ខេត្តបាត់ដំបង ៖ កម្លាំងកងអន្ដរាគមន៍ពិសេសរបស់ស្នងការដ្ឋាននគរបាលខេត្ដ បានចុះបង្ក្រាបសង្វៀនបញ្ជល់មាន់ចល័តមួយកន្លែងដោយចៃដន្យ គ្រាដែលកងកម្លាំងនេះកំពុងជិះល្បាត ហើយប្រទះឃើញកាលពីវេលាម៉ោង១០ព្រឹកថ្ងៃទី២ មីនា នៅក្នុងភូមិចម្ការសំរោង១ សង្កាត់ចម្ការសំរោង ក្រុងបាត់ដំបង ។
ខេត្តបាត់ដំបង ៖ កម្លាំងកងអន្ដរាគមន៍ពិសេសរបស់ស្នងការដ្ឋាននគរបាលខេត្ដ បានចុះបង្ក្រាបសង្វៀនបញ្ជល់មាន់ចល័តមួយកន្លែងដោយចៃដន្យ គ្រាដែលកងកម្លាំងនេះកំពុងជិះល្បាត ហើយប្រទះឃើញកាលពីវេលាម៉ោង១០ព្រឹកថ្ងៃទី២ មីនា នៅក្នុងភូមិចម្ការសំរោង១ សង្កាត់ចម្ការសំរោង ក្រុងបាត់ដំបង ។
មន្ដ្រីការិយាល័យនគរបាលព្រហ្មទណ្ឌកម្រិតស្រាលខេត្ដឱ្យដឹងថា សមត្ថកិច្ចបានឃាត់ខ្លួនមនុស្ស៥នាក់ ចាប់មាន់ជល់២ក្បាល និងដកហូតម៉ូតូបាន៥គ្រឿង ដែលក្រុមអ្នកញៀនល្បែងនេះប្រហែលជាង៣០នាក់រត់ចោល ។ មន្ដ្រីដដែលបញ្ជាក់ថា ទាំងមនុស្ស និងវត្ថុតាងត្រូវបានបញ្ជូនមកកាន់ការិយាល័យជំនាញដើម្បីសួរនាំពីការប្រមូលផ្ដុំគ្នាប្រព្រឹត្ដល្បែងស៊ីសងខុសច្បាប់នេះ ។
លោក កង សុផាន់ណា ប្រធានក្រុមកងអន្ដរាគមន៍ពិសេសដែលចុះបង្ក្រាបល្បែងបញ្ជល់មាន់នេះនិយាយថា កងកម្លាំងរបស់លោកបានបង្ក្រាបក្រុមអ្នកបញ្ជល់មាន់នេះដោយចៃដន្យ គ្រាដែលជិះម៉ូតូក្នុងភូមិសាស្រ្ដនៅតំបន់នោះ ហើយប្រទះឃើញពួកគេប្រហែលជាង៣០នាក់កំពុងស្រែកហ៊ោកញ្ជ្រៀវ ។ លោកបន្ដថា គ្រានោះកងកម្លាំងរបស់លោក ខ្លះក្នុងឯកសណ្ឋាន និងខ្លះស្លៀកពាក់ស៊ីវិល បានសម្រុកចូលទៅចាប់មាន់ក្នុងសង្វៀន និងក្របួចបានអ្នកលេង៥នាក់ ខណៈជិត៣០នាក់ទៀតរត់ប្រសាចពេញភូមិ ។ លោក កង សុផាន់ណា បញ្ជាក់ថា ក្រុមនេះជាក្រុមបញ្ជល់មាន់ចល័តមិនបង្កើតទីតាំងមួយកន្លែងទេ ហើយក៏មិនបញ្ជល់យូរដែរ ។ ពួកគេបញ្ជល់មាន់ភ្នាល់ដាក់លុយប្រហែល១គូ ឬ២គូក៏បែកហ្វូងគ្នាភ្លាម ព្រោះខ្លាចសមត្ថកិច្ចទៅទាន់ ។
ក្រោយពេលឃាត់ខ្លួននាំមកកាន់ស្នងការដ្ឋាននគរបាលខេត្ដ ក្រុមអ្នកលេងទាំងនោះនិយាយប្រាប់សមត្ថកិច្ចថា ពួកគេមិនបានបញ្ជល់មាន់ភ្នាល់ដាក់លុយទេ គឺគ្រាន់តែណាត់គ្នាយកមាន់ទៅបញ្ជល់លេងប៉ុណ្ណោះ ។ ប៉ុន្ដែអ្នកភូមិបានបញ្ជាក់ថា ពេលដែលសមត្ថកិច្ចចុះទៅព័ទ្ធចាប់នោះ គឺពួកគេទើបបានបញ្ចប់ការស៊ីសងលុយគ្នាគូទី១ ។ លុះចាប់ផ្ដើមបញ្ជល់គូទី២ មិនទាន់បានកន្លះទឹកផង ក៏ត្រូវកម្លាំងសមត្ថកិច្ចទៅដល់ចូលចាប់មាន់ក្នុងសង្វៀនផ្អើលរត់ប្រសាចពេញភូមិតែម្ដង។
លោក ម៉េង លៀង នាយរងការិយាល័យនគរបាលព្រហ្មទណ្ឌកម្រិតស្រាលខេត្ដបញ្ជាក់ថា កម្លាំងជំនាញកំពុងសួរនាំក្រុមអ្នកបញ្ជល់មាន់ចល័តទាំងនោះហើយ ប៉ុន្ដែចំណាត់ការបន្ដយ៉ាងណានោះមិនទាន់ដឹងទេ ព្រោះលោកកំពុងរង់ចាំបទបញ្ជាពីលោកស្នងការនគរបាលខេត្ដ តើត្រូវធ្វើការអប់រំ ឬត្រូវកសាងសំណុំរឿងបញ្ជូនទៅតុលាការ ៕
ខេត្តស្វាយរៀង ៖ មានមនុស្ស៨នាក់ត្រូវនគរបាលប៉ុស្តិ៍រដ្ឋបាលឃុំកំពង់ចម្លង ចាប់ខ្លួនពីបទបើកសង្វៀនបញ្ជល់មាន់ ក្នុងនោះមានគ្រូពេទ្យមណ្ឌលសុខភាពកំពង់ចម្លង១រូបផង ។ ក្នុងការបង្ក្រាបនេះដែរ ម៉ូតូ៨គ្រឿង អាគក២ក្បាល និងស៊ុមមាន់២ ត្រូវបានឃាត់ទុក ។
ការបង្ក្រាបសង្វៀនបញ្ជល់មាន់នេះបានធ្វើឡើងកាលពីថ្ងៃទី២ មីនា វេលាម៉ោង៩និង៣០នាទីព្រឹក នៅផ្ទះរបស់ឈ្មោះ សាង សុធារី ភេទស្រី អាយុ៤៣ឆ្នាំ នៅភូមិតាស្អាង ឃុំកំពង់ចម្លង ស្រុកស្វាយជ្រំ ។
បើតាមមន្ដ្រីនគរបាលប៉ុស្តិ៍រដ្ឋបាលឃុំចម្លងឱ្យដឹងថា ផ្ទះខាងលើបើកសង្វៀនបញ្ជល់មាន់ជិត១ខែមកហើយ តាមរូបភាពយកមាន់ជល់១គូ ឬ២គូមកផ្គូផ្គងបញ្ជល់ភ្នាល់ដាក់ប្រាក់ ដែលមានអ្នកមកលេងភ្នាល់ចាប់ពី១០នាក់ទៅ២០នាក់ គឺគ្រាន់តែបញ្ជល់តាមម្លប់ឈើ ឬក្រោមផ្ទះ ។ ពេលណាដឹងថា សមត្ថកិច្ចចុះបង្ក្រាប ពួកគេក្រុងមាន់ទុកក្រោមផ្ទះ ហើយនាំគ្នាជិះម៉ូតូចេញ ឬនាំគ្នាអង្គុយផឹកស៊ីដូចគ្មានអ្វីកើតឡើង ។
មន្ត្រីនគរបាលឱ្យដឹងថា ប្រជាពលរដ្ឋបានរាយការណ៍ពេលរៀបចំបញ្ជល់មាន់ ទើបសមត្ថកិច្ចចុះទៅបង្ក្រាប និងកសាងសំណុំរឿងបញ្ជូនទៅអធិការដ្ឋាននគរបាលស្រុកស្វាយជ្រំ ចាត់ការតាមនីតិវិធី ។ លោកគ្រូពេទ្យម្នាក់មានប្រសាសន៍ថា រូបគាត់ត្រូវមិត្តភក្តិទូរស័ព្ទហៅឱ្យទៅពិនិត្យជំងឺប្រពន្ធឈឺនៅជិតចំណុចខាងលើ ហើយឃើញគេនៅជុំៗ ស្រាប់តែរត់ប្រសេចប្រសាច ក៏ឈប់ម៉ូតូមើល ស្រាប់តែត្រូវសមត្ថកិច្ចហៅទៅសាកសួរនៅប៉ុស្តិ៍រដ្ឋបាល រួចនាំខ្លួនទៅកាន់អធិការដ្ឋានស្រុកស្វាយជ្រំទៀត ។ ការពិតគាត់ពុំបានទៅលេងនោះទេ រីឯអ្នកបញ្ជល់មាន់ពិតប្រាកដនាំគ្នារត់គេចខ្លួនបាត់អស់ហើយ គឺចាប់បានតែអ្នកទៅឈរមើល ។
ស្ត្រីម្នាក់ជាម្ចាស់ផ្ទះឈ្មោះ សាង សុធារី អាយុ៤៣ឆ្នាំ និយាយថា រូបគាត់២នាក់ប្តីប្រពន្ធមិនបាននៅផ្ទះទេ គឺឌុបគ្នាទៅផ្សារស្វាយរៀង ដើម្បីទិញម្ហូប ស្រាប់តែអ្នកជិតខាងទូរស័ព្ទប្រាប់ថា នគរបាលចូលចាប់យកមាន់ទៅប៉ុស្តិ៍ ក៏ទៅតាមសាកសួរ ។ ប៉ុន្តែអ្នកជិតខាងកន្លែងកើតហេតុសុំមិនបញ្ចេញឈ្មោះប្រាប់ថា កន្លងមកផ្ទះនេះធ្លាប់យកមាន់មកផ្គូផ្គង និងឡាំ(បញ្ជល់មាន់)រួចគេយកមាន់ជល់នេះទៅបញ្ជល់នៅកាស៊ីណូឯព្រំដែន គឺជាកន្លែងលក់ទិញមាន់ជល់ ។ ពេលសមត្ថកិច្ចចុះមកបង្ក្រាបនេះ ពុំទាន់បានបញ្ជល់ ឬឡាំទេ គឺទើបនឹងផ្គូផ្គងហើយម្ចាស់ផ្ទះក៏អត់នៅដែរ ។ ពេលផ្គូផ្គងមាន់មានអ្នកមកឈរមើលប្រមាណជា២០នាក់ ដែលមានទាំងប៉េអឹម និងនគរបាលមកឈរមើលដែរ ក៏ប៉ុន្តែពេលបង្ក្រាប ចាប់តែប្រជាពលរដ្ឋ ឯប៉េអឹម និងនគរបាលដូចគ្នាបែរជាឡើងជិះម៉ូតូចេញទៅតាមសម្រួល ។
ទាក់ទិននឹងករណីខាងលើ លោកអនុសេនីយ៍ទោ ម៉ៅ សុខុន អធិការរងនគរបាលស្រុកស្វាយជ្រំ មានប្រសាសន៍ថា អ្នកដែលត្រូវចាប់ខ្លួនគ្រាន់តែអប់រំ និងធ្វើកិច្ចសន្យារួចឱ្យត្រឡប់ទៅផ្ទះវិញហើយ ៕
រាជធានីភ្នំពេញ ៖ ទីតាំងបញ្ជល់មាន់លួចលាក់មួយកន្លែង ត្រូវបាននគរបាលខណ្ឌឫស្សីកែវ ចុះបង្ក្រាប និងឃាត់ខ្លួនក្រុមអ្នកញៀនភ្នាល់បញ្ជល់មាន់បានចំនួន៤នាក់ ដកហូតម៉ូតូ៧គ្រឿង និងរថយន្តម៉ាកទីកូ១គ្រឿង ព្រមទាំងអាគកចំនួន៧ក្បាល និងខ្នាយតចំនួន៣ ។ ការបង្ក្រាបសង្វៀនបញ្ជល់មាន់នេះ ធ្វើឡើងកាលពីវេលាម៉ោង១១និង៣០នាទីព្រឹក ថ្ងៃទី១ មីនា នៅក្នុងព្រៃកណ្តាលដីឡូត៍មួយកន្លែង ខាងត្បូងផ្លូវចូលហ្គ្រេនភ្នំពេញ ស្ថិតក្នុងសង្កាត់ច្រាំងចំរេះទី១ ខណ្ឌឫស្សីកែវ ។
ក្រុមអ្នកដែលត្រូវឃាត់ខ្លួនមាន ១-ឈ្មោះ បាន ឡី ភេទប្រុស អាយុ២៩ឆ្នាំ ជាកម្មកររោងចក្រ ស្នាក់នៅផ្ទះជួល ក្នុងសង្កាត់បឹងកក់ទី១ ខណ្ឌទួលគោក ២-ឈ្មោះ វ៉ាន់ អឿង អាយុ៣០ឆ្នាំ ជាជាងម៉ូតូ មានទីលំនៅផ្ទះលេខ៣៣ ផ្លូវលេខ២០២ សង្កាត់ទឹកល្អក់ទី៣ ខណ្ឌទួលគោក ៣-ឈ្មោះ ជឿង យ៉ាំងតាយ អាយុ៤២ឆ្នាំ ស្នាក់នៅផ្ទះជួល ក្នុងសង្កាត់ស្ទឹងមានជ័យ ខណ្ឌមានជ័យ និង៤-ឈ្មោះ តាម៉េវ ហៅតាបាវ អាយុ៥៤ឆ្នាំ មានទីលំនៅក្នុងភូមិកៀនឃ្លាំង សង្កាត់ព្រែកលៀប ខណ្ឌឫស្សីកែវ ។
តាមព័ត៌មានឱ្យដឹងថា ទីតាំងបញ្ជល់មាន់នេះបានបើកលេងលួចលាក់នៅក្នុងព្រៃដីឡូត៍ទុកចោលខាងលើជាយូរមកហើយ ហើយមានឧត្តមសេនីយ៍យោធាដែលចូលចិត្តលេងមាន់ម្នាក់នៅកាង ។ ក្រៅពីនោះ ក៏មានកងកម្លាំងសមត្ថកិច្ចមួយចំនួននាំគ្នាចូលទៅលេងយ៉ាងសប្បាយផងដែរ ។
តាមព័ត៌មានបន្តទៀតថា នៅមុនពេលចុះបង្ក្រាប មានក្រុមអ្នកញៀនល្បែងប្រមាណ៥០នាក់នាំគ្នាយកមាន់ទៅបញ្ជល់ដែលមានម៉ូតូ និងរថយន្តត្រៀបត្រា ។ ខណៈនោះនគរបាលខណ្ឌឫស្សីកែវ មានគ្នាប្រមាណ១៣នាក់ គិតទាំងកម្លាំងបង្កប់ផងបានឆ្មក់ចូលបង្ក្រាប ធ្វើឱ្យក្រុមអ្នកបញ្ជល់មាន់រត់ប្រសាច និងចាប់បានតែ៤នាក់ ។ ទោះបីជាយ៉ាងណា មានការរិះគន់ថា នេះសមត្ថកិច្ចគ្រាន់តែបង្អើលប៉ុណ្ណោះ ព្រោះបើមានចេតនាបង្ក្រាប គឺអាចបានច្រើនជាងនេះ យ៉ាងហោចណាស់សមត្ថកិច្ចម្នាក់ ក៏ចាប់បានម្នាក់ដែរ ។ អ្វីដែលគួរឱ្យចាប់អារម្មណ៍នោះ គឺពេលដកហូតមាន់ជល់ទាំង៧ក្បាលយកទៅរក្សាទុកនៅអធិការដ្ឋានខណ្ឌ ត្រូវបានគេដូរយកមាន់ជល់ថ្លៃៗទៅបាត់អស់ ទុកមាន់សម្លជំនួសវិញ ហើយត្រូវនគរបាលយកស្ងោរជ្រក់អស់១ក្បាល ។ ចំណែកអ្នកបញ្ជល់មាន់ ត្រូវនគរបាលដោះលែងម្នាក់ នៅសល់៣នាក់ប៉ុណ្ណោះ ៕
ខេត្តកំពង់ចាម ៖ សង្វៀនបញ្ជល់មាន់លួចលាក់មួយនៅខាងក្រោយផ្ទះបុរសឈ្មោះ សែម ខេង អាយុ៤៧ឆ្នាំ នៅក្នុងភូមិពោធិឥន្ទទី១ ឃុំកោងកាង ស្រុកពញាក្រែក ត្រូវបានសមត្ថកិច្ចឆ្មក់បង្ក្រាប កាលពីវេលាម៉ោង១១ និង៣០នាទីព្រឹក ថ្ងៃទី២៧ កុម្ភៈ ។ នៅក្នុងការបង្ក្រាបនេះ សមត្ថកិច្ចរឹបអូសម៉ូតូចំនួន៦គ្រឿង ក្នុងនោះម៉ូតូវ៉េវ៤គ្រឿង និងម៉ូតូសេដេ ២គ្រឿង រីឯអ្នកញៀនល្បែងបញ្ជល់មាន់នាំគ្នារត់គេចខ្លួនអស់ ។
លោកវរសេនីយ៍ត្រី ប្រាក់ ប៊ុនណុន អធិការនគរបាលស្រុកពញាក្រែក ឱ្យដឹងថា អ្នកដែលញៀននឹងល្បែងបញ្ជល់មាន់ ពីមុនធ្លាប់នាំគ្នាទៅលេងនៅតាមកាស៊ីណួ នៅច្រកទ្វារត្រពាំងផ្លុង ជាប់ព្រំដែនប្រទេសវៀតណាម តែដោយសារចាញ់ខ្លាំងពេក មិនមានលុយលេងធំៗ ក៏បែកគំនិតណាត់គ្នាលេងម្តងត្រង់នេះ ម្តងត្រង់នោះ នៅក្នុងឃុំកោងកាង ស្រុកពញាក្រែក ។
លោកអធិការឱ្យដឹងទៀតថា មុននឹងបញ្ជល់មាន់ គឺក្រុមអ្នកលេងបានណាត់ជួបគ្នានៅតាមហាងកាហ្វេជាមុនសិន រួចបន្ទាប់មកយកមាន់គកដាក់ក្នុងកន្ត្រកម៉ូតូម្នាក់១ក្បាល យកទៅលេងនៅក្នុងព្រៃចម្ការរបស់ប្រជាពលរដ្ឋ ។ សកម្មភាពលេងល្បែងបញ្ជល់មាន់នេះ កើតមានជាច្រើនខែមកហើយ ហើយពេលស្រាវជ្រាវដឹង រូបលោកបានសុំគោលការណ៍ពីលោកឧត្តមសេនីយ៍ត្រី បែន រ័ត្ន ស្នងការនគរបាលខេត្ត ដើម្បីចុះបង្ក្រាបជាបន្ទាន់ នាព្រឹកថ្ងៃទី២៧ កុម្ភៈ ។ ពេលដែលកងកម្លាំងជាច្រើននាក់ទៅពីចម្ងាយ ប្រជាពលរដ្ឋ រួមនឹងអ្នកញៀនល្បែងឃើញ ដែលមានរហូតដល់រាប់សិបនាក់ ក៏នាំគ្នារត់ប្រសេចប្រសាច គេចខ្លួនបាត់អស់ ។ អ្នកខ្លះបានឱបមាន់រត់យកទៅជាមួយថែមទៀត និងបន្សល់ទុកតែម៉ូតូចំនួន៦គ្រឿងប៉ុណ្ណោះ ត្រូវបានយកមករក្សាទុកនៅអធិការដ្ឋាននគរបាលស្រុក ។
លោកវរសេនីយ៍ត្រី ប្រាក់ ប៊ុនណុន ឱ្យដឹងថា នៅព្រឹកថ្ងៃទី២៨ កុម្ភៈ រូបលោកកោះហៅម្ចាស់ផ្ទះឈ្មោះ សែម ខេង មកធ្វើកិច្ចសន្យាមិនអនុញ្ញាតឱ្យលេងបន្តទៀតទេ ប្រសិនណានៅតែផ្គើននោះ នឹងចាត់វិធានការទៅតាមច្បាប់ ។ ក្នុងគោលនយោបាយភូមិ-ឃុំមានសុវត្ថិភាព ត្រូវតែលុបបំបាត់ល្បែងស៊ីសងគ្រប់ប្រភេទ ព្រោះវាជាប្រភពបង្កើតឱ្យមានអំពើចោរកម្ម លួច ប្លន់ ៕
ចែករំលែកព័តមាននេះ