រាជធានីភ្នំពេញ ៖ កីឡាករជើងខ្លាំង២រូបបានក្លាយជាអ្នកពើងទ្រូងបង្អួតមហាជនព្រមគ្នា បន្ទាប់ពីបានចំណាយពេល៥ទឹកដូចគ្នា វាយផ្តួលកីឡាករជាគូប្រកួតឱ្យបរាជ័យនៅលើរេញផ្សេងគ្នា និងក្នុងម៉ោងខុសគ្នា ។ កីឡាករដែលរីកថ្លើមក្រោយពេលប្រកួតទាំងពីរនាក់នោះ គឺកីឡាករចៅ ផលឌឿ មកពីក្លិបសំរោងកោងខេត្តបាត់ដំបង និងកីឡាករឈិន ក្វាន់ង៉ុយ មកពីក្លិបមកុដរាជ
រាជធានីភ្នំពេញ ៖ កីឡាករជើងខ្លាំង២រូបបានក្លាយជាអ្នកពើងទ្រូងបង្អួតមហាជនព្រមគ្នា បន្ទាប់ពីបានចំណាយពេល៥ទឹកដូចគ្នា វាយផ្តួលកីឡាករជាគូប្រកួតឱ្យបរាជ័យនៅលើរេញផ្សេងគ្នា និងក្នុងម៉ោងខុសគ្នា ។ កីឡាករដែលរីកថ្លើមក្រោយពេលប្រកួតទាំងពីរនាក់នោះ គឺកីឡាករចៅ ផលឌឿ មកពីក្លិបសំរោងកោងខេត្តបាត់ដំបង និងកីឡាករឈិន ក្វាន់ង៉ុយ មកពីក្លិបមកុដរាជសីហ៍។
នៅលើសង្វៀនទូរទស្សន៍បាយ័នបឹងស្នោ កាលពីថ្ងៃអាទិត្យ ទី២ មីនា កីឡាករឈិន ក្វាន់ងុ៉យ បានបំបាក់កីឡាករឃឹម ពេជ្រចិន្តា មកពីក្លិបបុរីនាគរាជ ឱ្យចាញ់ដោយពិន្ទុនៅលើសង្វៀន ។ ជ័យជម្នះរបស់គេបានធ្វើឱ្យមានសម្រែកហ៊ោកញ្ជ្រៀវយ៉ាងខ្លាំង បន្ទាប់ពីក្នុង៥ទឹក កីឡាករបង្គោលខៀវរូបនេះហាក់សម្ញែងនូវសន្ទុះវាយលុកបានល្អ ។ បើទោះជា ឃឹម ពេជ្រចិន្តា ប្រឹងប្រែងអស់ពីលទ្ធភាពយ៉ាងណា ក៏កម្លាំង ស្នៀត និងកម្ពស់នៅតែជាសម្ពាធដែលពិបាកធ្វើឱ្យកីឡាកររូបនេះទប់ឈ្នះកីឡាករឈិន ក្វាន់ង៉ុយ ។
នៅក្នុងទឹកខ្លះ កីឡាករទាំងពីរបានបញ្ចេញនូវកម្រិតប្រកួតប្រហាក់ប្រហែលគ្នា ប៉ុន្តែនៅទីបំផុតកីឡាករឈិន ក្វាន់ង៉ុយ នៅតែអាចសម្រេចយកឈ្នះដោយពិន្ទុទៅលើកីឡាករឃឹម ពេជ្រចិន្តា ។ អំឡុង២ទឹកចុងក្រោយ គេឃើញ ឈិន ក្វាន់ង៉ុយ ក្លាយជាអ្នកក្តោបក្តាប់ជ័យជម្នះកាន់តែច្រើន បន្ទាប់ពីឃើញ ឃឹម ពេជ្រចិន្តា បាក់កម្លាំងចុះខ្សោយព្រោះតែអស់ស៊ុហ្វ ហើយក៏សម្រុកវាយប្រហារមិនព្រមដកដៃ។ សំអាងលើដៃជើងវែងៗ វាយកែងបានល្អ និងកម្លាំងនៅពេញនៅឡើយ ទើបគេឃើញកីឡាករឃឹម ពេជ្រចិន្តា កាន់តែយ៉ាប់ និងត្រដរខ្យល់នៅកៀកនឹងទឹកបញ្ចប់ ។ ទោះបីយ៉ាងណា សន្ទុះវាយលុករបស់ ឈិន ក្វាន់ងុ៉យ មិនអាចផ្តួលឱ្យគេសន្លប់បានទេ បើទោះជានៅដើមទឹកទី៥ កីឡាករបង្គោលខៀវ ឈិន ក្វាន់ង៉ុយ បានប្រឹងប្រែងវាយសម្រុកដោយកណ្តាប់ដៃផង ដោយកែងផង និងដោយជង្គង់ផង ដែលធ្វើឱ្យអ្នកគាំទ្រម្ខាងទៀតបុកពោះឡើងចង់បះសក់នោះក៏ដោយ ។ គ្រាន់តែបានប្រកាសថា ឈ្នះពិន្ទុលើកីឡាករឃឹម ពេជ្រចិន្តា គេឃើញកីឡាករឈិន ក្វាន់ង៉ុយ លោតកញ្ជ្រោលស្ទើររញ្ជួយពេញរេញតែម្តង ដែលគេអាចមើលឃើញយ៉ាងច្បាស់ថា គេរីកថ្លើមនិងពោរពេញដោយមោទនភាព ។ ការយកឈ្នះកីឡាករជើងចាស់ ឃឹម ពេជ្រចិន្តា លើកនេះមានន័យយ៉ាងច្បាស់ថា កីឡាករឈិន ក្វាន់ង៉ុយ អាចរក្សាបានក្រេឌីតល្អ ដែលផ្ទុយស្រឡះពីការប្រកួតគូខ្លះ ដែលរមែងតែងតែឃើញកីឡាករជើងថ្មីវាយមិនឈ្នះកីឡាករជើងចាស់ ។
នៅលើរេញនោះដែរ កីឡាករហ៊ុន ពិសិដ្ឋ មកពីក្លិបមិត្តប៉ូលិស ត្រូវសន្លប់ក្រោមដៃកីឡាករម៉ន ចាន់ណា មកពីក្លិបព្រែកឯងមានជ័យ ។ កីឡាករឯម ផ្លាទីន មកពីក្លិបឫទ្ធិពោធិសែនជ័យ វាយកីឡាករយ៉ា ពុទ្ធារី មកពីក្លិបកុសលកីឡា ឱ្យសន្លប់ក្នុងទឹកទី២ ។ កីឡាករពេជ្រ គុណ មកពីមជ្ឈមណ្ឌលខេមរភូមិន្ទ វាយឈ្នះកីឡាករផល ផាន មកពីក្លិបភ្នំពេជ្រកីឡាដោយពិន្ទុ និងកីឡាករភុន សោភ័ណ្ឌ មកពីក្លិបយុវកីឡាខេត្តកណ្តាល វាយកីឡាករម៉ាប់ ឆៃយ៉ា មកពីក្លិបខ្លារខិនមានឫទ្ធិ ឱ្យសន្លប់ក្នុងទឹកទី៤ ។
នៅលើសង្វៀនទូរទស្សន៍បាយ័នស្ទឹងមានជ័យឯណោះវិញ កីឡាករចៅ ផលឌឿ ក្លាយជាអ្នកពើងទ្រូងដូចគ្នានឹងកីឡាករឈិន ក្វាន់ងុ៉យ ខាងលើដែរ បន្ទាប់ពីបានយកឈ្នះលើកីឡាករនន់ ជំនិត មកពីក្លិប CMAC ដោយពិន្ទុ ។ ការប្រកួតរវាងពួកគេ ក៏មានចំណុចទាក់ទាញមិនចាញ់គូខាងលើផងដែរ ដោយសារភាគីម្ខាងៗក្នុងចំណោមអ្នកទាំងពីរសុទ្ធតែបានបង្ហាញសន្ទុះវាយលុកដោយមិនចុះញ៉មគ្នាទៅវិញទៅមក ។ ៤ទឹកដំបូង ពួកគេទាំងពីរក្តាប់ជ័យជម្នះ២ទឹកម្នាក់ ខណៈដែលទឹកទី៥ ដែលជាទឹកចុងក្រោយ ទើបគេឃើញកីឡាករចៅ ផលឌឿ មានកម្រិតជោគជ័យលើកីឡាករនន់ ជំនិត ដែលប្រឹងស្ទុះស្ទា ។ ទោះយ៉ាងណា កម្រិតវាយលុករបស់បង្គោលក្រហម នន់ ជំនិត ក៏មិនបានចាញ់ប្រៀបទាំងស្រុងក្នុងការវាយសន្ធាប់របស់ ចៅ ផលឌឿ នោះដែរ ។ អុីចឹងហើយទើបម្នាក់ៗដែលជាអ្នកទស្សនាមើលឃើញយ៉ាងច្បាស់ថា ចៅ ផលឌឿ អាចយកឈ្នះលើកីឡាករនន់ ជំនិត ដោយប្រផិតប្រផើយបំផុត ។ កីឡាករចៅ ផលឌឿ បានបង្ហាញអារម្មណ៍ពុះកញ្ជ្រោលយ៉ាងខ្លាំង បន្ទាប់ពីបានយកឈ្នះលើគូប្រកួត ដែលអ្នកគាំទ្រភាគច្រើនយល់ថា មិនអាចទប់ជាប់ដោយសារតែគេជាជើងចាស់ ហើយមានបទពិសោធន៍មិនធម្មតា ។ លទ្ធផលនេះបង្ហាញថា កីឡាករឈិន ក្វាន់ង៉ុយ និងកីឡាករចៅ ផលឌឿ ក្លាយជាអ្នកពើងទ្រូង និងរីកថ្លើមបំផុត បន្ទាប់ពីអាចយកឈ្នះលើកីឡាករដែលជាគូប្រកួត ។
នៅក្នុងសង្វៀនស្ទឹងមានជ័យនោះ កីឡាករប្រាក់ ស៊ីណាត មកពីក្លិបបញ្ជាការដ្ឋានកងទ័ពជើងគោក វាយចាញ់កីឡាករសំណាង ឌីណា មកពីក្លិបបាត់ដំបងពាយ័ព្យ ។ កីឡាការិនី នូវ ស្រីពៅ មកពីក្លិបតាឡីដំរីមានឫទ្ធិ វាយឈ្នះកីឡាករសូយ សុធា មកពីក្លិបពោធិជ័យកីឡា ។ កីឡាករសូយ ចិន្តា មកពីក្លិបពោធិជ័យកីឡា វាយកីឡាករបុ៉ន សុភាន មកពី ក្លិប CMAC ឱ្យសន្លប់ក្នុងទឹកទី២ និងកីឡាករ វី សាវុធ មកពីក្លិបឥន្ទ្រីកីឡា វាយចាញ់កីឡាករស្វាយ រដ្ឋា មកពីក្លិបកងរាជអាវុធហត្ថរាជធានីភ្នំពេញ ដោយពិន្ទុ ៕
ចែករំលែកព័តមាននេះ