រាជធានីភ្នំពេញ ៖ ការប្រកួតកីឡាចំបាប់ជ្រើសរើសជើងឯកយុវជនលើកទី៣ ប្រចាំឆ្នាំ២០១៤ ដែលបានចាប់ផ្តើមឡើងតាំងពីថ្ងៃទី២៨ ខែកុម្ភៈមកនោះ បានបិទបញ្ចប់ការប្រកួតហើយកាលពីល្ងាចថ្ងៃទី២ ខែមីនា ព្រមទាំងបានរកឃើញជើងខ្លាំងដែលអាចយកទៅបន្តវេនជើងចាស់សម្រាប់ចូលរួមព្រឹត្តិការណ៍ស៊ីហ្គេមដែលកម្ពុជាត្រៀមធ្វើជាម្ចាស់ផ្ទះផងដែរ ។ វត្តមានគណៈអធិបតីផ្តល់រង្វាន់ដល់ជ័យលាភីនាឱកាសនោះមានលោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជាប្រធានសហព័ន្ធកីឡាចំបាប់កម្ពុជា, លោក Casey Barnett អនុប្រធានសហព័ន្ធកីឡាចំបាប់ ដោយមានការចូលរួមពីមន្ត្រីកីឡា កីឡាករ កីឡាការិនីជាច្រើនទៀត ។
លោកវ៉ាត់ ចំរើន បានកោតសរសើរដល់គ្រូៗ និងកីឡាករក្មេងៗដែលចូលរួមប្រកួតនៅឆ្នាំនេះឃើញថា មានកម្រិតបច្ចេកទេសកើនឡើងជាងមុន និងចេះគោរពបទបញ្ជានៃការប្រកួតបានល្អ ជាពិសេសគឺក្រុមក្មេងៗពិតជាមានជំនាញ និងទេពកោសល្យល្អណាស់ ។ លោកបន្តថា កាលពីឆ្នាំមុន ក្រុមកីឡាករចំបាប់បានដណ្តើមមេដាយមាស១០គ្រឿងពី SEA Games ដែលក្នុងនោះមានមាស៤ ប្រាក់២ សំរឹទ្ធ៤ ។ តាមរយៈលទ្ធផលនេះបានធ្វើឱ្យក្លិបចំបាប់ទូទាំងប្រទេសចាប់ផ្តើមមានភាពល្បីល្បាញខ្លាំងឡើង ។ ដូចនេះហើយទើបសហព័ន្ធកីឡាចំបាប់រៀបចំកម្មវិធីនេះដើម្បីចម្រាញ់រកអ្នកមានទេពកោសល្យ ដាក់ឱ្យចូលរួមប្រកួតក្នុងព្រឹត្តិការណ៍កីឡាស៊ីហ្គេម ដែលកម្ពុជាធ្វើជាម្ចាស់ផ្ទះនៅឆ្នាំ២០២៣ ខាងមុខនេះ។
ជាមួយគ្នានេះដែរ លោក Casey Barnett អនុប្រធានសហព័ន្ធកីឡាចំបាប់ និងជាប្រធានក្លិបចំបាប់ភ្នំពេញថ្លែងថា លោកពិតជាមានចិត្តសប្បាយរីករាយខ្លាំងណាស់ដែលបានមកឃើញការបង្ហាញសមត្ថភាពយ៉ាងល្អរបស់ប្អូនៗជំនាន់ក្រោយ ។ មូលហេតុចម្បងដែលលោកចូលរួមជួយឧបត្ថម្ភគាំទ្រ គឺដោយសារតែលោកចូលចិត្តលេងចំបាប់ណាស់ ព្រោះលោកក៏ធ្លាប់ហាត់កីឡាមួយនេះតាំងពីអាយុ៦ឆ្នាំដល់២០ឆ្នាំទៀតផង ។ មិនត្រឹមតែប៉ុណ្ណោះ លោកធ្លាប់ចូលហ្វឹកហាត់នៅក្នុងក្រុមជម្រើសជាតិកម្ពុជាបានរយៈពេល៣ឆ្នាំផងដែរ ។
ចំពោះលទ្ធផលចំណាត់ថ្នាក់នោះ គឺទម្ងន់៤៨គីឡូក្រាមនារីអាយុក្រោម១៨ឆ្នាំ មេដាយមាសបានទៅកីឡាការិនី ធា សម្ផស្ស មកពីក្លិបភ្នំពេញ។ ទម្ងន់៥២គីឡូក្រាមនារីអាយុក្រោម១៨ឆ្នាំ មេដាយមាសបានទៅលើកីឡាការិនី អ៊ុំ វុធធិតា មកពីក្លិបភ្នំពេញ ។ ទម្ងន់៥៥គីឡូក្រាមនារីអាយុក្រោម២៣ឆ្នាំ មេដាយមាសបានទៅលើកីឡាការិនី សុង ហ៊ាងចរណៃ មកពីក្លិបភ្នំពេញ ។ ទម្ងន់សេរីនារីអាយុក្រោម២៣ឆ្នាំ មេដាយមាសបានទៅលើកីឡាការិនី ប៉ូ សុភា មកពីក្លិប C.I.C.I ។
ទម្ងន់៤៨គីឡូក្រាមបុរសអាយុក្រោម១៨ឆ្នាំ មេដាយមាសបានទៅលើកីឡាករនូ ប៊ុនរាជ មកពីក្លិបយាយព្រីងមានឫទ្ធិ ខេត្តកំពង់ឆ្នាំង ។ ទម្ងន់៥២គីឡូក្រាមបុរសអាយុក្រោម១៨ឆ្នាំ មេដាយមាសបានទៅលើកីឡាករឆយ ចន្នី មកពីក្លិបម៉ឺនឯកវិហារសួគ៌ ។ ទម្ងន់៥៦គីឡូក្រាមបុរសអាយុក្រោម១៨ឆ្នាំ មេដាយមាសបានទៅកីឡាករពេជ្រ ប្រសិទ្ធ មកពីសមាគមក្រសួងមហាផ្ទៃ ។ ទម្ងន់៦០គីឡូក្រាមបុរសអាយុក្រោម១៨ឆ្នាំ មេដាយមាសបានទៅកីឡាករសុខ រតនៈ មកពីសមាគមក្រសួងមហាផ្ទៃ ។ ទម្ងន់៤៨គីឡូក្រាមបុរសអាយុក្រោម២៣ឆ្នាំ មេដាយមាសបានទៅកីឡាករវណ្ណ វុទ្ធ មកពីក្លិបភ្នំពេញ ។ ទម្ងន់៥២គីឡូក្រាមបុរសអាយុក្រោម២៣ឆ្នាំ មេដាយមាសបានទៅកីឡាករសែម សុង មកពីក្លិបម៉ឺនឯកវិហារសួគ៌ ។ ទម្ងន់៥៦គីឡូក្រាមបុរសអាយុក្រោម២៣ឆ្នាំ មេដាយមាសបានទៅកីឡាករយ៉ុង ប៊ុនណា មកពីក្លិបវិហារសួគ៌ ។ ទម្ងន់៦០គីឡូក្រាមបុរសអាយុក្រោម២៣ឆ្នាំ មេដាយមាសបានទៅកីឡាករអេង ផានិត មកពីក្លិបភ្នំពេញ ។ ទម្ងន់៦៥គីឡូក្រាមបុរសអាយុក្រោម២៣ឆ្នាំ មេដាយមាសបានទៅកីឡាករដូ ដេត មកពីក្លិបម៉ឺនឯកវិហារសួគ៌ ។
ផ្នែកកុមារាអាយុក្រោម១៥ឆ្នាំប្រភេទ M មេដាយមាសបានទៅកីឡាករនី ហ័ង មកពីក្លិបឫទ្ធិសែនខេត្តកំពង់ឆ្នាំង ។ កុមារាអាយុក្រោម១៥ឆ្នាំ ប្រភេទ K មេដាយមាសបានទៅកីឡាករតត វណ្ណា មកពីក្លិបឃ្លាំងមឿង ។ កុមារាអាយុក្រោម១៥ឆ្នាំ ប្រភេទ L មេដាយមាសបានទៅកីឡាករច្រាយ ប៉យ មកពីក្លិបម៉ឺនឯក ។ កុមារាអាយុក្រោម១៥ឆ្នាំប្រភេទ S មេដាយមាសបានទៅកីឡាករអឿន ចិន្ត្រា មកពីក្លិបឫទ្ធិសែន ។
ចំពោះលទ្ធផលចំណាត់ថ្នាក់ក្រុម មេដាយមាសបានទៅក្លិបម៉ឺនឯកឃុំវិហារសួគ៌ មេដាយប្រាក់បានទៅក្លិបភ្នំពេញ និងមេដាយសំរិទ្ធបានទៅសមាគមក្រសួងមហាផ្ទៃ ។
សូមបញ្ជាក់ថា ព្រឹត្តិការណ៍នេះមានការចូលរួមប្រកួតពីអត្តពលិកចំបាប់វ័យក្មេងចំនួន២១៥នាក់ ក្នុងនោះ១៦នាក់ជានារីដែលមកពីក្លិប-សមាគមចំនួន៩ ទូទាំងប្រទេស ។ ក្លិប-សមាគមទាំង៩នោះមាន ក្លិបវិហារសួគ៌, ក្លិបរ៉ៃយ៉ុងភ្នំពេញ, សមាគមឫទ្ធិសែនខេត្តកំពង់ឆ្នាំង, សមាគមយាយព្រីងមានរិទ្ធិខេត្តកំពង់ឆ្នាំង, សមាគមម៉ឺនឯកឃុំវិហារសួគ៌, សមាគមក្រសួងមហាផ្ទៃ, ក្លិបចំបាប់ភ្នំពេញ, ក្លិបចំបាប់ជីជី និងសមាគមចំបាប់ឃ្លាំងមឿងខេត្តពោធិ៍សាត់ ៕
ចែករំលែកព័តមាននេះ