ខេត្តឧត្តរមានជ័យ ៖ ការបាញ់សម្លាប់ប្រជាពលរដ្ឋខ្មែរពីសំណាក់ទាហានសៀម តែងកើតមានជាបន្តបន្ទាប់ដូចបាញ់សត្វ ខណៈពលរដ្ឋខ្មែរទាំងនេះលួចឆ្លងដែនចូលទៅក្នុងទឹកដីសៀមដោយខុសច្បាប់ដើម្បីរុករកកាត់ឈើគ្រញូង ។
ព័ត៌មានចុងក្រោយដែលមានការបិទបាំងព័ត៌មាន៥ថ្ងៃមកហើយគឺលេចឮថា ទាហានសៀមបានបាញ់ស្លាប់អ្នកចូលកាប់ឈើគ្រញូងជាច្រើននាក់ រីឯប្រជាពលរដ្ឋផ្សេងទៀតខ្លះរងរបួស ខ្លះត្រូវចាប់ខ្លួន ខ្លះបាត់ខ្លួន និងខ្លះទៀតរត់រួចមកដល់លំនៅឋានវិញ ។ ហេតុការណ៍នេះបានកើតឡើងនៅចំណុចស្ពានមួយរយស្ថិតនៅទល់មុខច្រកក្បាលអូរស្វាយ ក្នុងទឹកដីឃុំអូរស្វាយ ស្រុកត្រពាំងប្រាសាទ កាលពីវេលាម៉ោង១២និង២០នាទីរំលងអធ្រាត្រឈានចូលថ្ងៃទី២៣ កុម្ភៈ កន្លងទៅ ។
ប្រជាពលរដ្ឋដែលរត់រួចផុតពីសេចក្ដីស្លាប់បានរៀបរាប់ថា ពលរដ្ឋខ្មែរដែលចូលទៅគឺមានមេការនិងមេខ្យល់ជាអ្នកនាំទៅក្នុងទឹកដីសៀមដែលមានជម្រៅចាប់ពី១០ទៅ២០គីឡូម៉ែត្រ ដើម្បីនាំគ្នារុករកឈើគ្រញូង ។ តាមប្រភពព័ត៌មានថា ក្រុមអ្នករុករកឈើគ្រញូងនោះមានច្រើនក្រុម ហើយពេលរកបានយកមកលក់ឱ្យឈ្មួញដែលបានចំណាយលុយឱ្យក្រុមពលរដ្ឋទិញស្បៀងអាហារមុនចូលទៅក្នុងទឹកដីថៃ ។ ប្រជាពលរដ្ឋដដែលនិយាយទៀតថា ការកាត់ឈើគ្រញូងនោះបានតែពេលយប់ទេ ឯពេលថ្ងៃត្រូវសម្រាកមិនអាចចេញធ្វើសកម្មភាពឡើយដោយពួនសម្ងំនៅក្នុងព្រៃ ។
ទាក់ទិននឹងហេតុការណ៍ថ្មីចុងក្រោយនេះ ត្រូវបានប្រភពព័ត៌មានរៀបរាប់ថា នៅវេលាម៉ោង១២និង២០នាទីរំលងអធ្រាត្រឈានចូលថ្ងៃទី២៣ កុម្ភៈ ខណៈអ្នកខ្លះកំពុងកាត់ឈើ អ្នកខ្លះកំពុងពុះច្រៀក និងអ្នកខ្លះកំពុងតែអូសឈើគ្រញូង ស្រាប់តែក្រុមទាហានសៀមបានបាញ់រះជាច្រើនគ្រាប់មកលើ បណ្តាលឱ្យប្រជាពលរដ្ឋខ្មែរស្លាប់បាត់បងជីវិតជាច្រើននាក់ តែមិនដឹងថា អ្នកណាខ្លះស្លាប់ឬរស់ទេ ។ លុះព្រឹកឡើងពេលដែលខ្លួនរត់មករកដីខ្មែរវិញបានជួបនឹងសពប្រជាពលរដ្ឋចំនួន៣កន្លែង គឺស្លាប់ច្រើននាក់ ដោយទាហានសៀមអូសសពមកគរលើគ្នាគួរឱ្យអាណោចអាធ័ម ។ លើសពីនេះ បានរងរបួសធ្ងន់-ស្រាល នៅពាសពេញតែព្រៃ ចំណែកអ្នកខ្លះត្រូវទាហានសៀមចាប់ខ្លួន ហើយអ្នកខ្លះទៀតបានរត់រួចមកដល់លំនៅឋានវិញ ។
ជាក់ស្តែង ក្រុមគ្រួសារសាច់ញាតិរបស់សពចំនួន៣នាក់ ដែលរស់នៅក្នុងភូមិរំចេក ឃុំអន្លង់វែង ស្រុកអន្លង់វែង បានរៀបរាប់ថា អ្នកដែលស្លាប់ដោយសារក្រុមទាហានសៀមបាញ់គឺ៖
១-ឈ្មោះឯក វិឆ័យ ភេទប្រុស អាយុ២៩ឆ្នាំ ប្រពន្ធឈ្មោះ តើយ ពួន អាយុ២០ឆ្នាំ មានកូនប្រុសម្នាក់ អាយុ២ឆ្នាំ និងកំពុងមានផ្ទៃពោះចំនួន៩ខែ ។
២-ឈ្មោះ យ៉ា អ៊ុ ភេទប្រុស អាយុ៤៤ឆ្នាំ ជាបុរសពោះម៉ាយ ។
៣-ឈ្មោះ ហេង ហុង ភេទប្រុស អាយុ៣២ឆ្នាំ ប្រពន្ធឈ្មោះ សេង រដ្ឋ អាយុ៣២ឆ្នាំ មានកូនចំនួន៤នាក់ និងកំពុងមានផ្ទៃពោះចំនួន៥ខែ ។
ក្រុមគ្រួសារទាំង៣បានយំស្រែកសោកស្តាយជីវិតអ្នកស្លាប់ ណាមួយបានលេចឮថា ពលរដ្ឋខ្មែរដែលស្លាប់នោះប្រហែលជាមិនអាចនាំសពមកប្រគល់ឱ្យតាមច្រកទ្វារអន្តរជាតិដូចមុនៗឡើយ ព្រោះពួកគេត្រូវការបិទបាំងដោយសារស្លាប់ច្រើននាក់ពេក ។
ព័ត៌មានខាងលើនេះ មិនអាចស្វែងរកការបំភ្លឺពីក្រុមមន្ត្រីអាជ្ញាធរ ឬមន្ត្រីមានសមត្ថកិច្ចបានទេ ដោយសារតែមានការលាក់បាំងព័ត៌មាន ហើយរឿងរ៉ាវដែលទទួលបាននេះ គឺតាមរយៈក្រុមគ្រួសារអ្នកស្លាប់រៀបរាប់ឱ្យដឹងតែប៉ុណ្ណោះ ៕
ចែករំលែកព័តមាននេះ