ខេត្តប៉ៃលិន ៖ អាជ្ញាធរខេត្ត បានដឹកនាំកងកម្លាំងសមត្ថកិច្ចចម្រុះជាច្រើននាក់ ចុះទៅហាមឃាត់មិនឱ្យប្រជាពលរដ្ឋបន្តសាងសង់លំនៅឋាននៅលើដីទំនាស់មួយកន្លែង ។ ប្រតិបត្តិការនេះ ពុំបានបង្កទៅជាហិ.ង្សាអ្វីរវាងគ្នានឹងគ្នាទេ ដោយអាជ្ញាធរបានកោះហៅតំណាងប្រជាពលរដ្ឋមួយចំនួនមកជួបចរចាគ្នា នៅកន្លែងដីទំនាស់ ដើម្បីដោះស្រាយទៅតាមនីតិវិធីច្បាប់ ហើយសន្យាដោះស្រាយ
ខេត្តប៉ៃលិន ៖ អាជ្ញាធរខេត្ត បានដឹកនាំកងកម្លាំងសមត្ថកិច្ចចម្រុះជាច្រើននាក់ ចុះទៅហាមឃាត់មិនឱ្យប្រជាពលរដ្ឋបន្តសាងសង់លំនៅឋាននៅលើដីទំនាស់មួយកន្លែង ។ ប្រតិបត្តិការនេះ ពុំបានបង្កទៅជាហិង្សាអ្វីរវាងគ្នានឹងគ្នាទេ ដោយអាជ្ញាធរបានកោះហៅតំណាងប្រជាពលរដ្ឋមួយចំនួនមកជួបចរចាគ្នា នៅកន្លែងដីទំនាស់ ដើម្បីដោះស្រាយទៅតាមនីតិវិធីច្បាប់ ហើយសន្យាដោះស្រាយគ្នានៅថ្ងៃទី១៥ មីនា ខាងមុខ ។ ការចុះទៅហាមឃាត់នេះ បានធ្វើឡើងកាលពីព្រឹកថ្ងៃទី១ មីនា នៅចំណុចដីព្រលានក្នុងភូមិភ្នំក្រិញ ឃុំស្ទឹងត្រង់ ស្រុកសាលាក្រៅ រហូតមកដល់ថ្ងៃទី២ មីនា គេសង្កេតឃើញមានសមត្ថកិច្ចមួយចំនួននៅឈរជើងចាំឃ្លាំមើលមិនឱ្យប្រជាពលរដ្ឋសង់ផ្ទះបន្តទៀត ។
ប្រភពព័ត៌មានពីប្រជាពលរដ្ឋដែលសង់ផ្ទះនៅលើដីទំនាស់នេះ និយាយថា ដីលំនៅឋាន និងដីចម្ការទំហំ៩៥ហិកតានេះ ត្រូវបានអាជ្ញាធរភូមិ-ឃុំ បែងចែកឱ្យពួកគាត់កាន់កាប់តាំងពីនៅជាព្រៃស្តុក នាឆ្នាំ២០០០មកម៉្លេះ ហើយរហូតមកដល់ឆ្នាំ២០០៦ ទើបមានទំនាស់កើតឡើងរវាងពួកគាត់ និងអាជ្ញាធរ ។ នៅក្នុងឆ្នាំ២០០៦ អាជ្ញាធរខេត្ត បានសម្រេចដកហូតយកដីទំហំជាង២ពាន់ហិកតា ដែលប៉ះពាល់ចំនួន៤ភូមិ ក្នុងនោះមានភូមិទំនប់ ភូមិអូរគន្ធាវ៉ា ភូមិអន្លង់រក្សា និងភូមិភ្នំក្រិញ ស្ថិតក្នុងឃុំស្ទឹងត្រង់ ស្រុកសាលាក្រៅ ដោយដាក់ជាសម្បត្តិរបស់រដ្ឋ (តំបន់អភិវឌ្ឍន៍សេដ្ឋកិច្ចពិសេស) ។
ប្រភពព័ត៌មានបញ្ជាក់ទៀតថា ក្នុងការជួបពិភាក្សាគ្នានោះ ខាងអាជ្ញាធរ បានឱ្យប្រជាពលរដ្ឋទទួលយកដីទំហំ២០ម៉ែត្រ គុណ៥០ម៉ែត្រ ក្នុងមួយគ្រួសារ ។ រីឯក្រុមប្រជាពលរដ្ឋទាំង១៩គ្រួសារ បានទាមទារយកដីចម្ការក្នុងមួយគ្រួសារចំនួន៥ហិកតា ដែលពួកគាត់ធ្លាប់កាន់កាប់ និងបង្កបង្កើនផលតាំងពីឆ្នាំ២០០០រហូតមក ។ ទាក់ទិននឹងបញ្ហាចម្រូងចម្រាសរវាងប្រជាពលរដ្ឋ និងអាជ្ញាធរនេះ ដោយសារមានការតានតឹងក្នុងការចរចាគ្នា ទើបអាជ្ញាធរបានពន្យារពេលរហូតទៅដល់ថ្ងៃទី១៥ មីនា ទើបដោះស្រាយបន្តទៀត ។
ប្រភពព័ត៌មានឱ្យដឹងទៀតថា អាជ្ញាធរខេត្ត បានប្រើប្រាស់កងកម្លាំងប្រដាប់អាវុធចម្រុះ មានមន្ត្រីនគរបាល កងរាជអាវុធហត្ថ និងទាហានជាច្រើននាក់ ក្នុងគោលបំណងទៅរុះរើលំនៅឋានរបស់ពួកគាត់ដែលសាងសង់រួចប្រហែល៥ខ្នង ចេញពីដីមានទំនាស់ ។ ប៉ុន្តែក្រុមប្រជាពលរដ្ឋជាម្ចាស់ផ្ទះ បាននាំគ្នាចូលកាន់កាប់ក្នុងលំនៅឋាននោះរៀងៗខ្លួន ហើយពួកគាត់បានប្រើពាក្យថា បើចង់ចាប់ ឬបាញ់សម្លាប់ ត្រូវមកចាប់ទាំងអស់គ្នាទៅ ពួកគាត់សុខចិត្តស្លាប់ និងសុខចិត្តជាប់ពន្ធនាគារ ។
រហូតមកដល់ព្រឹកថ្ងៃទី២ មីនា កោះសន្តិភាព បានទាក់ទងទៅប្រជាពលរដ្ឋនៅកន្លែងដីមានទំនាស់នោះគឺ មិនមានបញ្ហាអ្វីកើតឡើងបន្តទៀតទេ គ្រាន់តែមានសមត្ថកិច្ចមួយចំនួនឈរចាំយាមដើម្បីមិនឱ្យប្រជាពលរដ្ឋបន្តសាងសង់លំនៅឋានបន្ថែមទៀត ហើយប្រជាពលរដ្ឋក៏ទ្រឹងរង់ចាំដំណោះស្រាយពីខាងអាជ្ញាធរឃុំ ស្រុក និងខេត្ត នាពេលខាងមុខនេះដែរ ។
លោក អ៊ុន ប៊ុនលី អភិបាលស្តីទីស្រុកសាលាក្រៅ ឱ្យដឹងតាមទូរស័ព្ទថា នៅថ្ងៃទី១ មីនា ដែលសមត្ថកិច្ចចុះទៅបង្ក្រាបនោះ ខាងលោកមិនបានទៅចូលរួមទេ ប៉ុន្តែលោកបានដឹងថា ដីដែលមានទំនាស់ជាដីដែលអាជ្ញាធរខេត្តប្រកាសជាដីរបស់រដ្ឋ តាំងពីឆ្នាំ២០០០មកម៉្លេះ ។ ដីនោះមានចំនួនជាង២ពាន់ហិកតា ហើយអាជ្ញាធរក៏បានប្រាប់ប្រជាពលរដ្ឋដែលរស់នៅទីនោះទាំងអស់ហើយដែរ សូមកុំទៅលូកលាន់ ឬរស់នៅលើដីនោះបន្តទៀត ប៉ុន្តែប្រជាពលរដ្ឋនៅតែទៅរស់នៅលើដីនោះជាបន្តបន្ទាប់ ទើបមានរឿងរ៉ាវចម្រូងចម្រាសកើតឡើងជាញឹកញាប់ ។
ជាក់ស្តែងនៅថ្ងៃកើតហេតុ លោកដឹងថា មានកងកម្លាំងចម្រុះចុះទៅកាន់ដីមានទំនាស់ជាច្រើននាក់ តែមិនមានការប្រើអំពើហិង្សាដាក់គ្នាទៅវិញទៅមកនោះទេ ដោយអាជ្ញាធរហៅប្រជាពលរដ្ឋមកជួបចរចាដោះស្រាយតាមផ្លូវច្បាប់ ៕
ចែករំលែកព័តមាននេះ