដាក់នៅរោងចក្រហុងសេន ។
លុះនៅវេលាម៉ោង៥ល្ងាចថ្ងៃទី២៨ កុម្ភៈ ខណៈដឹកខោអាវត្រឡប់មកវិញ ក៏បង្ហួសទៅដល់ខាងជើងផ្សារអង្គតាសោមចម្ងាយប្រមាណ២០០ម៉ែត្រ រួចលួចយកសម្លៀកបំពាក់លក់ទៅឱ្យឈ្មោះរតនា ភេទប្រុស អាយុ៣៨ឆ្នាំ រស់នៅម្ដុំចម្ការដូង នៅរាជធានីភ្នំពេញ អស់មួយចំនួន ទើបបើករថយន្តត្រឡប់មករោងចក្រវិញ ។ ពេលមកដល់រោងចក្រ ខាងរដ្ឋបាលមានការសង្ស័យក៏ពិនិត្យមើលនៅក្នុងកេសខោអាវឃើញបាត់អស់៤.០២៤សម្រាប់ ក៏ប្ដឹងប៉ូលិសឱ្យចាប់ខ្លួន ។
ចែករំលែកព័តមាននេះ