ខេត្តកំពង់ចាម ៖ ឃាតករមិនស្គាល់មុខប្រដាប់ដោយកាំភ្លើងអាកាមួយដើម បានធ្វើសកម្មភាពបាញ់ប្រហារដ៏ព្រៃផ្សៃចំនួន២គ្រាប់ មកលើគ្រួសារគ្រូពេទ្យឯកជនមានសមាជិកចំនួន៥នាក់ ខណៈកំពុងដេកលង់លក់ក្នុងផ្ទះប្រក់ដំបូលស័ង្កសីដែលធ្វើមិនទាន់ហើយ បណ្តាលឱ្យស្លាប់ប្តីប្រពន្ធយា៉ងអាណោចអាធ័ម ដោយបន្សល់ទុកកូនប្រុសតូចៗ២នាក់ និងក្មួយប្រុសម្នាក់ ។ ហេតុការណ៍នេះបានកើតឡើង កាលពីវេលាម៉ោងជាង១២រំលងអធ្រាត្រ ឈានចូលថ្ងៃទី១ មីនា នៅភូមិខ្នប់ដំរីជើង ឃុំដំរិល ស្រុកអូររាំងឪ ។
លោកវរសេនីយ៍ត្រី លឿង រដ្ឋា អធិការនគរបាលស្រុកអូររាំងឪ ដែលបានដឹកនាំកងកម្លាំងចុះទៅដល់កន្លែងកើតហេតុប្រាប់ឱ្យដឹងថា ពីរនាក់ប្តីប្រពន្ធដែលត្រូវឃាតករបាញ់សម្លាប់នោះគឺលោកគ្រូពេទ្យ អ៊ុក ម៉ានិន អាយុ៣៣ឆ្នាំ និងប្រពន្ធឈ្មោះ ទាវ ស្រី អាយុ២៥ឆ្នាំ ។ ពួកគាត់ត្រូវបាញ់ប្រហារពេលកំពុងដេកលង់លក់នៅក្នុងផ្ទះជាមួយកូនប្រុស២នាក់ និងក្មួយប្រុសម្នាក់ ។
លោកវរសេនីយ៍ត្រី លឿង រដ្ឋា បានឱ្យដឹងទៀតថា បន្ទាប់ពីកើតហេតុបាញ់សម្លាប់ពីរនាក់ប្តីប្រពន្ធខាងលើ លោកនាយប៉ុស្តិ៍រដ្ឋបាលឃុំដំរិល ក៏បានទូរស័ព្ទរាយការណ៍មករូបលោក ។ ភ្លាមៗនោះលោកក៏បានដឹកនាំកម្លាំងជំនាញព្រហ្មទណ្ឌស្រុក ចុះមកសហការជាមួយកងរាជអាវុធហត្ថស្រុក ព្រមទាំងអាជ្ញាធរមូលដ្ឋាន ចុះធ្វើការស្រាវជ្រាវ នៅវេលារំលងអធ្រាត្រនោះភ្លាមៗដែរ ។
តាមការពិនិត្យ រូបលោកបានឃើញដានជើងជនសង្ស័យជាឃាតករដើរចេញពីខាងក្រោយផ្ទះជនរងគ្រោះ ចូលតាមច្រកខាងមុខដែលមិនមានទ្វារបិទបើក រួចបាញ់ប្រហារលើប្រពន្ធត្រូវ១គ្រាប់ចំក្បាល បណ្តាលឱ្យធ្លាយមកមុខស្លាប់ភ្លាមៗ ។ បន្ទាប់មក បានបាញ់ប្តី១គ្រាប់ត្រូវក្រោមក្លៀកខាងស្តាំ រងរបួសជាទម្ងន់ និងបន្តិចក្រោយមកក៏ស្លាប់ដែរ ដោយមិនអាចជួយសង្គ្រោះបាន ។ តាមការពិនិត្យនេះដែរ គឺជនរងគ្រោះកំពុងដេកលង់លក់នៅក្នុងមុងតែមួយ ដែលមានសមាជិកក្រុមគ្រួសារចំនួន៥នាក់ ដូច្នេះបង្ហាញថា ឃាតករមានបំណងសម្លាប់តែប្តី-ប្រពន្ធ២នាក់ប៉ុណ្ណោះ មិនមានបំណងសម្លាប់ផ្តាច់ពូជទេ ។ រហូតមកដល់ព្រឹកថ្ងៃទី១ មីនា កម្លាំងសមត្ថកិច្ចជាច្រើននាក់បានធ្វើការឆែកឆេរលំនៅឋានចំនួន២ ស្ថិតនៅភូមិខ្នប់ដំរីជើង ឃុំដំរិល ដែលធ្លាប់មានបញ្ហាទំនាស់ពាក្យសម្តីជាមួយជនរងគ្រោះនាពេលកន្លងទៅថ្មីៗនេះ តែមិនឃើញមានកាំភ្លើងឡើយ ។
តាមការសន្និដ្ឋាន ករណីបាញ់ប្រហារដ៏ឃោរឃៅនេះ អាចកើតចេញមកពីកត្តាចំនួន៣ គឺ១-ទំនាស់កាច់កុងរកស៊ី ២-ការជំពាក់លុយ និង៣-ការលក់ដូរ ។ ផ្ទះរបស់ជនរងគ្រោះកំពុងសាងសង់នៅដាច់ឆ្ងាយពីគេ ដែលងាយឱ្យឃាតករធ្វើសកម្មភាពបាញ់ប្រហារ ហើយរត់គេចខ្លួនយ៉ាងងាយស្រួល ។
លោកវរសេនីយ៍ទោ សាន សុភា នាយការិយាល័យនគរបាលព្រហ្មទណ្ឌកម្រិតធ្ងន់ខេត្ត ប្រាប់ឱ្យដឹងថា រហូតដល់ព្រឹកព្រលឹមថ្ងៃទី១ មីនា លោកឧត្តមសេនីយ៍ត្រី បែន រ័ត្ន ស្នងការនគរបាលខេត្ត បានចាត់ឱ្យរូបលោកដឹកនាំកម្លាំងក្រោមឱវាទចុះទៅជាច្រើននាក់ ដល់ផ្ទះជនរងគ្រោះ ស្ថិតនៅភូមិ-ឃុំខាងលើ ។ ក្នុងនោះបានរកឃើញសម្បកគ្រាប់អាកាចំនួន២ ដូច្នេះឃាតករមិនស្គាល់មុខពិតជាបានប្រើប្រាស់កាំភ្លើងអាកា ហើយបានឈរបាញ់ប្រហារពីរនាក់ប្តីប្រពន្ធនេះ ក្នុងចម្ងាយប្រហែល៣ម៉ែត្រ ប៉ុណ្ណោះ ។ ទោះជាបែបណាក្តី រូបលោកនៅតែបន្តធ្វើការស្រាវជ្រាវយ៉ាងយកចិត្តទុកដាក់ដើម្បីកំណត់អត្តសញ្ញាណជនសង្ស័យជាឃាតករដ៏អប្រិយនេះ តែរហូតដល់វេលាម៉ោង៧យប់ថ្ងៃដដែល នៅតែមិនទាន់មានពន្លឺណាមួយនោះទេ ។
តាមស្ត្រីឈ្មោះ អ៊ុក ស៊ាន អាយុ៣៥ឆ្នាំ ជាបងបង្កើតរបស់ជនរងគ្រោះឈ្មោះ ម៉ានិន បានប្រាប់ឱ្យដឹងដែរថា នៅវេលាម៉ោងជិត១រំលងអធ្រាត្រ ឈានចូលថ្ងៃទី១ មីនា មានបងប្អូនរត់ទៅតាមហៅគាត់ដល់ផ្ទះឱ្យនាំគ្នាប្រញាប់មកមើលប្អូនប្រុស និងប្រពន្ធដែលគេបានបាញ់ស្លាប់នៅក្នុងផ្ទះមានចម្ងាយប្រហែលជា១គីឡូម៉ែត្រពីផ្ទះគាត់ ។ ពេលមកដល់ផ្ទះប្អូនឃើញកម្លាំងនគរបាលមានគ្នាជាង១០នាក់ ប្រដាប់ដោយអាវុធកំពុងការពារជុំវិញកន្លែងកើតហេតុ ។ គាត់បានប្រាប់ថា ប្អូនប្រុសគាត់ធ្វើពេទ្យឯកជន ដើរចាក់ថ្នាំឱ្យគេ ហើយក៏មិនដែលមានទំនាស់ជាមួយនឹងអ្នកណាដែរ ។ ប្អូនប្រុសគាត់បានមកធ្វើផ្ទះនៅកន្លែងកើតហេតុនេះនៅក្នុងអំឡុងខែធ្នូ ឆ្នាំ២០១៣ ដោយធ្វើផ្ទះឈើប្រក់ស័ង្កសីគឺប្អូនប្រុសធ្វើជាមេជាងដោយខ្លួនឯងទើបតែបាន១អាទិត្យប៉ុណ្ណោះ ហើយមិនទាន់ធ្វើទ្វារបិទបើកច្រកចេញចូលខាងមុខនោះទេ ។
ក្នុងហេតុការណ៍នេះ ក្បាលគ្រាប់កាំភ្លើងបានប្លាតទៅត្រូវក្បាលរបស់ក្មួយប្រុសកូនអ្នករងគ្រោះឈ្មោះ សុទ្ធ ម៉េងហុង ដែលមានអាយុជាង២ឆ្នាំរបួសស្រាល ចំណែកក្មួយឈ្មោះ សុទ្ធ ថាណៃ អាយុ៧ឆ្នាំ មិនរបួសអ្វីទេ តែមានការភិតភ័យជាខ្លាំង ។ ក្រុមគ្រួសាររងគ្រោះសំណូមពរដល់សមត្ថកិច្ចគ្រប់លំដាប់ថ្នាក់ សូមស្រាវជ្រាវតាមចាប់ឃាតករដ៏អប្រិយនោះឱ្យខាងតែបាន ដើម្បីយកមកផ្តន្ទាទោសតាមច្បាប់ឱ្យបានធ្ងន់ធ្ងរបំផុត ៕
ចែករំលែកព័តមាននេះ